Luku 3 - Buka Blahi Ka Cheke Holo

Nogna farirhiu mae Jone Apublahi

¹ Ka fabotho glima finogha gna te King biꞌo mae Taebirias na mae igre neke funei ke parigna mana. Mae Paelat neke funei ka Provins Judia. Mae Herod Antipas neke funei ka Provins Galili. Mae Filip, mae tahigna mae Herod na, neke funei ka phei nohi Ituria ghe Trakonitis. Mae Lisanias neke funei ka Provins Abileni.

² Eghuteuna mae Anas ghe mae Kaefas gre teke nodi mae pris biꞌo hatimare mae Jiu. Uve, kau narane tuana God neke cheke ka mae Jone thugna mae Sekaraea kate au teu mana ke lamnagna namono nagou na.

³ Mae Jone neke tei tongana ke lamnadi namono te au faligohoni Kho'u Jordan na ne toutonu ka naiknore. Mana ne cheke eghu, “Ghotilo lilisei puhimi te diꞌare, nu mala apublahi eghu, eghuteuna God ginauna hata fadeleidi nakhibomi ghotilo re.”

⁴ Igne ne horoghoto ka unha teke rioriso eghu mae profet Isaia tifa ia, “Kaisei mae ne poapola fabiꞌo ke lamnagna u namono nagou na, na cheke eghu, ‘Tarabana nabrou gna Lord, eꞌei fakeli u nabrou mala tei gna mana!

⁵ Gloha te gnafare ke fafofodu, gukhu te gnafa nei thogele teure ke kafe fasasare. Eghuteuna nabrou te peopeko tafri re ke fadodoglo, eghuteuna nabrou te poipogili tafri re ke fasasalhu fakeli.

⁶ Naikno te gnafa ka nauthoglu igne ginauna na filoni God te mei fakarhidi nogna naiknore.’ ”

⁷ Kmana naikno fara ne mei ka mae Jone mala apublahi. Mae Jone ne cheke eghu ka naikno te mei apublahi re, “Ghotilo jateula pholi eghu! Naugna ghotilo lase chaichaghi fara! Ihei teke cheke ranghi ghami ghotilo te mala mei apublahi na, eghuteuna mala rikhani teu diꞌatagna God tela namo meihi na?

⁸ Koko si ghotilo puhimi te diꞌare mala jateula sisi te keli eghu ka nakarhami are fagaglana gna u nakarha majaghani na. Thosei chekeni koba ghotilo ne doglohi ke ulugna God naugna ne vikegna mae Ebraham themi teuna. Naugna te chekeni iara ka ghotilo na, God na tangomana te hohoro vikegna mae Ebraham ka thina te filodi ghotilo igre!

⁹ Nu gognaro God tarabana fate naikno jateula kaisei mae te au khila te mala kato soru gaju na la kulu auhi ka glathigna na. Eghume, mana ginauna na kato soru u gaju te theo sisi igre mala koko lao ka khaꞌaghi.”

¹⁰ Naiknore ne ghusna eghu ka mae Jone, “Te eghu na, unha gne nate eni ghehati ginauna?”

¹¹ Mana ne cheke eghu ka mare, “Mae ihei ka ghotilo te au phei nogna phoko na tufa kehana ka mae ihei te theo kaisei nogna na. Mae ihei te au ghegna gano na tufa ka mae te theo kaisei ghegna gano na eghu.”

¹² Keha mae ka hatimare, mae te diꞌa te mala salo takis re ne mei apublahi langau. Mare ne ghusna eghu ka mae Jone, “Velepuhi, unha nate eni ghehati na?”

¹³ Mae Jone ne cheke eghu ka mare, “Thosei salo takis ka naiknore me sala'uni unha te magnahaghei mae gavman na.”

¹⁴ Keha mae soldia langau ne ghusna eghu ka mana, “Ghehati ba? Unha nate eni ghehati na?” Mana ne cheke eghu ka mare, “Thosei chaghi nei huhurudi eghu naiknore mala tusu ari sileni ka ghotilo. Nu gleꞌani ngala nomi vido taba na.”

¹⁵ Naiknore neke kafe rouronuni mae Kraes te mala mei na. Mare ne funu ghaoghatho eghu, “Glahula me mae Jone gne ngala mae Kraes na.”

¹⁶ Nu mae Jone ne cheke eghu ka mare, “Iara apublahi ghami ghotilo ka khoꞌu kolho, nu kaisei mae nate mei ke leghugu iara na, mana mae ke biꞌogu iarai. Iara theome nabagu te rurutha nogna sadol mana re. Mana ginauna na faꞌapublahi ghami ghotilo kau Tharunga te Blahi nei ka khaꞌaghi eghu.

