Mae Khuru 27 - Buka Blahi Ka Cheke Holo

Mae Pol saghe ka vaka mala tei Rom

¹ Kate doglohi te mala tei ghehati Itali na, mare ne snakre laoni mae Pol baludi keha mae sosolo langau ka khamegna kaisei mae funei biꞌodi hatimare mae armi. Mae igne nogna soldia mae funei biꞌogna Rom, nanghagna na mae Julias.

² Ghehati saghe ka vaka teke mei funu ka namono Adramitiam te tarabana mala chara leghu namono te tei ka grathagna Provins Esia. Mae Aristakas, kaisei mae khiloau gna namono Tesalonika jare ka Provins Masidonia ne tei balumi ghehati.

³ Ka keha narane na ghehati ne thoke Saedon. Mae Julias ne keli fara ranghini mae Pol ne snakreni mana mala tei filodi kheragna fofodu te au ka namono tuana. Mare tangomana te toghoni mae Pol ka unha te nabagna mana na.

⁴ Aonu ghehati jifla Saedon ne tei rhegna moumolu Saeprus naugna nuri na ne au ke ulumi ghehati.

⁵ Ghehati kasa raru ka nhorora ke kosidi phei provins Silisia ghe Pamfilia. Aonu ghehati ne longa ka namono Maera ka Provins Lisia.

⁶ Jare mae funei biꞌodi hatimare mae armi re ne filoni kaisei vaka funugna Aleksadria te mala tei thoke Itali. Aonu mana ne luja ghami ghehati ka vaka tuana.

⁷ Eghuteuna ghehati magnahaghei fariuriu te tei thoke Nidas nu kmana narane vaka na ne theome thugha, naugna nuri na ne heta mei fara ke ulumi ghehati. Ghehati theome tangomana te tei fabrahu na. Aonu ghehati figri neke tei rhegna giughiju Salmon ne liu ke matagna moumolu Krit.

⁸ Ghehati ne loku manigra ne chara ne tei rhegna moumolu na ne ghilei tei thoke ka kaisei vido te kiloni mare “Naprona Keli,” rhegna namono biꞌo Lasia.

⁹ Ghehati ne au kmana narane jare, aonu kaisei nodi narane biꞌo mae Jiu te mala gae ke ulugna God na la sala'uhi. Eghuteuna gognaro na ghehati thokeni hila narane diꞌa te theome naba te mala tei ka nhorora na. Aonu mae Pol ne cheke eghu,

¹⁰ “Kheraguro, iara laseni noda thei tahati gognaro gne ginauna theome keli. Tahati gne ginauna fadidiꞌa vaka gne, eghuteuna gobigna lepo ka vaka na igre ginauna na jaola, tulao nakarhada theda gre.”

¹¹ Nu mae funei biꞌodi hatimare mae armi gne tirogna fanomho ka unha te chekedi mae Pol igre. Nu mana fanomho kolho ka nogna cheke mae kapten gna vaka na balugna mae te khotogna vaka na.

¹² Jaola naprona te poru mare igne theome raꞌe keli ka nhigra khoburu na. Aonu mae te kmana re magnahaghei te jifla mala fariuriu tei thoke ka namono Finiks mala poru jare. Vido igne kaisei naprona keli fara mala poru te au ka moumolu Krit, au fei te mala plulu naprai.

Kaisei maraghata biꞌo

¹³ Kate funu ghaghafa faꞌikoi teu ke mata u nara na, mare ne cheke eghu, “Uve, igne si nuri te magnahagheni tahati ia!” Aonu mare korho haghe sobo na ne geri rhegna moumolu Krit.

¹⁴ Theome raugha kaisei nuri biꞌo te kiloi “Urakilo” ne ghaghafa mei fei moumolu.

¹⁵ Nuri igne hata vaka na ne pala fadelei. Vaka na theome tangomana te tei faꞌulu na. Aonu ghehati lisa laoni vaka na ne mala pala ghami tei nuri na.

¹⁶ Kate mei namo ghehati ka moumolu ikoi Kaoda gne, ghehati tangomana teke korho haghe boti ikoi na, nu thono ninhigrana fara te eni igne na eghu.

¹⁷ Leghu lahu na mare tangomana te korho haghe boti ikoi na ne haru famaku ka vaka na. Aonu mae te loku ka vaka na ne mhaghu nodi glahula tei ghorho vaka na ka naole biꞌo rhegna Libia. Mare ne lolhopo selo na ne thoghei ne tei.

¹⁸ Nuri biꞌo na heta ghegna ne theome noto, aonu ka keha narane na mare funu koko fakosi gluja na.

¹⁹ Ka fatilo narane na ao ngala mare koko fahuigna gobi lepogna vaka na.

²⁰ Kmana narane ghehati theome filoni naprai ba theome filoni kaisei nathunu ka maloa na. Nuri na thono diꞌa fara ka vido tuana. Ghehati theohi kaisei nomi grouronu ba gaoghatho te mala karha na.

²¹ Kate raughahi te theome ghamu mare na, mae Pol ne kegra haghe farihoteidi mare ne cheke eghu, “Kheraguro, iara neke chekehi ka ghotilo mala thosei jifla Krit. Jame fanomho ghotilo na, tahati jame theome ludeni hoholo igne ba koko noda glujara.

