Matiu 11 - Buka Blahi Ka Cheke Holo

Mae Jisas ghe mae Jone Apublahi

¹ Ke leghugna te farirhiudi nabotho phei nogna mae fanomhore, mae Jisas jifla jare ne tei ka namono te kmana ke lamna Provins Galili ne toutonu, nei farirhiudi neu naiknore.

² Kate au teu ka suga sosolo na, mae Jone Apublahi ne nomhidi unha te edi mae Kraes. Aonu mana ne kurudi keha nogna mae fanomhore ne tei ka mae Jisas.

³ Mare ne ghusna eghu ka mana, “Iagho ngala si mae teke chekeni mae Jone Apublahi mala mei fakarhi ghami ghehati teku ia, ba kaisei mae ngau te mala ofoni teu ghehati na?”

⁴ Mae Jisas ne cheke eghu ka mare, “Ke figri si ghotilo ka mae Jone mala toutonu ka mana, unha te nomhidi nei filodi teu ghotilo ra:

⁵ Iara gognarona fakelidi naikno te dofu, naikno te blughu, naikno te thubu biꞌo, naikno teke megli, fakarha fapulodi naikno teke lehehi, nei toutonuni Nonomho te Keli na ka naikno te kumare.

⁶ Eghume, ihei te maku fabrahu ka iara nogna fatutuani na, mana ginauna gleale'a fara.”

⁷ Aonu, ke leghugna teke pulohi nogna mae fanomho Jone igre, mae Jisas ne toutonu eigna mana ka naiknore. Mana ne ghusna eghu ka mare, “Ghotilo teke tei ka namono nagou ia unha nafnata naikno teke tei filoni ghotilo jare na? Ghotilo neke tei filoni kaisei mae jateula fora te blele tafri kau nuri ra neku? Theo!

⁸ Ba, neke tei filo unha? Filoni kaisei mae te pipichi famane pohe? Theo! Ihei te pipichi nafnata pohe tuare au ka nogna suga mae funei.

⁹ Ba, neke tei mala filo unha si ghotilo ia? Kaisei mae profet? Uve, tutuani fara! Mae Jone Apublahi na kaisei mae profet biꞌo fara ka mae profet teke kulu au tifa ra.

¹⁰ Naugna God neke cheke eghu eigna mae Jone Apublahi ka mae Thugna na: “ ‘Iara ginauna kuruni mae nogu gloku na mala kulu ari ke ulumu iagho, mala kulu tarabana nabrou mala teimu iagho.’

¹¹ Tutuani fara, te chekeni iara ka ghotilo na, mae Jone Apublahi gne kaisei mae biꞌo fara ka fiti naikno te gnafa ka nauthoglu igne. Nu naikno te ikoi fara ke lamnadi naikno God te funei frunidi igre, mana mae ke biꞌo gna mae Jone.

¹² Kau narane te funu farirhiu mae Jone Apublahi te ghilei mei posa gognarona keha mae Jiu neke fariuriu fara ka magra biꞌo ka mae Rom mala fufunu haghe kau nauthoglu igne narane God nate funei frunidi nogna naiknore.

¹³ Ame fufunu nga mae Jone Apublahi nogna gloku na tekuna, hatimare mae profet nei nogna vetula mae Moses teu igre, mare neke cheke eigna narane God te funei frunidi nogna naiknore.

¹⁴ Nu te fatutuanidi ghotilo unha te chekedi mare igre, keli fara, ghotilo laseni mae Jone Apublahi gne ngala teke chekeni mae profet tifa ra, mae Elija na nake pulo mei tekunia.

¹⁵ Uve, ghotilo naikno te fanomho ka iara igre, hiro fakeli gaoghathodi cheke igre.

¹⁶ “Iara lase ghami ghotilo naikno gognaro gne. Ghotilo jateula phei bukrei sua te gnokro ka glalaba na te eha eghu fari thedi ra eghu:

¹⁷ “ ‘Ghehati koje ka nifu mala gleale'a nei ragi eghu ghotilo, nu ghotilo tiromi ragi kolho. Ghehati kojeni khoje te mala diꞌanagnafa na, nu ghotilo tiromi diꞌanagnafa nei tanhi eghu kolho.’

¹⁸ Naugna Jone neke mei ghamu nei koꞌu neku, eghuteuna naiknore cheke eghu, ‘Mae igne au kaisei naitu ke lamnagna signe.’

