Mae Khuru 16 - Buka Blahi Ka Cheke Holo

Mae Timoti ne tei baludi mae Pol ghe mae Silas

¹ Mae Pol ghe mae Silas ne tei thoke Debi. Eghuteuna ke leghugna igne phiamare jifla jare neke tei Listra. Kaisei mae khiloau nanghagna na mae Timoti au jare Listra. Idogna mae Timoti gne tifa na neke thau Jiu eghuteuna gognaro na naꞌa thau khiloau. Eghuteuna mae kmagna na kaisei mae Griki.

² Mae khiloaudi Listra nei Aekoniam teure mare ne ghatho tahuni fara nei cheke fakelini eghu mae Timoti.

³ Mae Pol magnahagheni mae Timoti te mala tei balugna. Nu mae Jiu te au ka nohi tuana kafe laseni kmagna mae Timoti na kaisei mae Griki. Aonu mae Pol ne tohi fagaglanani mae Timoti mala keli tadi mae Jiure.

⁴ Mae Pol ne hata mae Timoti nei keha mae eghu balugna ne tei leghu namono mala cheke ranghidi naikno khiloau re mala leghudi u vetula teke lilisei hatimare mae khuru nei hatimare mae biꞌo ka khiloau Jerusalem.

⁵ Aonu khiloau jare re ne rheta nei bruara eghu leghu rane.

God ne kiloni mae Pol mala tei Masidonia

⁶ Mae Pol nei mae balugna re eghu ne tei sala'u ka Provins Frijia nei Provins Galesia. Naugna mae Tharunga te Blahi na theome snakredi mare te toutonuni u Nonomho te Keli na ka Provins Esia.

⁷ Kate tei thoke mare ka Provins Misia, mare neke fariuriu mala ke tei ka Provins Bitinia. Nu Tharunga gna mae Jisas na ne theome snakredi mare te tei jare na.

⁸ Aonu mare fafraini Misia neke tei ka namono Troas.

⁹ Ka bongi tuana mae Pol ne mifi. Ka mifi tuana mae Pol ne filoni kaisei mae gna ka Provins Masidonia mei ne kegra ke ulugna mana ne toreni fara eghu, “Liu mei sagho Masidonia mala togho ghami ghehati!”

¹⁰ Ke leghugna te mifi mae Pol igne, ghehati ghosei ne tarabana mala tei Masidonia. Ghehati eni igne, naugna ghehati thofno laseni God neke kilo ghami ghehati mala toutonuni u Nonomho te Keli gne ka naikno te au ka Provins Masidonia.

Lidia ne mei ka khiloau

¹¹ Ghehati jifla Troas ka vaka doglo ne tei ka moumolu Samotres. Ka keha narane na ghehati tei ne longa Niapolis.

¹² Funu jare ghehati mhata ne tei ka namono Filipae, kaisei namono ulu ka nohi ke lamnagna Provins Masidonia. Ghehati ne au keha narane ka namono tuana. Namono tuana neke hohoro hatimare mae Rom.

¹³ Kau narane Sabat na ghehati ne jifla ke kosigna namono na ne soru ka geri khoꞌu na. Ghehati hironi kaisei vido aheva te au mae Jiu mala tarai. Ghehati ne filodi keha gaꞌase khapru neu jare, aonu ghehati gnokro soru ne facheke baludi.

¹⁴ Kaisei gaꞌase jare nanghagna na Lidia. Naꞌa thaugna Taetira neke mei au jare Filipae. Nogna gloku na mala fofoli pohe ukru nei naꞌa jaola pogho soruni thofno God. Kate fanomho teu naꞌa ka mae Pol na, God ne tothora nagnafagna na ne fatutuani ni mae Jisas.

¹⁵ Naꞌa nei naikno te gnafa te au ka nogna suga na ne kafe apublahi. Aonu Lidia ne tore ghami ghehati mala tei ka sugagna na. Naꞌa ne cheke eghu ka ghehati, “Ne thofno kaisei naikno khiloau iara teu ghotilo gaoghathomi na, mei au ghotilo ka sugagu iara gne eghu.” Naꞌa ne cheke fara ka ghehati mala au balugna.

Mae Pol ghe mae Silas ne au ka sosolo

¹⁶ Kaisei narane kate tei ghehati ka vido te mala tarai na, kaisei gaꞌase gloku mei ne deni ghami ghehati. Kaisei naitu na au ka gaꞌase tuana mala tangomana naꞌa te toutonudi glepo te theome thoke mei nga teure. Aonu nogna mae funei naꞌa re hata sileni biꞌo fara kate eni naꞌa tuana.

¹⁷ Gaꞌase igne mei ke leghumi ghehati nei mae Pol. Naꞌa ne cheke eghu fabiꞌo, “Mae igre, mare nogna mae gloku God te au kligna! Mare toutonuni ka ghotilo nogna puhi God te mala fakarhi ghami ghotilo na!”

¹⁸ Naꞌa eni koba igne leuleghu narane. Mae Pol ne ghilei hongoni, aonu mana figri ne cheke eghu ka naitu na, “Ka nanghagna mae Jisas Kraes iara te cheke ari ka iagho mala jifla mei ka naꞌa!” Eghuteuna naitu na ghosei ne jifla mei ka gaꞌase na.

¹⁹ Aonu kate filoni mae khotogna gaꞌase igne tela gnafa nodi puhi te mala hata nodi sileni biꞌo ka naꞌa, mare ne lokidi mae Pol ghe mae Silas. Mare korhidi phiamare ne tei ke uludi goro mae biꞌo re ka glalabagna namono na.

