Mae Khuru 2 - Buka Blahi Ka Cheke Holo

Meigna mae Tharunga te Blahi

¹ Kate thokeni narane Pentekos na, mare ne kafe au fodu neu kaisei vido.

² Kaisei naogla biꞌo jateula nuri blahi neu megei nga ne ghaghafa mei funu ka maloa na ne fodu ka suga te au teu mare na.

³ Ke leghugna igne mare ne filoni kaisei glepo jateula te deudeplu khaꞌaghi ra neu ne sopagna thoti ke klignadi mare.

⁴ Aonu mae Tharunga te Blahi ne mei au ka mare ne gnafa, eghuteuna mare ne funu cheke ka keha chekedi delei, leghuni unha nafnata cheke teke tusu ranghidi mae Tharunga te Blahi na.

⁵ Uve, ka narane tuana kmana mae Jiu te posa mei Jerusalem mala tarai funudi ka namono te kmana heva heva ke lamnagna u nauthoglu gne.

⁶ Kate nomhini u naogla igne, kmana naiknore ne khapru mei. Mare ne kafe jaglo nodi, naugna naikno te gnafa igre ne sopagna nomhidi nodi cheke thedire.

⁷ Naiknore ne thono jaglo nodi fara ne cheke eghu, “Tore, mae te cheke teu igre, maedi Galili kolho!

⁸ Ne faneha neu si mare te kafe lasedi noda soasopai cheke tahati grea?

⁹ Tahati gne funuda ka namono Pasia, Midia, Ilam, Mesopotemia, Judia, Kapadosia, Pontas nei Esia,

¹⁰ Frijia, Pamfilia, Ijep, ka nohigna Libia rhegna namono Saerini. Keha ka tahati mae Jiu mei funudi Rom kolho,

¹¹ kehare karha Jiu ba kehare theome karha Jiu nu gognaro mare leghudi nodi khiloau mae Jiure. Eghuteuna keha ka tahati mei funudi Krit nei Arebia. Neuba ngau tahati kafe nomhidi mare cheke ka noda cheke tahati re eidi glepo biꞌo te edi God igre.”

¹² Hatimare ne kafe jaglo nodi ne faꞌihodi, ne ghusna eghu fari thedi, “Tore, unha eghu si gaoghathogna na gnea?”

¹³ Nu keha naiknore ne maꞌedi mae khurure ne cheke eghu, “Mae igre koꞌu waen kolho.”

Mae Pita ne cheke ranghidi naiknore

¹⁴ Mae Pita ne kegra haghe baludi nabotho kaisei mae khurure ne cheke eghu fabiꞌo ka naiknore, “Uve kheraguro, ghotilo mae Jiu nei iheire te kafe au agne Jerusalem na, fanomho fakeli ka unha nate chekedi iara igre! Snakre ghau iara mala toutonu ka ghotilo unha te eni gognaro gne.

¹⁵ Mae igre theome koꞌu waen jateula te ghathoni ghotilo na eghu. Theo. Naugna ao ngala tanhi nhevai ngau hamerane gognaro gne.

¹⁶ Nu mae profet Joel na neke kulu rioriso eigna unha te filoni ghotilo gognaro gne,

¹⁷ “ ‘God ne cheke eghu: Kate namo huigna nauthoglu gne, iara ginauna lisa soru Tharungagu na ke klignadi naikno te gnafare. Eghuteuna thumi nalhaꞌu nei gaꞌase teu ghotilo are ginauna na toutonuni chekegu iara na. Eghuteuna mae majaghani nei mae biꞌomi teu ghotilo re, iara ginauna na tusu ranghidi nolaghi te mala mifi na.

¹⁸ Uve, iheire te loku ranghi ghau iara na, nalhaꞌu ba gaꞌase, ka narane tuana iara ginauna na tusu lao u Tharungagu na ke klignadi mala toutonuni chekegu iara na.

¹⁹ Iara ginauna lilisei fagaglana: dadara, khaꞌaghi, nei u gagahu biꞌo kligna kau maloa nei agne pari kau nauthoglu gne mala filoni naiknore.

²⁰ U naprai na ginauna romno, nei u glaba na ginauna na ukru jateula u dadara eghu. Eghuteuna narane gna Lord te biꞌo nei siasigla teuna ginauna na thakle mei.

²¹ Aonu ihei te tore ka nanghagna Lord na, iara ginauna na fakarhidi.’

²² “Ghotilo naiknomi Israel, fanomho fakeli kau cheke igre! God neke kuru meini mae Jisas gna Nasaret gne ka ghotilo, eghuteuna mana neke thofno falalase igne ka ghotilo kau gloku te nolaghi, nei u kofubobhoi, nei u fagaglana. Naugna God neke edi igre ka mana la filodihi ghotilo.

²³ God neke leghuni nogna gaoghatho teke kulu nanhaꞌa tifa na ne snakreni mana mala lokini ghotilo. Eghuteuna ghotilo ne faleheni mana kate snakre lao ghotilo ka khamedi mae te diꞌa ra mala tupijuruni mare kau gaju fafatha.

²⁴ Nu God ne hata fajiflani mana ka nolaghi te mala lehe na, eghuteuna ke fakarha fapuloni kau glehe. Naugna glehe na theo kaisei nogna nolaghi te mala loku famakuni mana na.

