Mae Khuru 28 - Buka Blahi Ka Cheke Holo

Mae Pol au Molta

¹ Kate longa au fakeli teu mata na ne laseni nga ghehati moumolu igne nanghagna na Molta.

² Ka narane tuana nakhete ne reka fara. Nu naikno te au ka moumolu igne thofno keli fara ranghi ghami ghehati nei famane fakeli ghami ghehati. Aonu, mare ne eni kaisei khaꞌaghi biꞌo malami ghehati.

³ Mae Pol ne aghu haghe kaisei bukrei gaju ne koko lao ka khaꞌaghi na. Kate eni mana igne, kaisei phanaga ne jifla mei kate brana khaꞌaghi na ne kakathu ka khamegna mae Pol na.

⁴ Kate filoni phanaga te piri ghuali ka khamegna mae Pol na, naiknogna moumolu na ne cheke eghu fari thedi, “Tore! Mae igne jame kaisei mae mala faghoreho naikno signe! Neubane ne rikha ngau mana ka nhorora na ne karha ne mei thoke agne, nu god mae te kiloi ‘Foli Fapulo’ na theome snakreni mana te karha na.”

⁵ Nu mae Pol ne pusi koko mogo na ne khoko lao lamna khaꞌaghi, eghuteuna mana ne theome kabru ghegna kolho.

⁶ Naiknogna moumolu igne gaoghathodina na huge biꞌo ba na ghosei khoko soru lehe mae Pol neu. Kate ofo nei filo eghu teu mare te raugha fara te theome fadiꞌani mana na, mare ne tughu gaoghathodire ne cheke eghu, “Tore, mae igne kaisei god ngala!”

⁷ Rhegna vido tuana nogna nagare biꞌo mae funeigna moumolu tuana, nanghagna na mae Pablias. Mae Pablias tore ghami ghehati ne tei au ka nogna suga na thilo narane. Mana kaisei mae keli fara ne taji fakeli ghami ghehati.

⁸ Kmagna mae Pablias na fogra biꞌo balu reka nei kabru thi'a. Aonu mae Pol ruma ka chogho na ne tarai, eghuteuna mana taofini neke keli fapulo.

⁹ Ke leghugna igne, keha naikno te fogra ka moumolu igne ne kafe mei ka mae Pol, eghuteuna mana ne kafe fakeli dila.

¹⁰ Naiknogna moumolu tuana ghatho tahu ghami ghehati ne namha kmana glepo. Eghuteuna kate namo jifla ghehati na, mare ne luja mei ka vaka na unha te nabagna nomi thei ghehati na.

¹¹ Ke leghugna te au thilo nhigra ka moumolu tuana ghehati ne jifla jare ka vaka gna Aleksadria. Nanghagna vaka na, “Phei god phakri.” Vaka igne neke poru jare Molta ka nhigra khoburu.

¹² Ghehati tei thoke Sirakius ne au jare thilo narane.

¹³ Funu jare ghehati tei ne thoke Rejiam. Ka keha narane na nuri na neke funu ghaghafa mei ke mata, aonu ghehati tangomana te jifla te tei na. Kaisei narane ke leghugna igne ghehati ne tei thoke Puteoli.

¹⁴ Eghuteuna ka namono igne ghehati ne filodi keha naikno khiloau, eghuteuna mare ne tore ghami ghehati mala au baludi kaisei wik. Leghu lahu na, ghehati leghu nabrou ne tei thoke ka namono biꞌo Rom.

¹⁵ Ame thoke nga ghehati jare teuna, naikno khiloau re ne nonomho thonu eimi ghehati. Aonu mare soru ne thafo ghami ghehati ka namono te kiloi “Maket Apias”, nei jaola ka namono te kiloi “Thilo Hotele”. Kate filodi mare na, mae Pol ne keli tagna fara ne cheke fakelini God.

¹⁶ Kate posa lao ghehati Rom na, hatimare mae biꞌo gna namono na ne snakreni mae Pol mala au sopa thegna. Nu kaisei mae soldia te mala au balugna mana te mala reireghini mana na.

Mae Pol au Rom

¹⁷ Thilo narane ke leghugna igne, mae Pol ne kilo fodudi hatimare mae biꞌodi Jiu te au ka namono igne mala khapru mei ka mana. Kate mei te gnafa mare na, mae Pol ne cheke eghu ka mare, “Kheraguro, iara theome eni kaisei glepo te diꞌa ranghidi naiknore, nei theome cheke faparini kaisei nodi kastom mae ku'edara. Nu neuba ngau, maedi Jerusalem mare loki ghau iara ne snakre lao ghau iara ka khamedi mae Rom.

