Mae Khuru 11 - Buka Blahi Ka Cheke Holo

Mae Pita neke pulo Jerusalem

¹ Hatimare mae khuru nei keha naikno khiloau te au tongana ka Provins Judia, mare ne nomhidi naikno te theome Jiure ne fatutuani ni chekegna God na.

² Aonu kate thoke mae Pita Jerusalem, naikno khiloau te heta fara ka puhi te vahe na ne diꞌa tadi fara, naugna mana ne gnokro baludi naikno te theome vahere. Eghuteuna mare ne cheke eghu ka mana,

³ “Iagho neke tei ka sugadi naikno te theome Jiure nei theome tohi fagaglana teure! Tulao, iagho neke ima baludi!”

⁴ Aonu mae Pita ne funu toutonu ranghidi gobigna lepo teke edi re, ne cheke eghu,

⁵ “Iara au nekeu Jopa. Eghuteuna kaisei fata kate tarai teu iara na, iara neke filoni kaisei mifi. Iara filoni kaisei glepo jateula pohe biꞌo eghu neke soru mei ka maloa na. Fifilogna na jateula te loku naikno ka fati khukrure te farurhu te soru pari ra eghu ne ghilei mei namo ka iara.

⁶ Iara filo lao lamna ka pohe tuana ne filodi bosu nei thotoli nei mogo nei nanghaji eghu.

⁷ Iara ne nomhini kaisei naogla ne cheke eghu ka iara, ‘Ghema Pita, kegra haghe mala falelehe glepo are mala ima.’

⁸ “Nu iara ne cheke eghu, ‘Theo Lord! Iara theome tangomana te imadi glepo te thona ke ulumu nei theome naba mala ima teure.’

⁹ “Nu naogla te mei funu kligna na neke fapea fata cheke eghu ka iara, ‘Ghema, glepo teke vuavuha God te gae igre thosei chekeni iagho ne thona teuna!’

¹⁰ Thilo fata teke eni igne na, eghuteuna ke leghugna igne glepo tuana neke haghe ka maloa na.

¹¹ “Ka vido tuanala thilo mae ne mei ka suga aheva te au iara na. Kaisei mae gna Sisaria teke kuru meidi ka iara re.

¹² Eghuteuna Tharunga te Blahi na neke cheke ranghi ghau iara mala thosei mhaghu iara te tei baludi na. Eghume namno naikno khiloau Jopa igre neke teila balugu iara. Ghehati neke tei thoke ka sugagna mae Konilias na Sisaria.

¹³ Mana neke toutonu ranghi ghami ghehati eigna u engel teke filoni mana teke kegra teku ke lamna suga na. U engel na neke cheke eghu ka mana, ‘Iagho kurudi keha mae mala tei Jopa tali meini mae Simon, keha nanghagna na, mae Pita.

¹⁴ Mana ginauna na cheke ranghi nigho iagho. Glepo te chekedi mana re ginauna na fakarhi nigho nei tharaknamu tongana na.’

¹⁵ “Kate funu cheke iara na, u Tharunga te Blahi na ne soru mei ka mare jateula teke mei ka tahati ka fufunu gna ia eghu.

¹⁶ Eghuteuna iara neke ghatho fapuloni u cheke teke cheke eghu Lord ia, ‘Mae Jone neke apublahi ghami ghotilo kau khoꞌu kolho, nu iara ginauna na apublahi ghami ghotilo kau Tharunga te Blahi.’

¹⁷ Tutuani, iara neke filoni God na neke tusu lao Tharunga te Blahi na ka naikno te theome Jiure, jateula mana teke tusu mei ka tahati naikno te kulu fatutuani ni noda Lord Jisas Kraes. Eghume iara theome tangomana te lhotini nogna gloku God na.”

¹⁸ Kate nomhini naikno khiloau re igne, mare ne theome chekeni kaisei glepo ka mae Pita. Nu mare ne cheke fakelini God, ne cheke eghu, “Eghume, God ne snakredi naikno te theome Jiure mala figri ka mana mala karha.”

Khiloau Antiok

¹⁹ Kate faleheni mae Stivin hatimare mae Jiure, kmana naikno khiloau ne rikha Jerusalem. Keha naiknore rikha ne tei fabrahu ghilei thoke ka Provins Fonisia, ka moumolu Saeprus nei ka namono biꞌo Antiok. Jare mare ne toutonuni u Nonomho te Keli na ranghidi kolho naikno Jiure.

²⁰ Keha naikno khiloau ka igre, naiknodi Saeprus nei Saerini, mare jaola ne toutonu eigna mae Jisas Kraes ka naikno te theome Jiure Antiok.

²¹ Nolaghi nogna Lord na ne au baludi, eghuteuna naikno kmana Antiok ne fatutuani ne leghuni Lord.

²² Nonomho eigna igne ne tei thoke ka naikno khiloau gna Jerusalem. Aonu mare ne kuruni mae Banabas mala tei Antiok te mala toghodi.

^23-24 Mae Banabas gne kaisei mae keli nei Tharunga te Blahi na au balugna mana, eghuteuna mana ne biꞌo nogna fatutuani na. Kate posa mana ka namono na, mana ne gleale'a fara, naugna mana laseni God na la kulu fablahidihi naiknore. Mana ne cheke faheta ka naikno khiloaudi Antiok re mala thofno leghuni noda Lord. Eghuteuna ka narane tuana kmana naikno ne funu fatutuani ni Lord.

²⁵ Ke leghugna igne mae Banabas ne tei ka namono Tasis mala hironi mae Sol.

²⁶ Kate ludeni mae Sol na, mae Banabas ne tathaleini mana neke pulo Antiok. Mae Banabas ghe mae Sol ne au kaisei finogha thongana Antiok baludi naikno khiloau re. Eghuteuna phiamare ne farirhiudi kmana naikno jare. Namono ulu lahu te kilodi mae fanomhore u nangha naikno khiloau teu igne, Antiok.

²⁷ Ka narane tuanala keha mae profet re ne jifla Jerusalem ne tei thoke Antiok.

²⁸ Eghuteuna kaisei mae ka hatimare nanghagna na mae Agabus. Mana kegra haghe ne cheke ka nogna thotogho mae Tharunga te Blahi na ne cheke thakleni u nhigra behu nate thoke mei ginau heva heva kau nauthoglu gne. Eghuteuna igne ne thoke mei tutuani ka narane teke funei biꞌo teku mae King Klodius Rom.

²⁹ Aonu mae fanomhore ne kaisei gaoghatho ngala mala toghodi naikno khiloau te kmo'e ka glepo ka Provins Judia. Igne lelheghu ka ihei te tangomana te toghodi mare na.

³⁰ Mare ne salo keha sileni ne tusu lao ka mae Banabas ghe mae Sol, ne hata ne tei ka goro mae biꞌo te mala baubatu gna khiloau Jerusalem.