²⁵ Naugna mae Devet na neke kulu cheke eghu eigna mana, “ ‘Iara filoni Lord au fabrahu ke ulugu, mana na au rhegu iara, mala theome nanga nogu iara.

²⁶ Naugna igne iara gleale'a fara, eghuteuna chekegu iara na fatakleni nogu gleale'a na. Neubane mae mala lehe, iara ginauna na fatutuani nigho fabrahu.

²⁷ Naugna iagho ginauna na theome lisa laoni tharungagu na Hades. Eghuteuna iagho ginauna theome snakreni nou Mae Blahi na mala boto ke lamna gluma.

²⁸ Iagho neke falalase ka iara u nabrou karha na, eghuteuna iagho ginauna au balugu iara mala faglealeꞌa ghau iara.’

²⁹ “Uve, kheraguro, iara magnahaghei te toutonu fakeli ka ghotilo eigna mae kuꞌeda King Devet tifa ia. Mana neke lehe eghuteuna mare neke giugilunihi mana, eghuteuna bekugna mana na au ngala ka namonoda tahati gne ghilei posa ka narane gognaro gne.

³⁰ Nu mae Devet gne neke kaisei mae profet, eghuteuna mana laseni u nhaꞌa cheke teke eni God ka mana nate mala kaisei mae ka vikegna thegna mala kegra funei biꞌo jateula mana eghu.

³¹ Mana ne kulu filo glanihi unha nate eni God ginauna. Aonu mana ne cheke eigna mae Kraes nate karha fapulo na, neke cheke eghu, ‘God na theome lisa laoni mana mala au Hades. Eghuteuna mana theome snakreni thinigna na mala boto lamna gluma.’

³² Tutuani, God neke fakarha fapuloni mae Jisas kau glehe, eghuteuna ghehati te hui na la thofno filonihi ka tathamire.

³³ God neke hata hagheni mana kau sape nafnakno na mala gnokro rhegna thegna. Eghuteuna God mae Kmagna na neke tusu ranghini mana Tharunga te Blahi na, mala leghuni nogna nhaꞌa cheke na. Eghume unha te filoni nei nomhini teu ghotilo gognaro gne, glepo neke tusu meini God ka ghehati.

^34-35 Mae Devet thegna neke theome haghe kligna mala gnokro rhegna God, nu mana neke cheke eghu, “ ‘God ne cheke ranghini nogu mae funei iara na: “Iagho gnokro agne fei nhetagu iara. Naugna iara ginauna lisei soru nou naoka iagho re ke parigna nou nolaghi.” ’

³⁶ “Eghume naikno te gnafa Israel mala lase fakelini eigna God neke vahini mae Jisas mala Lord nei Kraes. Nu ghotilo neke faleheni mana kau gaju fafatha.”

³⁷ Kate nomhini naiknore unha te chekedi mae Pita igre, mare ne diꞌanagnafadi fara ne cheke eghu ka mae Pita nei ka keha mae khurure, “Kheraguro, na fanefou si ghehati ia?”

³⁸ Mae Pita ne cheke eghu ka mare, “Tughu nagnafa, nei kafe apublahi ka nanghagna mae Jisas Kraes, aonu God ginauna hata fadelei u nakhibomire nei tusu ranghi ghami u Tharunga te Blahi na.

³⁹ Naugna u nogna nhaꞌa cheke God igne mala nomi ghotilo, nei maladi goro thumi are nei maladi iheire te theome karha nga teu. Uve, u nhaꞌa cheke igne maladi naikno te gnafa teke kilo meidi noda Lord.”

⁴⁰ Kmana kmana glepo fara teke chekedi mae Pita ka mare re. Eghuteuna mae Pita ne cheke faheta eghu ka mare, “Thosei leghudi puhidi naikno te diꞌa gognaro gre, na eghunu fate ghami God ginauna jateula naikno te diꞌa tuare eghu.”

⁴¹ Iheire naikno te fatutuanidi nogna cheke mae Pita re ne apublahi, naba thilo thogha naikno te ruma haghe ka tothoghei mae khiloau kau narane tuana.

U nakarhadi naikno khiloau

⁴² Eghuteuna naikno igre ne keli tadi fara ne fanomho fabrahu ka nodi farirhiu hatimare mae khuru, nei mala toghodi mare ka nodi tothoghei thedi na, nei ghamu fodu, nei tarai fodu.

⁴³ Hatimare mae khuru ne edi kmana kofubobhoi nei fagaglana eghu ka nogna nolaghi biꞌo God na. Eghuteuna kate filodi igre, naiknodi Jerusalem re ne kafe mhaghu nei ghatho tahuni God.

⁴⁴ Naikno te gnafa te fatutuani ni mae Jisas re ne kaisei au fodu ngala, nei kaisei salofodu ngala nodi gobigna lepo fateote'o re.

⁴⁵ Eghuteuna mare foli nodi vido glose ba unha glepo teke khotodi thedire mala toghodi iheire te theo nodi.

⁴⁶ Leghu narane na mare salo fodu kau nogna Sugablahi God na mala tarai fodu nei jaola ima fodu ka sugadire balu gleale'a ka nagnafa te keli,

⁴⁷ nei kilo fnaknoni God. Eghuteuna naiknore ne keli tadi ka mare. Aonu leuleghu narane na God fakarhidi keha naikno te ruma mei ke lamnagna nodi tothoghei naikno khiloau re.