Mae Khuru 25 - Buka Blahi Ka Cheke Holo

Mae Festas ne kiloni mae Pol

¹ Thilo narane ke leghugna te kegra gavana mae Festas ka provins igne, mana ne jifla Sisaria ne haghe thoke Jerusalem.

² Jare keha mae pris ulu nei keha mae biꞌodi hatimare mae Jiu tei ne cheke eigna mae Pol ke ulugna mae Gavana Festas.

³ Mare ne cheke eghu ka mana, “Ghema, ghehati thono magnahaghe nigho iagho te kuru fapuloni mae Pol Jerusalem.” Mare ne cheke eghu, naugna mare ghaoghaho mala falehe poruni mae Pol kate mei mana ka nabrou na.

⁴ Nu mae Festas ne cheke eghu ka mare, “Theo! Mae Pol la auhi ka sosolo Sisaria. Iara thegu ginauna nake pulo jare thogheiro.

⁵ Eghume ghotilo kurudi keha nomi mae biꞌo mala tei balugu iara. Mare tangomana te chekeni jare Sisaria unha najafra teke eni mana na.”

⁶ Ke leghugna te au Jerusalem nhanai ba nabotho narane baludi mare na, mae Festas neke pulo Sisaria. Ka keha narane na, mana ne gnokro ka vido mala fate na, eghuteuna chekedi keha mae soldia mala hata meini mae Pol.

⁷ Kate thakle mei mae Pol ka chogho mala fate na, hatimare mae Jiu teke soru mei funudi Jerusalem re mare lao ne kegra faligohoni mana. Mare ne funu fathoro kmana glepo te diꞌa ranghini mae Pol. Nu mare theome tangomana te cheke thakleni kaisei glepo te tutuani.

⁸ Aonu, igne unha teke chekeni mae Pol mala tafragna thegna na, “Iara theome eni kaisei najafra ranghini nodi vetula hatimare mae Jiu ba ranghini Sugablahi ba ranghini mae king biꞌogna Rom.”

⁹ Nu mae Festas magnahaghei te keli tadi hatimare mae Jiu ne ghusna eghu ka mae Pol, “Ba, iagho magnahaghei te haghe Jerusalem mala kegra ke ulugu iara jare ka fate sia?”

¹⁰ Mae Pol ne cheke eghu ka mana, “Theo! Iara gognaro na kegra ke ulumu iagho agne ka nogna fate mae funei biꞌogna Rom. Eghume igne ngala namono nabami ghotilo te mala fate ghau iara na! Iagho laseni igne eigna iara theome eni kaisei najafra ranghidi hatimare mae Jiu.

¹¹ Jame eni tutuani iara kaisei glepo te diꞌa nabagna te mala lehe na, iara ginauna theome tangomana te karha kau glehe na. Nu te theome tutuani fathoro te edi ranghi ghau iara hatimare mae Jiu igre, theo kaisei naikno te au nogna nolaghi te mala snakre lao ghau iara ka mare na. Theo! Eghume iara magnahagheni thegna mae funei biꞌogna Rom te mala fate ghau na!”

¹² Ke leghugna tela kulu chekehi baludi nogna mae mala farirhiu re, mae Festas ne cheke eghu ka mae Pol, “Iagho magnahagheni mae king biꞌogna Rom te mala fate nigho na, keli fara, ghehati ginauna na hata tei nigho ka mana!”

Mae Pol ke ulugna mae King Agripa

¹³ Keha narane ke leghugna igne, mae King Agripa repa greghagna Benis ne tei sighoni mae Festas Sisaria.

¹⁴ Repa au jare keha narane, eghuteuna mae Festas ne cheke eigna mae Pol ka mae king. Mana ne cheke eghu, “Kaisei mae au agne ka suga sosolo, mae igne neke koko lao mae Filiks ka sosolo tifa.

¹⁵ Kate tei iara Jerusalem na, hatimare mae pris ulu nei hatimare mae biꞌodi Jiu eghu neke toutonu eigna mana ka iara, eghuteuna mare magnahaghei ghau iara mala fate faleheni mana.

¹⁶ “Nu te chekeni iara ka mare na theome nomi kastom ghehati mae Rom te snakredi mare te fiti faleheni naikno na. Nu vetula na snakreni mana mala kegra ke uludi mae te fathoroni re mala tafrani thegna.

¹⁷ Kate mei mae Jiu gre agne na, iara ne theome ofo, nu ka keha narane na iara ne gnokro ka sape mala fate na ne kilodi keha mae soldia mala hata meini mana ka chogho mala fate na.

¹⁸ Hatimare mae Jiu kegra haghe neke fathoroni mana, nu mare theome tangomana te chekeni kaisei glepo te jafra fara jateula te ghathoni iara na.

¹⁹ Glepo te chekedi mare eigna nodi God thedi mae Jiu kolho, nei eigna kaisei mae la lehehi tifa, nanghagna na mae Jisas. Nu te chekeni mae Pol na mae igne karhau ngala gognaro na!

²⁰ Iara theome raꞌe lasedi glepo igre. Aonu, iara neke theome ghusnadi mare mala lase fakelini kaisei glepo eigna igne. Eghuteuna iara neke ghusnani mana glahula me magnahaghei tei mana Jerusalem, mala tangomana iara te fateni mana jare na.

²¹ Nu mana neke tore ghau iara mala reireghiniu ngala agne Sisaria. Mana magnahagheni mae funei biꞌogna Rom te mala fateni na. Aonu iara neke chekedi hatimare mae soldia mala reireghi fakelini mana ghilei tangomana iara te kuru teini mana ka mae Funei Sisa mae biꞌogna Rom.”

²² Mae King Agripa ne cheke eghu ka mae Festas, “Iara magnahaghei fara te nomhinila chekegna mae igne.” Aonu mae Festas ne cheke eghu ka mana, “Uve, nathuꞌu iagho ginauna na nomhini chekegna mana na!”

²³ Ka keha narane na, mae Agripa ghe greghagna Benis ne ruma ka nafnakno ka suga biꞌo mala fate na, eghuteuna naiknore ghatho tahudi fara repa ne edi kmana glepo ranghidi repa leghuni nodi kastom thedi na. Hatimare mae funei biꞌodi armi nei hatimare mae biꞌogna namono na eghu haghe ne gnokro baludi repa. Eghuteuna mae Festas ne chekedi hatimare mae soldiare mala hata meini mae Pol.

²⁴ Mae Festas ne cheke eghu, “Ghema King Agripa nei ghotilo te gnafa te kafe au teu agne, ghotilo filonihi mae igne. Naikno Jiu te gnafa agne ba Jerusalem neke buiburi eigna mae igne ka iara. Mare neke eha fabiꞌo mae igne theome nabagna te karha raugha.

²⁵ Nu ka gaoghathogu iara na, mae igne theome eni kaisei najafra nabagna te mala fate faleheni na. Nu mana magnahagheni mae funei biꞌogna Rom te mala fateni na, eghume iara neke ghaoghatho mala kuru teini mana Rom.

²⁶ Nu iara theo kaisei glepo te thofno doglo te mala riso tei eigna mae igne ka noda mae king biꞌo na. Eghume iara gognaro na hata meini mana ke ulumi ghotilo hui nei tulao iagho King Agripa. Eghuteuna kate ghusnani tahati na, iara ginauna na au glepo te mala rioriso eigna mana.

²⁷ Naugna te ghathoni iara na, theome doglo te kuru teini ka Funei Sisa mae igne kate theome lase fakelini unha najafra teke eni mana na.”