¹⁸ Hatimare maedi Rom ne hati ghau iara ka fate, eghuteuna ke leghugna te ghusna ghau iara na mare magnahaghei te snakre fajifla ghau iara. Naugna iara neke theome eni kaisei glepo te diꞌa mala falehe ghau iara mare na.

¹⁹ Nu mae Jiu di Jerusalem re mare theome magnahagheni tuana. Eghume iara toredi mare mala mei fate ghau iara agne ke ulugna mae funei biꞌo gna Rom. Nu iara theo kaisei glepo nate fathoro lao ranghidi nogu mavitu na.

²⁰ Eigna igne site tore ghami iara te mei ghotilo gnea, mala tangomana iara te cheke ka ghotilo na. Mare haru ghau iara ka chen igne, naugna iara fatutuani ni fara mae Jisas mae ihei tahati maedi Israel te ofoni teu meigna na.”

²¹ Hatimare mae Jiu ne cheke eghu ka mae Pol, “Ghehati theome filoni kaisei letas te cheke eimu iagho te mei funugna ka hatimare mae Judia. Theo kaisei mae ka mae kherada te mei funudi jare te hata thoutonu eimu iagho ba chekeni ka ghehati kaisei thoutonu diꞌa eimu iagho na.

²² Nu ghehati magnahaghei nomhidi nou gaoghatho iagho re. Naugna ghehati laseni naiknodi namono te gnafa igre cheke faparini koba tothoghei te au iagho tagna igne.”

²³ Aonu mae Pol nei hatimare mae Jiu teure ne vahini kaisei narane mala teke mei mare ka mae Pol na. Ka narane tuana kmana naikno te mei khapru ka suga te au mana na. Mae Pol ne funu cheke ka mare vuha hamerane ne ghilei thoke fei grafi, rurutha fakeli ka naiknore eigna u nakarha God te funei frunini. Mana ne cheke thakledi u cheke eigna mae Jisas te au ka nogna vetula mae Moses nei ka nodi grioriso hatimare mae Profet. Mana fariuriu fara ka mare mala fatutuani ni mae Jisas.

²⁴ Keha mae Jiu ne fatutuanidi unha te chekedi mae Pol, nu kehare theo kolho.

²⁵ Eghuteuna mare ne theo kaisei nodi gaoghatho ne magnahaghei jifla nodi. Nu mae Pol ka nogna cheke leghu lahu ranghidi mare na neke cheke eghu, “Mae Tharunga te Blahi na neke cheke ka tutuani ranghidi mae ku'emi ghotilo ra ka mae Profet Isaia. Ka narane tuana mana neke cheke eghu,

²⁶ “ ‘Tei ka naikno igre mala cheke eghu: “Neubane fanomho ne fanomho ghotilo, ghotilo ginauna na theome raꞌe nomhi fakelini kolho kaisei glepo. Eghuteuna neubane filo ne filo ghotilo, ghotilo ginauna na theome raꞌe filo fakelini kolho kaisei glepo.”

²⁷ Naugna nafnata naikno igre, gaoghathodire la fnothohi, eghuteuna khulidire theome magnahagheni te nomhini kaisei glepo na, eghuteuna tathadire dofuhila. Na eghunu thofno filo glanini mare unha teke filoni ka tathadire, nei thofno nomhi fakelini unha teke nomhini ka khulidire eghuteuna gaoghathodire tangomana te laseni. Eghuteuna mare tangomana teke pulo mei ka iara na, mala tangomana iara te fakeli fapulodire.’

^28-29 “Eghume, iara magnahaghei ghami ghotilo te laseni eigna God neke kuru meini u nonomho gna mae Fakarha na ranghidi naikno te theome Jiu. Eghuteuna mare ginauna na nomhini cheke igne!” Ke leghugna te chekeni mae Pol igne, mae biꞌodi Jiure ne jifla.

³⁰ Mae Pol ne au phei finogha thongana ka suga teke foli thegna te mala aughu na. Leuleghu fata na mae Pol ne keli tagna fara ka naikno te mei sighoni re.

³¹ Eghuteuna mana ne toutonu ranghidi u Nonomho te Keli eigna u nakarha God te funei frunini, nei farirhiu eigna noda Lord Jisas Kraes. Mana kaisei mae frane fara kate toutonuni u Nonomho te Keli na. Eghuteuna theo kaisei naikno te tangomana fariuriu lhotini mana ka cheke igre.