Luku 5 - Buka Blahi Ka Cheke Holo

Mae fanomho teke kulu kilodi mae Jisas

¹ Kaisei fata, mae Jisas kegra ka gratha Kholo Genesaret. Kmana naikno fara ne kafe khapru mei ka mana mala fanomho ka chekegna God.

² Eghuteuna mae Jisas ne filodi phia mola tugha haghe teu mare ka nusu na. Mae naugrare neke tei kokodi mala tei bea nodi fangnare.

³ Mae Jisas ne saghe ka kaisei mola, mola igne nogna mae Simon. Aonu mana ne toreni mae Simon mala tugha fararu mola na katha vido. Mae Jisas ne gnokro ne farirhiudi naikno teke khapru mei ka mana re.

⁴ Ke leghugna te toutonu te gnafa na, mana ne cheke eghu ka mae Simon, “Hata tei mola na ka mamhara gno mala koko soru nomi fangnare mala hata keha sasa.”

⁵ Mae Simon ne cheke eghu ka mana, “Velepuhi, gloku biꞌo tela edi ghehati bongi brahu gne nu braku kolho eghu. Nu iara na koko soru fangna gre naugna iagho ne cheke ranghi ghau iara.”

⁶ Aonu kate leghuni mare chekegna mae Jisas te koko soru hatimare nodi fangnare, mare ne maluaga fara, ne namo breku fangnare.

⁷ Hatimare ne kilodi mae kheradi te au ka keha mola na mala mei toghodi. Keha mola na mei ne fafofodu mare phia molare ka sasa ne fodu ne namo lodu.

⁸ Mae Simon Pita filoni igne ne pogho soru ke ulugna mae Jisas ne cheke eghu ka mana, “Lord, thosei mei namo ka iara, naugna iara naikno diꞌa.”

⁹ Mae Pita ne cheke eghu, naugna mana nei keha mae balugna mana re eghu ne jaglo nodi fara ka sasa te kmana te hata mare re.

¹⁰ Phia thugna mae Sebedi, mae Jemes ghe mae Jone, te loku balugna mana re jaola ne jaglo nodi fara. Mae Jisas ne cheke eghu ka mae Simon, “Simon, thosei mhaghu, funu gognaro iara na falalase ka iagho te mala salo mei naikno ka iara na.”

¹¹ Aonu mare pala famata phia nodi molare ne lisei soru nodi gobigna lepore ne leghuni mae Jisas.

Mae Jisas ne fakelini kaisei mae

¹² Kaisei fata, mae Jisas au neu ka kaisei namono te au kaisei mae te thubu. Mana thafru ka thubu biꞌo, khabru te kiloi leprosi. Kate filoni mae Jisas na, mana mei ne tuturupuku ke ulugna mae Jisas ne cheke eghu, “Mae funei, ne magnahagheni nga iagho nu, iagho tangomana teke fasalhu ghau iara na.”

¹³ Mae Jisas ne habo lao ka mana ne cheke eghu, “Uve, iara magnahaghei, ke salhu silagho!” Kau chekegna mae Jisas tuana, thubu ka thinigna mana re ghosei neke salhu fapulo.

¹⁴ Aonu mae Jisas ne cheke faheta eghu ka mana, “Thosei toutonu tafri eigna igne ka ihei nga. Nu iagho doglo tei ka mae pris mala kulu filoni mana thinimu na. Eghuteuna ke leghugna igne iagho tei eꞌei fafara leghuni unha te chekeni mae Moses ia, mala laseni naiknore teke la keli fapulohi iagho na.”

¹⁵ Nu neuba ngau, nonomho gna mae Jisas gne ne tei tongana heva heva ka namono te kmanare. Aonu kmana naikno fara ne mei fanomho ka chekegna mana re nei mala fakarhidi mana ka thua khabru te au ka thinidire.

¹⁶ Nu kmana fata langau mana tei thegna ka vido te nagou na mala tarai.

Mae Jisas ne fakelini kaisei mae te blughu

¹⁷ Kaisei narane mae Jisas farirhiudi naiknore ka suga na. Eghuteuna keha mae Farasi, nei jaola keha mae velepuhi eghu au neu jare. Mae igre mei funudi ka namono te gnafa ka Provins Galili, nei funudi ka Provins Judia, nei ka namono Jerusalem. God ne tusu lao nolaghi ka mae Jisas mala fakelidi naikno te fogra re.

¹⁸ Aonu keha naiknore pala ne mei ka sape kaisei mae te blughu. Hatimare fariuriu hatani mana mei lamna suga mala lilisei ke ulugna mae Jisas.

¹⁹ Nu hatimare ne theome tangomana te filoni heva te snagla te mala hatani mana te ruma lamna naugna ne kmana naikno fara. Aonu mare apla ne haghe ke tagru suga ne hohoro kaisei khora ghoghodogna te au mae Jisas na. Eghume mare ne haru sape na ka phukri ne farurhuni mana ne soru ke ulugna mae Jisas.

²⁰ Mae Jisas filoni nodi fatutuani mare na, ne cheke eghu ka mae te blughu na, “Ghema kheraguo, nakhibomu iagho re la hata fadeleihi iara.”

