Mae Khuru 20 - Buka Blahi Ka Cheke Holo

Mae Pol neke tei Masidonia

¹ Kate gnafa puhi igne, mae Pol ne kilo fodudi naikno khiloau re ne cheke ranghidi mala kegra maku ka nafnata puhi te edi igre. Ke leghugna te cheke ranghidi naiknore, mae Pol kubae ne jifla ne tei Masidonia.

² Kate tei sala'u ka namono te kmana ke lamnagna provins tuana, mae Pol ne cheke faheta ka naikno khiloau re mala thosei nigra. Aonu mana tei ne thoke ka Provins Akaia,

³ ne au jare thilo nhigra. Ke leghugna igne, mana tarabana mala tei ka vaka thoke ka Provins Siria, nu mana ne nomhidi keha mae Jiure ne ghaoghaho mala faleheni mana. Aonu mae Pol ne tughu nagnafa neke pulo sala'u ka Provins Masidonia.

⁴ Keha mae teke tei balugna mae Pol re igre: Sopata mae gna Berea, thugna mae Piras; mae Aristakas ghe mae Sekadas phei maedi Tesalonika; mae Gaeasi mae gna Debi; Tikikas ghe mae Trofimas phei maedi Esia; nei mae Timoti.

⁵ Mae igre neke kulu tei ke ulugna mae Pol, neke ofo ghami ghehati Troas.

⁶ Nu ghehati neke au fapulo Filipae ne ghilei gnafa u “Gaghamu Bret te Theo Isi gna na.” Ke leghugna igne ghehati saghe ka vaka na funu Filipae ne tei ludedi mae Pol nei keha mae langau ke leghudi glima narane jare Troas. Eghuteuna ghehati au jare kaisei wik thongana.

Cheke leghu lahu mae Pol Troas

⁷ Ka grafi Sarere ghehati salo fodu mala tarai nei ima fodu. Mae Pol ne cheke fabrahu ranghidi naikno khiloau re ne ghilei farihotei bongi, naugna mana magnahaghei teke jifla keha narane. Eghume igne nogna toutonu leghu lahu mana ranghidi naikno khiloau igre.

⁸ Jare kmana juta agha neu ka chogho ke kligna te kafe khapru teu ghehati na.

⁹ Uve, kaisei mae sitei nanghagna na Iutikas gnokro neu ka wida na. Wida igne kligna fara. Kate tudu mae Pol cheke na te theome gnafa na, mae Iutikas ne funu thuru. Leghu lahu na mae Iutikas ne thofno thuru iho fara. Eghuteuna mana uka funu ka wida na ne thoke ka glose na pari. U suga igne thilo phapala funu pari thoke kligna. Aonu kate tei te filoni mare mae sitei igne na, mana na la lehehi.

¹⁰ Mae Pol ghosei ne soru pari ka mae Iutikas. Mana tuturupuku soru ne faplomhei khamegnare ka mana. Mae Pol ne cheke eghu, “Thosei nanga nomi. Mana kela karhahi gognaro na!”

¹¹ Ke leghugna igne mae Pol neke haghe ka chogho ke kligna na ne piepike bret na ne ima fodu. Mae Pol ne cheke faraugha ranghidi naikno khiloau re ne ghilei hamerane. Aonu mana jifla kokodi mare ne tei.

¹² Mare hata mae sitei igne ne tei ka sugagna na. Eghuteuna naiknore ne gleale'a fara naugna mae sitei na neke karha fapulo.

Thei funu Troas thoke Maelitas

¹³ Mae Pol magnahaghei liu mata mala ke deni ghami ghehati Asos. Aonu ghehati saghe ka vaka na ne kulu tei thoke Asos.

¹⁴ Kate deni ghami ghehati jare na, mana saghe ka vaka na balumi ghehati ne tei Mitilini.

¹⁵ Aonu ghehati jifla Mitilini, eghuteuna ka keha narane na ghehati ne mei rhegna moumolu Kios. Eghuteuna ka keha narane na teuna ghehati neke tei thoke ka moumolu Samos. Kaisei narane ke leghugna igne ghehati ne thoke Maelitas.

¹⁶ Mae Pol magnahaghei te chari liu Efesus naugna mana tirogna au jare kmana narane ka Provins Esia. Mana magnahaghei ghosei thoke Jerusalem ame thoke mei nga narane Pentekos.

Cheke leghu lahu mae Pol baludi mae biꞌo ka khiloau Efesus

¹⁷ Mae Pol au neu Maelitas ne fatei nonomho ranghidi mae biꞌo ka khiloau Efesus mala ke mei mare filoni mana.

