Matiu 10 - Buka Blahi Ka Cheke Holo

Nogna nabotho phei mae khuru mae Jisas

¹ Kaisei narane mae Jisas ne kilo fodudi nabotho phei nogna mae fanomhore. Mana ne tusu ranghidi nolaghi te mala brue naitu nei nolaghi mala fakarhidi naikno te au kmana nafnata khabru nei fogra biꞌo.

² Igre nanghadi nabotho phei mae nogna khuru mana re: Ulu lahu na mae Simon, te kiloni mae Pita ghe mae Aduru tahigna na; mae Jemes ghe mae Jone, phei thugna mae Sebedi;

³ mae Filip ghe mae Batolomiu; mae Tomas ghe mae Matiu, mae mala saosalo takis; mae Jemes thugna mae Alfius ghe mae Tadius;

⁴ mae Simon, mae te kiloi Silote, naugna mana kaisei mae ka tothoghei te magnahaghei khidi mae di Rom; nei mae Judas Iskariot. Mae Judas gne mae ihei te snakreni mae Jisas ka khamedi nogna naokare.

Nodi gloku hatimare mae khuru

⁵ Ka narane te kuru fajifladi mana nabotho phei nogna mae fanomhore, mae Jisas ne cheke eghu ranghidi mala edi mare glepo igre, “Ghotilo thosei tei ka nohi te theome au mae Jiu nei ka namonodi mae Samaria.

⁶ Nu ghotilo tei ka naiknodi mae Israel. Mare la snivihi jateula sipu eghu.

⁷ Kate tei ghotilo na, cheke eghu ka mare, ‘Narane God te funei frunidi nogna naiknore la namo meihi!’

⁸ Fakarhidi iheire te fogra, fakarha fapulodi iheire te lehe, ke faklinodi iheire te thubu biꞌo fara ka khabru te kiloi leprosi, nei bruedi naiture. Iara tusu ari ka ghotilo nolaghi te mala edi glepo igre, nu ghotilo neke theome foli ka iara. Eghume ghotilo gognarona tei mala ke jaola ranghidi keha naiknore, nu thosei toredi mare mala foli ghami eghu.

⁹ “Thosei hata sileni balumi ka nomi thei na.

¹⁰ Thosei hata gloi, ba hata peapea pohe, ba sadol, ba hata khodo. Naugna naiknogna namono na tangomana te tajini mae ihei te loku na.

¹¹ Kate posa ghotilo ka kaisei namono biꞌo ba kaisei namono ikoi, filoni kaisei naikno te keli mala taji nigho jare mala au ka sugagna mana na ke ghilei jifla ghotilo ka namono tuana.

¹² Kate ruma ghotilo ka suga tuana, chekeni, ‘Pharikeli na au balumi ghotilo.’

¹³ Jame te taji ghami naiknogna suga tuana, toreni nogna fablahi God na ranghidi eghu. Nu, jame te theo na, hata fapulo nomi fablahi na eghu.

¹⁴ Eghuteuna jame te posa ghotilo ka kaisei namono eghuteuna theome magnahaghei ghami naiknogna namono tuana ba tirodi fanomho ka nomi cheke ghotilo re teuna, jifla kokoni namono tuana. Kate jifla ghotilo na, ghiha koko gnagnapa te au ka ghahemi are ke uludi eghu. Igne kaisei fagaglana te mala falalase ghotilo ka naiknore God ginauna na fatedi.

¹⁵ Tutuani fara te chekeni iara ka ghotilo na. Ka narane fate na thono diꞌa fara ranghidi naikno te diꞌa te au kau namono tuana ke tulaodi naikno te diꞌa di Sodom ghe Gomora tifa ra.

¹⁶ “Kulu fanomho fakeli ghotilo ia! Naugna iara ginauna na kuru fajifla ghami ghotilo ka naikno te diꞌa tuare. Kate tei ka mare na ghotilo ginauna jateula sipu ke lamnadi khuma te fakaukathu ra eghu. Nu ghotilo mala jateula mogo te lalase fara, nei jateu balhu te theome magra te au kmu ra eghu.

¹⁷ Ghotilo mala filo fakeli. Naugna keha naiknore ginauna hata ghami ghotilo kau fate. Mare ginauna puri ghami ghotilo ke lamnadi nodi suga tharai are.

¹⁸ Mare ginauna huhuru ghami ghotilo mala kegra ke uludi hatimare mae funei ba hatimare mae King, naugna ghotilo ne leghu ghau iara. Tuana ngala nomi narane ghotilo te mala toutonuni Nonomho te Keli eigu iara na ranghidi iheire te theome Jiu.

¹⁹ Kate hati ghami mare kau fate na thosei nanga nomi eigna unha nate chekeni kau fate na. Naugna kau narane tuana God ginauna tusu ranghi ghami ghotilo nolaghi te mala cheke na.

²⁰ Cheke te mala chekedi ghotilo re theome nomi ghotilo themi, nu nogna Tharunga te Blahi teke mei funu ka Kmami te au kligna na nate cheke ka nagnafami ghotilo re. Nu cheke tuare ngala te mala chekedi ghotilo re.

²¹ “Naiknore ginauna snakre lao kheradi thedire ka mae naokare mala falelehe mare. Eghuteuna mae kmadire na eghu dila thudire, thudire na eghu dila kmadi nei idodi teure ka glehe.

