Mae Khuru 26 - Buka Blahi Ka Cheke Holo

Mae Pol tafrani thegna ke ulugna mae King Agripa

¹ Mae King Agripa ne cheke eghu ka mae Pol, “Uve, gognaro na iara snakre nigho iagho mala cheke tafra nigho themu.” Aonu mae Pol ne tusu haghe khame na u fagaglanagna te mala facheke na.

² Mana ne funu cheke eghu, “Ghema King Agripa, iara thofno gleale'a biꞌo fara te kegra ke ulumu iagho gognaro gne. Iara magnahaghei te cheke tughudi unha fathoro te eni ranghi ghau iara mae Jiu gre.

³ Iara thofno gleale'a fara te cheke ka iagho na. Naugna iagho lasedi fara nomi kastom ghehati mae Jiu, nei iagho lase nila eigna u nomi nafnata magra ghehati igne. Eghume iara tore nigho iagho mala fanomho fakeli ka nogu cheke iara gre.

⁴ “Mae Jiu gre kafe laseni puhigu iara na. Mare laseni fara nakarhagu iara na funu biꞌo haghegu ka thofno namonogu na ghilei mei au Jerusalem.

⁵ Mare lase ghau iara funu tifa. Jame te magnahagheni mare na, mare tangomana te chekeni ka iagho eigna iara gne neke kaisei mae Farasi keli. Ghehati mae Farasi gre thono heta fara te mala leghuni nogna vetula God na uludi keha tothoghei mae Jiure.

⁶ Eghuteuna gognaro na mare magnahaghei te fate ghau iara naugna iara ne thofno fatutuani ni u nhaꞌa cheke teke eni God ka mae ku'emi ghehati tifa ra!

⁷ Eghuteuna nabotho phei vikemi ghehati re neke pogho soru ka God bongi narane, naugna mare ofou mala filoni thoke meigna u nhaꞌa cheke igne. King Agripa, hatimare mae Jiu gre fathoro ghau iara gognaro na naugna iara jaola ofoni nhaꞌa cheke igne!

⁸ Naugna unha si keha ka ghotilo te theome tangomana ghami te fatutuani ni God te fakarha fapulo naikno ka glehe gnea?

⁹ “Tifa na iara neke jaola neke edi kmana glepo te mala fadiꞌani nanghagna mae Jisas gna Nasaret.

¹⁰ Tuana ngala unha teke eni iara Jerusalem na. Hatimare mae pris ulu neke tusu ranghi ghau iara nolaghi te mala koko laodi nogna naikno God re kau sosolo. Eghuteuna kate falehedi mare naiknore, iara neke kaisei gaoghatho baludi mare te mala eni igne.

¹¹ Leuleghu namono na iara ruma ke lamnadi suga tharai are paradi koba nei fariuriu mala cheke fadiꞌani mare mae Jisas. Iara neke thono diꞌatagudi fara mare. Aonu iara neke tei ka keha namono te au ke kosigna namono igne mala tei hirodi nei paradi eghu.”

Mae Pol toutonu eigna narane mana teke funu fatutuani

¹² “Kaisei fata hatimare mae pris ulu neke tusu ranghi ghau iara nolaghi mala tei Damaskas mala lokidi naikno te fatutuani ni mae Jisas.

¹³ Ghema King Agripa, farihotei aublatha, iara megei nga ne filoni kaisei naphae ka maloa na. Naphae tuana siasigla fara uluni naprai na ne siasigla faligoho ghau iara nei mae iheire teke tei balugu iara re.

¹⁴ Ghehati ne kafe khoko soru ka glose na. Aonu iara ne nomhini kaisei naogla ne cheke mei ka iara ka cheke Hibru. Mana ne cheke eghu, ‘Sol, Sol, naugna unha sagho te para ghau iara gnea? Iagho khogla para nigho themu kolho kate fariuriu magrini nogu gaoghatho iara na.’

¹⁵ “Aonu iara ne ghusna eghu, ‘Iagho mae ihei sia, Lord?’ “Eghuteuna Lord ne cheke eghu ka iara, ‘Iara mae Jisas. Iara ngala mae ihei teke parani iagho ia.

¹⁶ Ghosei kegra haghe! Iara neke thakle ka iagho naugna iara neke vahi nigho mala nogu mae gloku iara. Iagho ginauna mala toutonu ka naiknore eidi glepo teke filodi iagho nei glepo nate falalase ranghi nigho iara thogheiro.