¹⁸ Kate mei mare ka mana na, mana ne cheke eghu ka mare, “Leuleghu fata kate au iara balumi ghotilo na, ghotilo lasenihi puhigu iara na, funu ka narane ulu lahu teke mei thoke iara ka Provins Esia.

¹⁹ Iara eni nogna gloku Lord na ka puhi te theome ghatho ghau thegu, eghuteuna kmana fata iara tanhila ngau eigna gloku te biꞌo igne. Kate magnahaghei falehe ghau iara mae Jiure, iara au papara fara.

²⁰ Ghotilo lasenihi te toutonuni iara ka ghotilo u Nonomho te Keli gne, eghuteuna iara farirhiu ghami ghotilo farihotei glalaba ka namono biꞌo ba ka sugami ghotilo ra. Kate eni gloku igne, iara theome ghatho peapea te chekeni ka ghotilo glepo te mala togho ghami ghotilo na.

²¹ Iara neke orio cheke faheta ranghidi mae Jiu ba mae Griki mala lilisei mare puhidi te diꞌare mala figri ka God nei mala fatutuani ni noda Lord Jisas.

²² “Nu gognaro na iara na leghuni mae Tharunga te Blahi mala tei Jerusalem, eghuteuna iara theome laseni unha nate thoke ghau jare na.

²³ Te laseni kolho iara na leuleghu namono na mae Tharunga te Blahi na kulu cheke ranghi ghau iara, mare ginauna na para ghau nei fasosolo ghau eghu iara.

²⁴ Nu iara theome nanga noguni nakarhagu na. Naugna glepo te ulu na te mala eni fagnafa iara u gloku mala eni iara teku teke tusu mei ka iara noda Lord Jisas. Gloku igne mala toutonuni iara ka naiknore eigna nogna namha biꞌo God.

²⁵ “Iara neke tei heva heva ke lamnami ghotilo neke toutonu eigna nakarha God te funei frunini. Eghuteuna gognaro na iara laseni, theo kaisei ka ghotilo nate filo ghau iara ginauna.

²⁶ Eghume te chekeni iara ka ghotilo gognaro na: Ihei te tei ka nabrougna glehe na puhigna thegna, theome puhigu iara.

²⁷ Naugna iara la chekedihi ka ghotilo gobigna lepo te magnahaghedi God te mala lasedi ghotilo re.

²⁸ Eghume filo fakeli ghami themiu, baludi naikno te gnafa teke lisa ari mala reireghidi ghotilo teku mae Tharunga te Blahi are. Ghotilo mala jateula mae greireghi sipu eghu mala reireghi fakelini nogna khiloau God teke fofoli ka glehegna mae Thugna ia.

²⁹ Naugna iara la kulu lasenihi igne. Ke leghugna te tei koko ghami iara ginauna, keha naikno te diꞌa puhidire ginauna mei fariuriu lalamadi naikno ka khiloau gne.

³⁰ Jaola keha ka ghotilo themi ginauna toutonu chaichaghi ka naikno khiloau re mala leghudi thedi kolho.

³¹ Eghume fiofilo ghami eghu ghotilo ia! Jaola, ke ghathoni igne eghu, thilo finogha iara neke cheke faheta nei farirhiu ghami ghotilo bongi narane balu tanhi.

³² “Gognaro na iara lisa lao ghami ghotilo ka khamegna God. Mana la kulu tusu arihi ka ghotilo nogna Nonomho te Keli na nei chekeni te namha ghami ghotilo na. Eghuteuna mana tangomana te taji ghami ka cheke igre. Mana ngala te tangomana te farheta ghami nei tusu ranghi ghami glepo te keli na baludi keha nogna naiknore.

³³ Tutuani, kate au balumi ghotilo na, iara neke theome mamagnani nogna sileni ba nogna pohe ihei na.

³⁴ Eghuteuna ghotilo themi lase nila, iara thegu loku heta ka khamegu igre mala ludedi gobigna lepo te magnahaghedi iara ba te magnahaghedi kheragu fofodure.

³⁵ Ka nogu gloku te gnafare, iara falalase ka ghotilo unha jame te edi koba tahati te mala toghodi iheire te nigra. Eghume tahati thosei ghatho ihoni u chekegna noda Lord Jisas, teke cheke eghu mana ia, ‘Mae ihei te tuatufa na, mana keli tagna fara ke tulaogna mae ihei te hata glepo malagna thegna kolho.’  ”

³⁶ Kate chekeni igne, mae Pol tuturupuku soru baludi mare gnafa ne tarai.

^37-38 Eghuteuna mare ne kafe loku famaku ka mae Pol ne gnanghoni mana fabrahu balu tanhi, naugna mae Pol ne chekeni ka mare, mare ginauna nake theome filo tathani mana. Aonu mare ne tei balugna mana ka vaka na.