²² Naikno te gnafa gre ginauna tirodi ghami ghotilo, naugna ghotilo ne nogu iara. Nu God ginauna fakarhidi iheire te au famaku ka nodi fatutuani na ghilei thokeni narane te gnafa gna naꞌau papara na.

²³ Kate para ghami naiknogna kaisei namono na, rikha tei ka keha namono na. Tutuani fara te chekeni iara ka ghotilo na, ame gnafa nga ghotilo nomi gloku na ka namono te kmana Israel igre teuna, iara mae teke mei funu ka God na nake pulo mei.

²⁴ “Mae sikolu na theome uluni nogna mae velepuhi na, eghuteuna mae gloku na theome uluni nogna mae funei na.

²⁵ Mae sikolu na nabagna te mala jateula nogna mae velepuhi na teuna, nu mae gloku na nabagna te mala jateula nogna mae funei na teuna. Nu keha naiknore kilo ghau iara Bielsebul, kaisei nanghagna mae Satan. Nu te cheke eghu mare ka iara nomi mae funei ghotilo na, mare ginauna na eghu la cheke fadiꞌa ghami ghotilo ke tulao gu iarai.”

Mhaghuni God, theome naikno

²⁶ “Thosei mhaghudi naikno re, naugna gobigna lepo te edi poru ba cheke poru mare re, ginauna nake thakleu.

²⁷ Unha te chekedi iara ka ghotilo kolho te nomhidi ghotilo igre, ghotilo ginauna tei cheke ranghidi naiknore mala kafe nomhidi mare.

²⁸ Thosei mhaghudi naiknore, naugna mare tangomanadi kolho te faleheni thini na. Nu mae ihei te mala mhaghuni ghotilo na God. Naugna mana au nolaghi te mala kafe falehedi thini ghe tharungare ka namono te mala au papara te kiloi Gehena.

²⁹ Kate foli ghotilo nanghaji na, phei nanghaji ikodi igre kaisei senti kolho. Nu mae Kmami ghotilo te au kligna na, mana ngala kaisei mae te snakreni kaisei ka nanghaji ikodi igre te mala karha nei lehe teuna.

³⁰ Filo si ghotilo, God na kafe lase ghami ghotilo hui jateula mana te kafe lasedi niha khakla te au ka phaꞌumi ghotilo re

³¹ Eghume, thosei mhaghudi unha te edi mare ranghi ghami ghotilo re. Naugna ghotilo thono glepo biꞌo fara ke uludi nanghaji te kmana are!

³² “Ihei te kegra ke uludi naiknore te chekeni ne fatutuani ghau iara teuna, iara ginauna cheke eigna mana ka mae Mama kligna, mana te nogu mae gloku iara na.

³³ Nu ihei te kegra haghe ke uludi naiknore te tirogna chekeni te fatutuani ghau iara, iara ginauna tirogu cheke eigna mana ka mae Mama kligna. Mana ginauna theome nogu mae gloku iara.”

Nogna mae gloku Jisas re mala edi glepo te ninhigrana

³⁴ Mae Jisas ne cheke eghu ka mare, “Thosei ghathoni ghotilo na hata mei iara pharikeli na ka nauthoglu igne teuna. Theo, iara theome hata mei pharikeli na, nu iara mei mala magra naiknore fari thedi.

³⁵ Nu iara mei mala fotadi naiknore mala iheire te theome fatutuani ghau iara re magra baludi iheire te fatutuani ghau iara re. Tutuani, goro mae sua nalha'ure mala magra ka mae kmadire, goro sua gaꞌase re ka idodire, nu goro gaꞌase tholaghire ka nanghodire.

³⁶ Eghume, ginauna thofno tharaknagna mana na ngala te nogna mae naoka mana re.

³⁷ “Ihei te namhadi fara kmagna ba idogna ba thugna nalhaꞌu ba thugna gaꞌase ke tulaogu iarai na, mana theome nabagna te nogu mae fanomho iara na.

³⁸ Ihei te magnahaghei leghu ghau iara teu nu theome pala nogna gaju fafatha na, na eghunu lehe nogna teuna, mana theome nabagna te kiloni nogu mae fanomho iara.

³⁹ Nu ihei te magnahaghei loku famaku karhagna thegna na, mana ginauna theome ludeni thofno nakarha na. Nu ihei te snakreni karhagna na ka iara na, mana ginauna ludeni thofno nakarha na.”

Naikno nate hata taba ka God ginau re

⁴⁰ Mae Jisas ne cheke eghu, “Ihei te taji fakeli ghami ghotilo na, mana taji fakeli ghau iara. Nu ihei te taji fakeli ghau iara na, mana jaola taji fakelini God mae ihei teke kuru mei ghau iara na.

⁴¹ Ihei te taji fakelini kaisei mae profet, naugna te mae profet mana teuna, God ginauna tabani mana jateula ngau God te tabani mae profet tuana eghu. Nu mae ihei te taji fakelini kaisei mae te doglo, naugna te mae doglo mana ke ulugna God na, God ginauna tabani mana jateula God te tabani mae te doglo tuana eghu.

⁴² Tutuani fara, te chekeni iara ka ghotilo na. Ihei te tufa kaisei glepo ikoi te jateula kaisei kapu khoꞌu teu ka kaisei nogu mae fanomho iara te theome biꞌo ka tathadi naiknore igne, God ginauna tabani mana.”