¹⁹ Eghuteuna kate thoke mei iara te ghamu nei koꞌu teuna, naiknore cheke eghu, ‘Filoni si ghotilo ka mae igne! Ghamu nei koꞌu teuna ngala te glepo ulu fara ka mana na! Eghuteuna, mae te diꞌa te salo takis nei mae te diꞌa teu igre ngala kheragna mana re.’ Eghuteuna mare ginauna filoni nogna gaoghatho te keli God na kate thakle meidi unha te tutuani re.”

Namono aheva te theome fatutuani ni mae Jisas

²⁰ Ke leghugna igne, mae Jisas ne funu cheke faparidi namono aheva te edi mana nogna kofubobhoi te kmanare, naugna naiknodi namono tuare theome tughu nagnafa eidi nakhibodire.

²¹ Mana ne cheke eghu, “Puhi biꞌo ka ghotilo naiknomi ka namono Koresin! Puhi biꞌo ka ghotilo naiknomi ka namono Betsaeda! Naugna ghotilo ne tiromi leghuni chekegna God. Kofubobhoi te edi iara ka ghotilo ra, jame edi ka namonodi mae bongihehe Taea ghe Sidon gre meuna, mare jame gnokrohi pari balu pohe thapa nei ghiha nakrofuhi eghu ka thinidire, fagaglana gna tela tughu nagnafahi nei koko nakhibohi teuna.

²² Tutuani fara, te chekeni iara ka ghotilo na, ka narane fate na God ginauna kokhonidi naiknodi Taea ghe Saedon igre ke tulaomi ghotiloi.

²³ Ghotilo naikno te au Kapanam ra, na eghunu nhaꞌa haghe ghami God kligna eghu jau si ghotilo gaoghathomi na? Theo fara! God ginauna koko soru ghami ghotilo Hades ka namonodi naikno tela lehehi ra. Nu jame filodi naikno te diꞌa ka namono Sodom kofubobhoi te edi God ka ghotilo igre meuna, naikno te diꞌa di Sodom igre jame tughu nagnafahi. Eghuteuna namono Sodom gne jame au ngala gognaro na.

²⁴ Tutuani fara, te chekeni iara ka ghotilo na, ka narane leghu lahu na God ginauna fatedi naikno te au ka namono igne. Fate tuana ginauna biꞌo fara uludi narane teke fatedi mana naikno te diꞌa te au ka namono Sodom.”

Mala gnafadi iheire te babaꞌo

²⁵ Aonu mae Jisas ne cheke eghu ka mae Kmagna na, “Mama, iara cheke fakeli nigho, iagho mae te funei frunidi gobigna lepo kligna ba pari. Iara cheke fakeli nigho, naugna iagho ne falalase ka iheire te jateula sua teu te ihoni thofno glalase na, nu iagho pophoru glalase igne ka naikno te lasedi kmana glepo nei fahaehaghe fara teu eigna nodi glalase na.

²⁶ Uve, Mama, iagho eni igne, naugna igne unha te thofno magnahagheni iagho na.”

²⁷ Mae Jisas ne cheke eghu, “Mae Kmagu iara na la lisa meihi ka khamegu iara gobigna lepore. Theo kaisei naikno te thofno laseni mae Thugna God na, mae Mama thegna ngala. Tutuani, theo kaisei naikno te thofno laseni mae Mama na, kaisei mae Thugna ngala. Nu iheire ngala teke vahidi iara ginauna cheke ranghidi eigna mae Mama, eghuteuna mare ginauna jaola laseni mae Mama.

²⁸ “Ghotilo te babaꞌo ka nanhiꞌo te tahu ra mei ka iara mala gnafa, iara ginauna hata fadelei nanhiꞌo te tahu tuana ka ghotilo.

²⁹ Ghotilo mei mala leghuni nogu vetula iara gne, eghuteuna iara ginauna farirhiu ghami ghotilo, naugna iara mae au kmu nei nhaꞌa fapari ghau thegu. Eghuteuna ghotilo ginauna na ludeni vido mala gnafa na.

³⁰ Eghume gloku te chekeni iara te mala eni ghotilo igne theome ninhigrana. Eghuteuna nanhiꞌo te tusu ari iara ka ghotilo igne theome tahu.”