²² Nu te chekeni iara ka ghotilo gognaro na, thosei mhaghu nei thosei nanga nomi eghu, naugna theo kaisei ka tahati nate lehe ginauna! Nu vaka gne kolho nate diꞌa ginauna.

²³ Naugna bongi na kaisei nogna engel nogu God mae ihei te loku ranghini iara gne ne mei kegra rhegu iara

²⁴ ne cheke eghu, ‘Ghema Pol, thosei mhaghu! Iagho mala kegra ke ulugna mae Funei Sisa. Eghuteuna God na keli fara ranghi nigho iagho. Mana ginauna na fakarhidi iheire te tei balumu iagho ka vaka na igre.’

²⁵ Eghume ghotilo kheraguro, thosei mhaghu! Iara fatutuani ni God. Gobigna lepo teke chekedi engel nogna God ka iara igre ginauna na tutuani fara.

²⁶ Nu neuba ngau, tahati ginauna na elo tei ghorho ka kaisei moumolu.”

²⁷ Nabotho fati bongi lamna nhorora funu jiflami ka vido te kiloi “Naprona keli”. Ka bongi leghu lahu na ghehati elo ne kasa ka Nhorora Edria. Farihotei bongiro ka bongi leghu lahu igne hatimare mae boskru gna vaka na ne haimini te mei namo ghehati ka kaisei namono na.

²⁸ Aonu mare koko soru gagha na ne filoni nabagna varadaki khangafa tei gna pari na. Mare tugha longa katha vido neke koko soru gagha na neke filoni nabotho glima khangafa tei gna pari na.

²⁹ Mae boskru gna vaka na ne mhaghu nodi fara glahula ghorho ka khalaꞌe, aonu mare ne koko soru fati sobo leghu. Ke leghugna igne mare ne tarai mala ghosei mei narane na.

³⁰ Keha mae boskrure rodi rikha kokoni vaka na ne farurhu soru boti ikoi na pari. Eghuteuna mare magnahaghei te chaghidi keha mae boskrure ne cheke eghu, “Ghehati na tei koko soru keha sobo ulu.”

³¹ Nu mae Pol ne cheke eghu ka mae funei biꞌodi hatimare mae armi nei hatimare mae soldia, “Te theome au kmu teu mae boskru gre ka vaka gne, God ginauna na theome fakarhi ghami ghotilo.”

³² Aonu mae soldiare kusu phukrigna boti ikoi na ne khoko soru ne elo ne tei.

³³ Ghagra pasa mae Pol ne toredi mare te gnafa mala ghamu. Mana ne cheke eghu, “Nabagna nabotho fati narane tela sala'u ari ra ghotilo neke khogla ofo kolho nei fifilo kolho neke theome ghamu.

³⁴ Gognaro na iara tore ghami fara ghotilo mala ghamu, naugna ghotilo magnahaghei te karha teu. Filo si ghotilo, theo kaisei ka ghotilo nate fiti chochoghei nakarhagna na.”

³⁵ Ke leghudi cheke igre, mae Pol hata bret na ne cheke fakelini ka God ke uludi mare hui. Mana piepike bret na ne ghamu.

³⁶ Aonu kate filoni igne, mare ne kafe keli tadi fara, ne funu ghamu.

³⁷ Khaputumi ghehati te saghe ka vaka na phei gobi fitusalei namno naikno.

³⁸ Ke leghugna te ghamu te boho na, mare koko ne fahui baeg flaoa re ka nhorora na mala feo vaka na.

Vaka ne ghorho ka khalaꞌe

³⁹ Hamerane haghe hatimare mae boskru gna vaka na ne filoni kaisei namono. Mare theome laseni namono aheva, nu mare filoni kaisei naprona ikoi te nusu. Aonu, mare magnahaghei hata te longa vaka na ka naprona tuana.

⁴⁰ Aonu mare ne kusu phukridi fati sobo ulure ne plulu ka nhorora na. Eghuteuna mare jaola ne rurutha phukri teke famamhakudi phei gorha biꞌo te mala saghe leghugna vaka na. Mare korho haghe selo te au ulu na ne longa goghodogna nusu na.

⁴¹ Nu vaka na doglo ne tei ghorho ka naole na. Pha'ugna vaka na jofru ka nusu ne theome tangomana te thugha na. Eghuteuna galo biꞌo ne funu phosa leghu ne fadidiꞌa gleghugna vaka na.

⁴² Hatimare mae soldia te tei baludi mare ka vaka na ne ghaoghatho mala falehedi mae sosolore, mala theo kaisei mae ka mare tao te tei te rikha na.

⁴³ Nu mae Julias, mae funei biꞌodi hatimare mae armi gre ne theome snakredi mare te mala falehedi mae sosolo gre naugna mana magnahaghei te fakarhini mae Pol. Aonu, mana ne kafe cheke ranghidi mae iheire te lase tao re mala krofu pari tao longa mata.

⁴⁴ Mae te gnafa teke au faleghu ka vaka na mare hata vido thaba ba kaisei glepo ka vaka na mala phogla longa mata. Igne unha teke kafe eni ghehati teke thoke mata na, eghuteuna theo kaisei ka ghehati te lehe na.