Mae Khuru 22 - Buka Blahi Ka Cheke Holo

¹ Mae Pol ne cheke eghu, “Kheraguro ba mamare, fanomho meighu ka iara mala ke cheke tughudi ghu iara nomi cheke ghotilo ra!”

² Kate nomhini mare te cheke mae Pol ka cheke Hibru na, mare te gnafa na jaglo nodi ne kafe kmu soru. Aonu mae Pol ne cheke eghu,

³ “Iara kaisei mae Jiu, eghuteuna iara neke karha ka namono Tasis ka Provins Silisia, nu iara neke biꞌo haghe agne Jerusalem. Mae biꞌo teke farirhiu ghau iara na mae Gamalio, eghuteuna mana neke farirhiu fakeli ghau iara te mala leghuni nodi vetula mae ku'edara. Iara thofno heta fara te mala fafnaknoni God ka gobigna lepo te edi iara re, jateula te eni ghotilo gognaro gne eghu.

⁴ Iara neke paradi fara naikno te leghuni puhi te mala fatutuani ni mae Jisas igne. Iara neke lokidi nalhaꞌu ba gaꞌase neke koko laodi ka suga sosolo.

⁵ Mae pris biꞌo nei hatimare goro mae biꞌo mala fate tangomana te chekedi ka ghotilo unha te chekedi iara ka ghotilo igre tutuani fara. Naugna mare thedi neke rioriso letas na hata neke tei iara ka kherada te au ka namono Damaskas. Eghume iara neke tei lokidi naikno igre mala ke hata fapulo agne Jerusalem mala paradi.”

Mae Pol cheke eigna narane teke funu fatutuani

⁶ “Farihotei aublatha kate mei namo iara Damaskas, kaisei naphaegna kligna te thono siasigla fara megei nga ne siasigla faligoho ghau iara.

⁷ Iara khoko soru ka glose na ne nomhini kaisei naogla ne cheke eghu, ‘Sol, Sol, naugna unha sagho te para ghau iara gnea?’

⁸ “Iara ne ghusna eghu ka mana, ‘Iagho mae ihei sia, Lord?’ “Mana ne cheke eghu ka iara, ‘Iara mae Jisas gna Nasaret, mae ihei teke parani iagho ia.’

⁹ Mae teke tei balugu iara re, mare ne filoni u naphae na. Nu mare theome nomhi fakelini chekegna mana na.

¹⁰ “Eghuteuna iara neke ghusna eghu ka mana, ‘Unha nate eni iara na, Lord?’ “Mana ne cheke eghu, ‘Kegra haghe tei Damaskas. Kaisei mae jare ginauna na cheke ranghi nigho iagho gobigna lepo teke kulu ghaoghaho tekeu God mala edi iagho tekure.’

¹¹ Iara theome tangomana te fifilo na, naugna naphae te thono siasigla fara na ne fadofu ghau iara. Aonu mae teke tei balugu iara re ne baubatu ghau iara ne thoke Damaskas.

¹² “Jare kaisei mae nanghagna na Ananias. Mana leghuni fara nogna vetula mae Moses, nei mae Jiu te gnafa te au Damaskas igre mare ghatho tahuni fara mana.

¹³ Mana mei ne kegra rhegu iara ne cheke eghu, ‘Ghema kheraguo Sol, ke fifilo fapulo silagho!’ Ka vido tuanala iara ne tangomana teke filoni mana na.

¹⁴ “Mae Ananias ne cheke eghu ka iara, ‘Nodi God mae ku'edara neke kulu vahi nighohi tifa, mala laseni iagho unha te magnahagheni mana na, nei mala filoni iagho mae te kiloni “Mae gloku te doglo fara” nei mala nomhidi iagho nogna cheke te cheke mei ka iagho ra.

¹⁵ Iagho ginauna nogna mae mala toutonu mana, mala toutonu ka naikno te gnafa re unha iagho teke filodi ba teke nomhidi.

