Mae Khuru 24 - Buka Blahi Ka Cheke Holo

Mae Filiks ne fanomho ka fathoro teke eni mare ranghini mae Pol

¹ Glima narane ke leghugna igne, mae pris biꞌo Ananias ne soru balugna keha mae biꞌodi hatimare mae Jiu nei kaisei mae loea nanghagna na mae Tetelas. Mare ne tei thoke Sisaria mala fateni mae Pol ke ulugna mae Gavana Filiks.

² Kate ruma haghe mae Pol lamna suga na, mae Gavana Filiks ne kiloni mae Tetelas mala facheke. Aonu mae Tetelas ne funu fathoroni mae Pol ne cheke eghu, “Gavana Filiks, ghehati thofno gleale'a fara te au ka pharikeli funu kate kegra funeimu iagho na, nei kmana glepo te diꞌa ka namonoda gre kela nanhaꞌa fadoglo ka nou thotogho iagho te keli fara.

³ Ghehati magnahaghedi koba glepo igre ka namonomi te gnafa heva heva, nei tegiodi fara igre ka iagho.

⁴ Nu iara theome magnahaghei te cheke brahu, na eghunu ghilei hongo nigho iagho eghu. Iara tore nigho mala keli ranghi ghami nei fanomho eghu iagho ka nomi cheke igre.

⁵ “Eghume te filo glanini ghehati na mae igne kaisei mae mala eꞌei puhi ke lamnadi mae Jiu gre heva heva ka nauthoglu igne. Mana kaisei mae mala baubatu ka tothoghei gna Nasaret.

^6-8 Mana jaola magnahaghei fariuriu fathonani u Sugablahi na. Naugna igne site lokini ghehati mae ignea. Ghusnani sagho themu mae tuana, iagho ginauna na kafe nomhidi cheke te fathoro lao ghehati ka mana re.”

⁹ Keha mae Jiu kaisei gaoghatho ne toghoni mae Tetelas ne kafe cheke eghu, “Glepo te chekedi mana tuare thofno tutuani fara.”

¹⁰ Mae gavana ne eni kaisei fagaglana ka mae Pol mala cheke. Aonu mae Pol ne cheke eghu, “Uve, Gavana Filiks, iara lase nigho iagho kaisei mae mala fate funu tifa mei ka ghehati agne Israel. Eghume iara thofno gleale'a fara nate tafra ghau thegu kate cheke tughudi nodi cheke mare ke lamnagna fate igne.

¹¹ Gognaro gne nabotho phei narane ngala ke leghugna teke tei iara Jerusalem teke pogho soru ranghini God. Goro mae biꞌo are tangomana te cheke eghula ka iagho.

¹² Mae iheire te fathoro ghau iara igre neke theome filo deni ghau iara teke magra balugna mae ihei ke lamna Sugablahi ba faꞌeiꞌei puhi mala diꞌatagna ihei. Iara neke theome eni kaisei puhi ke lamna Sugablahi ba ke lamna suga tharai ba aheva ke lamna namono.

¹³ Eghuteuna, mare theome tangomana te chekeni kaisei glepo te thofno tutuani ke ulumu iagho ka unha fathoro te eni mare ranghi ghau iara gognaro gne.

¹⁴ Nu te chekeni iara ka iagho na igne. Iara thofno leghuni puhigna mae Jisas ngala. Nu puhi igne theome doglo ka hatimare mae Jiu. Iara pogho soruni nodi God mae ku'emi ghehati ra ka puhigna mae Jisas igne. Nu iara fatutuanidi la gobigna lepo teke risodi mare ka nogna vetula mae Moses nei ka nodi buka hatimare mae profet.

¹⁵ Iara fatutuani jateula te edi mae igre eghu, eigna naikno te gnafa, te keli ba te diꞌa, ginauna nake karha fapulo ka glehe.

¹⁶ Eghume iara fariuriu koba te mala eni unha te fatutuani ni iara te doglo ke ulugna God ba ke ulugna naikno.

¹⁷ “Finogha kmana ke leghugna te jifla kokoni Jerusalem, iara hata keha sileni neke pulo jare mala toghodi naikno te kuma nei mala fafara ka God.

¹⁸ Kate eni iara igne, mare mei ne filo ghau iara ka Sugablahi na, ke leghugna tela gaehi iara ke ulugna God na. Ka vido tuana iara neke theome eni kaisei puhi, nei jare na theome kmana naikno teke khapru faligoho ghau iara na.

¹⁹ Nu keha Jiu funudi ka Provins Esia neke mei loki ghau iara. Mare jame nabadi te mala mei ke ulumu iagho te chekedi unha teke fajafrani iara na.

²⁰ Ne theo nganu, ghusnadi mae biꞌo igre mala chekeni mare unha teke filoni mare teke thofno jafra iara ka teke kegra iara ke uludi mae mala fate Jerusalem tifa ra.

²¹ Nu igne kaisei glepo teke chekeni iara ke uludi mae mala fate re, ‘Ghotilo fate ghau iara gognaro gne naugna te fatutuani iara na, God ginauna nake fakarha fapulodi naikno teke lehehi ra!’ Jame cheke igre ngala mare te magnahaghei fate ghau iara na.”

²² Mae Gavana Filiks kulu laseni fara eigna nogna puhi mae Jisas gne. Aonu mana ne fahuhui fate na ne cheke eghu, “Kate mei mae funei biꞌo Lisias na, iara ginauna cheke tughuni nomi puhi ghotilo gne.”

²³ Mana ne cheke ranghini kaisei mae biꞌodi hatimare mae soldia mala reireghi fakelini mae Pol. Nu chekeni mana mala fasnaglini mae Pol katha vido kmoꞌei kolho mala tangomana kheragna mana re te mei sighoni nei tusu ranghini unha te nabagna mana.

Mae Pol ne cheke ranghidi mae Filiks ghe khetogna

²⁴ Keha narane ke leghudi igre, mae Gavana Filiks ne mei balu khetogna Drusila, naꞌa kaisei thau Jiu. Mae Filiks ne kurudi keha mae mala hata meini mae Pol. Mae Filiks ghe khetogna ne fanomho ka mae Pol kate cheke eigna puhi te mala fatutuani ni mae Jisas Kraes.

²⁵ Nu mae Filiks ne mhaghu nogna fara kate chekeni mae Pol eigna nakarha te doglo, nei puhi te mala reireghi fakelini nakarhada na, nei narane God nate fatedi naikno te gnafare. Aonu mae Filiks ne cheke eghu ka mae Pol, “Ghema, la kelihi, tei silagho. Jame au vido te snagla meuna, iara ginauna nake kilo nigho iagho.”

²⁶ Mae Filiks jaola rouronu ka mae Pol glahula tusu ranghini keha sileni mala foli nogna nasnagla. Aonu kmana fata mae Filiks toreni mae Pol mala tei toutonu balugna.

²⁷ Nu mae Filiks ne liliseini mae Pol mala au mana ka suga sosolo, naugna mana magnahaghei te keli tadi hatimare mae Jiu. Nu ke leghu phei finogha, mae Posias Festas neke tughuni mae Filiks mala gavana ka provins tuana.