¹⁷ Iara ginauna theome snakre nigho ka nou naikno themu gre mala para nigho. Eghuteuna iara ginauna na fakarha nigho la ka naikno te theome Jiu gre. Igre ngala naikno te mala kuru tei nigho iara tadire.

¹⁸ Iara na kuru tei nigho mala tothora tathadi iheire te au kate romno mala filoni mare u thofno naphaegna God. Uve, iara na kuru nigho mala jifla kokoni mare nogna nolaghi mae Satan mala ke pulo ka God. Eghuteuna te fatutuani ghau iara mare na, God ginauna hata fadelei nakhibodire. Eghuteuna mare ginauna na kaisei ngala baludi naikno teke kulu vavahi God re.’

¹⁹ “Naugna igne, ghema King Agripa, iara theome huhughuni unha teke thakle mei funugna kligna na.

²⁰ Ulu lahu na iara neke funu cheke ranghidi naiknore Damaskas mala koko puhi te diꞌare mala figri ka God, nei falalaseni nodi thofno hogri nagnafa na kate edi glepo te kelire. Eghuteuna iara neke tei Jerusalem nei ka nohi te gnafa ka Provins Judia neke toutonu cheke igre, nei jaola ka naikno te theome Jiure.

²¹ Naugna igne hatimare mae Jiu gre ne magnahaghei te loki ghau iara ke lamnagna Sugablahi na, eghuteuna mare fariuriu mala falehe ghau iara.

²² Nu God togho ghau iara fabrahu ngala ghilei thoke ka narane gognaro gne. Eghume iara kegra agne mala toutonuni u thofno tutuani eigna mae Jisas Kraes ranghidi naikno te gnafa te biꞌo nei ba te ikoi. Nu iara theome toutonu kaisei glepo te nhogri ka chekedi hatimare mae profet nei mae Moses eigna unha nate thoke mei.

²³ Hatimare neke cheke eghu, ‘Mae Kraes gne mare ginauna na faleheni mana, eghuteuna mae igne ngala nate kulu karha fapulo ka glehe na. Ka puhi igne mana ginauna na hata mei naphaegna God ka mae Jiu nei iheire te theome Jiu.’ ”

²⁴ Kate chekedi teu mae Pol glepo igre te mala tafragna thegna na, mae Festas ne fnaja fabiꞌo, “Ghema Pol, iagho la meomekro! Iagho hiohiro fabrahu ka buka la ghilei meomekro hila!”

²⁵ Mae Pol ne cheke eghu ka mana, “Ghema Gavana Festas, iara theome meomekro. Nogu cheke iara igre tutuani fara. U cheke igre theome nogna cheke kaisei mae te meomekro.

²⁶ Mae King Agripa lasedi glepo igre. Iara theome mamaja te cheke ka mana na. Te laseni iara na mana kafe nomhidi glepo igre naugna glepo igre neke theome edi ka vido te poru.

²⁷ Ba ghema King Agripa, fatutuanidi sagho nodi cheke hatimare mae profet grea? Uve, te laseni iara na iagho fatutuanidi mare!”

²⁸ Mae King Agripa ne cheke eghu ka mae Pol, “Ba, iagho fariuriu ghau iara ka vido kmoꞌei igne mala nogna naikno mae Kraes sia?!”

²⁹ Mae Pol ne cheke eghu, “Neubane vido kmoꞌei ba vido brahu, iara tarai ka God malamu iagho nei naikno te gnafa te fanomho teu ka iara agne gognaro gre mala jateula iara eghu. Nu iara theome magnahaghedi chen te au ka khamegu iara igre te ari ka ghotilo na!”

³⁰ Aonu mae King Agripa, Gavana Festas, Benis nei naikno te gnafa gnokro teu baludi re kegra haghe

³¹ ne jifla ka chogho na. Mare ne cheke eghu farithedi, “Tahati theo kaisei nafugna te mala faleheni ba te mala fasosoloni mae igne, naugna mana neke theome eni kaisei najafra biꞌo.”

³² Eghuteuna mae King Agripa ne cheke eghu ka mae Gavana Festas, “Jame theome toreni mae funei biꞌogna Rom gne te mala fateni mana na meuna, tahati tangomana te snakre teini te mala snagla mana na.”