¹⁶ Eghume ofo unha sagho ia? Kegra haghe, kiloni nanghagna Lord nei apublahi eghu mala tihi kokodi God nakhibomure. Kate eni igne, fatutuani ni mana nate fakarhi nigho na.’

¹⁷ “Ke leghugna igne, iara neke pulo Jerusalem. Kaisei narane kate tarai teu iara ka Sugablahi na, iara ne filoni kaisei mifi.

¹⁸ Iara filoni Lord ne cheke eghu ka iara, ‘Faghose! Iagho gognarola jifla agne Jerusalem, naugna naiknore ginauna tirodi fanomho ka unha te chekedi iagho eigu iara na.’

¹⁹ “Nu iara ne cheke eghu, ‘Theo, Lord. Naugna naiknore lasenihi teke tei iara ka suga tharai te gnafa are te mala lokidi nei puridi neku naikno teke fatutuani nigho ra.

²⁰ Kate ke faleheni mare nou mae mala toutonu iagho mae Stivin ia, iara neke aula jare neke reireghidi nodi pohe mae teke faleheni mana re, naugna iara neke magnahaghe nila unha teke eni mare na.’

²¹ “Nu Lord ne cheke eghu ka iara, ‘Jifla sagho gognaro! Iara ginauna na kuru tei nigho iagho kate gaꞌu ka namono aheva te au naikno te theome Jiu.’ ”

²² Naiknore fanomho neu ka mae Pol ne ghilei chekeni mana igne. Aonu naiknore ne funu eha fabiꞌo eghu, “Faleheni! Mae igne theome nabagna te karha!”

²³ Mare diꞌa tadi fara ne eha fabiꞌo. Mare jaola koko nodi pohere eghuteuna koko haghe glose ka maloa na.

²⁴ Aonu mae funei biꞌodi mae armi re ne cheke ka mae soldiare mala hatani mae Pol tei ka nodi suga thedi mae soldiare. Mana ne cheke ka mare mala purini mae Pol, nei ghusnani mana mala laseni naugna unha ne diꞌa tadi nga naiknore ne eha fabiꞌo eghu jare.

²⁵ Kate haru mala purini mana teu mare na, mae Pol ne cheke eghu ka kaisei mae biꞌodi mae armi te kegra teu rhegna mana na, “Ba, doglou ngala ka vetula na si ghotilo te puri ghau iara maegu Rom gnea, kate theome fate ghau nga teu iara na?”

²⁶ Kate nomhini igne, mae biꞌo gna armi na ghosei ne tei ka mae funei biꞌodi mae armi re ne cheke eghu, “Ghema, unha site eni iagho gnea? Mae igne kaisei mae gna Rom!”

²⁷ Mae funei biꞌo na mei ka mae Pol ne cheke eghu, “Ba, iagho maemu Rom tutuani sia?” Mae Pol ne cheke eghu ka mana, “Uve, iara maegu Rom tutuani!”

²⁸ Mae funei biꞌo na ne cheke eghu ka mae Pol, “Iara jaola, iara neke foli sileni biꞌo fara ame kilo ghau nga maegu Rom.” Nu mae Pol ne cheke eghu, “Iara neke karha mei tagna.”

²⁹ Kate nomhini igne, mae teke tarabana mala ghusnani mae Pol tekure kegra haghe ne ghosei tugha fadelei. Mae funei biꞌo na ne mhaghu nogna fara naugna mana la harunihi mae Pol, nu mae Pol gne kaisei mae gna Rom.

Mae Pol ke uludi hatimare mae mala fate

³⁰ Ka keha narane na mae funei biꞌo na ne hata koko chen teke haruni mae Pol na ne snakre teini mana. Aonu mana ne chekedi hatimare mae pris ulu baludi hatimare mae mala fate teure mala faidu. Naugna mana magnahagheni te laseni ne faꞌunha mae Jiu gre ne ei puhi ranghini nga mae Pol. Eghuteuna mana hata fajiflani mae Pol mala kegra ke uludi mare.