²¹ Aonu hatimare mae velepuhigna vetula nogna mae Moses, nei hatimare mae Farasi eghu re ne funu cheke eghu kau gaoghathodire, “Mae ihei si mae ignea? Mae igne cheke faparini God signe. Theo kaisei naikno te tangomana te mala hata fadelei nakhibo na, kaisei thegna God ngala!”

²² Nu mae Jisas lasedi ngala gaoghathodi mare re ne cheke eghu, “Naugna unha site au mei nafnata ghaoghatho igre ke lamnami ghotilo gnea?

²³ Thono bligi fara te cheke eghu na, ‘Thuguo, iara la hata fadeleihi nakhibomu iagho re teuna’, naugna theo kaisei naikno tangomana te filoni te au nolaghi iara te mala eni gloku igne na. Nu ninhigrana fara te cheke eghu na, ‘Kegra haghe, hata nou sape na tei teuna,’ naugna naikno na tangomana te filoni jame te au nolaghi iara te mala eni tuana na.

²⁴ Nu gognarona iara na falase arini ka ghotilo, iara mae teke mei funu ka God na au nolaghi ka nauthoglu igne te mala hata fadeleidi nakhibore!” Aonu, mae Jisas ne cheke eghu ka mae te blughu na, “Te chekeni iara ka iagho na, kegra haghe. Hata nou khifra na tei ka sugamu na!”

²⁵ Mana ghosei ne kegra haghe ke uludi naiknore ne hata nogna sape na ne tei ka nogna suga na, balu kilo fnaknoni God.

²⁶ Naiknore ne kafe jaglo nodi fara ne funu kilo fnaknoni God. Mare thono mhaghu nodi fara ne cheke eghu, “Icho idomi! Unha te filoni tahati gognarogne thono jaglo noda fara.”

Mae Jisas ne kiloi mae Livae

²⁷ Ke leghugna igne, mae Jisas tei ne filoni kaisei mae salo takis, nanghagna na mae Livae. Mana gnokro neu ka vido aheva te mala foli takis naiknore. Mae Jisas ne cheke eghu ka mana, “Ghema, mei leghu ghau iara, iagho mala nogu mae fanomho iara.”

²⁸ Aonu mae Livae ghosei ne lisei soru nogna gobigna lepore ne leghuni mae Jisas.

²⁹ Ke leghugna igne, mae Livae igne ne eni kaisei gaghamu biꞌo ranghini mae Jisas ka nogna suga na. Kmana naikno te diꞌa te salo takis nei keha naikno te diꞌa langau eghu ne khapru mala ghamu baludi phiamare.

³⁰ Nu keha mae Farasi nei keha mae kheradi mae velepuhigna vetula nogna mae Moses eghu ne thono buiburi fara ne cheke eghu ka nogna mae fanomho mae Jisas re, “Naugna unha site ghamu fodu ghotilo ka naikno te diꞌa mala salo takis nei keha naikno te diꞌa teu gnea?”

³¹ Mae Jisas ne cheke eghu ka mare, “Ghotilo laseni igne, naikno te kelire tirodi tei filoni mae dokta. Nu naikno te fogra re ngala te magnahaghei tei filoni mae dokta na.

³² Eghume iara gne theome mei mala kilodi naikno te doglohi ke ulugna God te mala leghu ghau iara, nu iara gne mei mala kilodi naikno te diꞌa gre mala tughu nagnafa.”

Mae Jisas ne cheke tughuni kaisei ghusna

³³ Keha naiknore ne cheke eghu ka mae Jisas, “Nogna fanomho mae Jone gre nei nodi fanomho mae Farasi gre tarai nei dangna eghu koba. Eghume, naugna unha si nou mae fanomho iagho gre te ghamu nei koꞌu teu kolho grea?”

³⁴ Mae Jisas ne cheke eghu ka mare, “Naikno te mei ka gaghamu tholaghi na mare au balugna mae te mala tolaghi na, eghume mare theome nabadi te dangna nei rofo teuna.

³⁵ Nu narane te mala tei kokodi mae te tolaghi na mae kheragnare ginauna na mei. Aonu ame tangomana nga mare te dangna na eghu. Jateula tuana eghu kate au teu iara agne baludi nogu mae fanomho gre, mare ginauna na theome dangna eghu.”

³⁶ Mae Jisas ne chekeni cheke naba igne ka mare, “Jaola theome naba tahati te hata nabreku pohe majaghani na te susuki fodu ka khora pohe te tiatifa na. Te eghu tahati na, tahati na fadidiꞌa kolho pohe majaghani na, eghuteuna nabreku pohe majaghani tuana theome nanaba ka pohe te tiatifa na.

³⁷ Kehana teuna tahati theome tangomana totoho waen majaghani na kau duku guli te tiatifa na. Naugna kate lao te raha u waen majaghani tuana na duku guli tiatifa tuana ginauna poha. Eghuteuna waen tuana ginauna na thofa kolho.

³⁸ Eghume tahati totoho waen majaghani na kau duku te majaghani.

³⁹ Mae ihei teke koꞌu koba waen tiatifa na mana theome magnahaghei te ko'uni waen majaghani na. Naugna mana ne cheke eghu, ‘U waen tiatifa nga te keli na.’ ”