²⁰ Mare ne hatadi mae Pol ghe mae Silas ka maedi Rom te au ka namono igne mala fatedi phiamare. Mare ne cheke eghu, “Phei mae Jiu igre ne edi kmana puhi ka noda namono tahati gne.

²¹ Eghuteuna phei mae igre farirhiu glepo te theome naba te edi tahati mae Rom gre.”

²² Nakhapru kulu au tekeu jare na ne kaisei loku fodu ne diꞌa tadi fara ka mae Pol ghe mae Silas. Mae mala fate gre ne chekedi mae soldiare mala hata koko nodi pohe mae Pol ghe mae Silas re mala puridi phiamare ka gaju.

²³ Aonu kate puri fadiꞌadi mae Pol ghe mae Silas gre, mare ne koko laodi phiamare ka suga sosolo na. Eghuteuna mare ne cheke ranghini mae greireghi suga sosolo na mala reireghi fakelidi phiamare.

²⁴ Kate nomhini cheke igne, mana ne liliseidi phiamare ka chogho te ikoi te au lamna lahu ka suga sosolo na. Aonu mana ne fachakhi lao ghahedi phiamare re farihoteidi phia thaba biꞌo.

²⁵ Farihotei bongiro, mae Pol ghe mae Silas ne tarai balu koje kilo fnaknoni God. Keha mae te sosolo re ne fanomho ka phiamare.

²⁶ Kaisei nakheu biꞌo megei nga ne nghali ka khotogna u suga sosolo na. Aonu grengathagna suga na ne kafe thora. Eghuteuna chenire ne kafe khusu ne khoko soru ka khamedi mae te sosolore.

²⁷ Kate dofra haghe te filodi grengatha te thora re, mana ghathodi mae sosolore la kafe rikhahi. Aonu mae greireghi suga sosolo na hata naflahi na ne magnahaghei faleheni thegna. Naugna mana laseni, mae biꞌo re ginauna faleheni mana, eigna mana ne snakredi mae sosolore ne rikha.

²⁸ Nu mae Pol ne eha eghu fabiꞌo ka mana, “Ghema, thosei falehe nigho themu! Ghehati kafe au ngala agne!”

²⁹ Mae greireghi suga sosolo na ne ehadi keha naiknore mala hata mei juta. Aonu mana chari ne tei lamna suga sosolo ne tuturupuku soru balu fififri ke uludi mae Pol ghe mae Silas naugna mana ne thono mhaghu nogna fara.

³⁰ Ke leghugna igne, mana hatadi phiamare ne jifla kosi ne ghusna eghu ka phiamare, “Phei mae, unha nate eni iara te mala fakarhi ghau God na?”

³¹ Phiamare ne cheke eghu ka mana, “Fatutuani ni noda Lord Jisas, God ginauna fakarhi nigho nei naikno te gnafa ka tharaknamu na.”

³² Aonu mae Pol ghe mae Silas ne toutonuni chekegna Lord na ranghini mana nei naikno te gnafa ka tharaknagna mana na.

³³ Ka vido tuana farihotei bongiro mae greireghi suga sosolo na ne taji fakelidi phiamare ne titihi nafnera ka thinidi phiamare re. Aonu mana nei naikno te gnafa ka tharaknagna mana re ghosei ne kafe apublahi.

³⁴ Ke leghugna igne mae greireghi suga sosolo na hatadi mae Pol ghe mae Silas ne tei ka sugagna na ne faꞌimadi. Mana nei tharakna na ne gleale'a fara naugna mare gognaro na la fatutuani God.

³⁵ Hamerane ka keha narane na, mae mala fate re ne kuru tei keha mae pulis mala cheke ka mae greireghi gna suga sosolo na mala hata fajifladi mae Pol ghe mae Silas ka suga sosolo na.

³⁶ Aonu mae greireghi gna suga sosolo na ne cheke eghu ka mae Pol, “Mae mala fate re te chekeni na, ghopa mae Silas tangomana te jifla na. Ghopa gognaro tangomana te jifla ka pharikeli.”

³⁷ Nu mae Pol ne cheke eghu ka mae pulisire, “Tore! Ghepa maemi Rom, eghuteuna mare theome hata ghami ghepa ka fate. Theo kolho. Mare fiti puri ghami ghepa ke uludi naiknore, nei koko lao ghami ka suga sosolo. Eghuteuna gognaro na mare magnahaghei te megei nga te hata fajifla ghami ghepa. Theo tuana! Keliu mala mei mare thedi hata fajifla ghami ghepa ka suga sosolo gne.”

³⁸ Aonu mae pulisire pulo neke chekeni igne ka mae mala fate re. Kate nomhini mae Pol ghe mae Silas gre maedi Rom teuna, mare ne mhaghu nodi fara eigna mare ne fiti puridi kolho phiamare. Naugna igne blahi fara ka nodi vetula mae Rom re.

³⁹ Aonu mare mei ka mae Pol ghe mae Silas ne chekeni ka phiamare nodi diꞌanagnafa na. Mare ne hata fajifladi mae Pol ghe mae Silas ka suga sosolo na, eghuteuna toredi phiamare mala jifla kokoni u namono na.

⁴⁰ Aonu kate jifla mei ka suga sosolo na, phiamare ne kulu tei ka sugagna Lidia na. Phiamare ne thafodi keha naikno khiloau ka sugagna Lidia na ne toutonu ranghidi mala ke fakeli nagnafadi. Ke leghugna igne, phiamare ne jifla ka namono tuana.