¹⁷ Mana ginauna fatedi naikno te gnafare. Tutuani, mana ginauna vavahi iheire te doglore ka iheire te theome doglore. Jateula mae ihei te fota gano te keli ka gano te diꞌara eghu. Te kelire mala lilisei ka nogna suga na. Te diꞌare mala koko lao ka khaꞌaghi te karha fabrahu na.”

¹⁸ Kmana nafnata phoge te edi mae Jone kate toutonuni u Nonomho te Keli na ka naikno igre. Mana neke cheke faheta mala tughu mare nagnafadire.

¹⁹ Jaola mae Jone neke cheke faheaheta fara ka mae King Herod Antipas naugna mae Herod neke tolaghi blau ka Herodias, khetogna mae Filip mae tahigna thegna na. Eghuteuna mae Herod jaola neke edi kmana glepo te diꞌa fara tulao.

²⁰ Aonu ke leghugna igne, kaisei glepo te diꞌa tulao fara teke eni mae Herod na, mana ne fasosoloni mae Jone.

Mae Jone ne faꞌapublahini mae Jisas

²¹ Kaisei fata, ame sosolo nga mae Jone Apublahi teku na, mae Jone ne faꞌapublahidi naiknore. Mae Jisas ne mei apublahi langau ka mana. Ka vido te tarai mae Jisas na, maloa na ne thora,

²² eghuteuna Tharunga te Blahi na ne soru mei ke kligna gna mana jateula balhu neu. Kaisei naogla ne cheke mei funu kligna ne cheke eghu ka mana, “Iagho thofno mae Thugu iara. Iara thofno namha nigho nei thofno gleꞌa nigho eghu.”

Susurei eigna vikegna mae Jisas

²³ Jame kate thokeni tolufulu finogha gna na, mae Jisas ne funu farirhiudi naiknore. Eghuteuna gaoghathodi naiknore mae Jisas gne neke thugna mae Josep. Mae Josep gne thugna mae Heli.

²⁴ Mae Heli gne neke thugna mae Masat. Mae Masat gne neke thugna mae Livae. Mae Livae gne neke thugna mae Melkae. Mae Melkae gne neke thugna mae Janai. Mae Janai gne neke thugna mae Josep.

²⁵ Mae Josep gne neke thugna mae Matatias. Mae Matatias gne neke thugna mae Amos. Mae Amos gne neke thugna mae Nahum. Mae Nahum gne neke thugna mae Eslae. Mae Eslae gne neke thugna mae Nagae.

²⁶ Mae Nagae gne neke thugna mae Meata. Mae Meata gne neke thugna mae Matatias. Mae Matatias gne neke thugna mae Semei. Mae Semei gne neke thugna mae Josek. Mae Josek gne neke thugna mae Joda.

²⁷ Mae Joda gne neke thugna mae Joanan. Mae Joanan gne neke thugna mae Risa. Mae Risa gne neke thugna mae Serubabel. Mae Serubabel gne neke thugna mae Sialtiel. Mae Sialtiel gne neke thugna mae Nerae.

²⁸ Mae Nerae gne neke thugna mae Melkae. Mae Melkae gne neke thugna mae Adae. Mae Adae gne neke thugna mae Kosam. Mae Kosam gne neke thugna mae Elmadam. Mae Elmadam gne neke thugna mae Ere.

²⁹ Mae Ere gne neke thugna mae Josua. Mae Josua gne neke thugna mae Eliesa. Mae Eliesa gne neke thugna mae Jorim. Mae Jorim gne neke thugna mae Masat. Mae Masat gne neke thugna mae Livae.

³⁰ Mae Livae gne neke thugna mae Simion. Mae Simion gne neke thugna mae Juda. Mae Juda gne neke thugna mae Josep. Mae Josep gne neke thugna mae Jonam. Mae Jonam gne neke thugna mae Eliakim.

³¹ Mae Eliakim gne neke thugna mae Melea. Mae Melea gne neke thugna mae Mena. Mae Mena gne neke thugna mae Matata. Mae Matata gne neke thugna mae Natan. Mae Natan gne neke thugna mae Devet.

³² Mae Devet gne neke thugna mae Jesi. Mae Jesi gne neke thugna mae Obed. Mae Obed gne neke thugna mae Boas. Mae Boas gne neke thugna mae Salmon. Mae Salmon gne neke thugna mae Nason.

³³ Mae Nason gne neke thugna mae Aminadab. Mae Aminadab gne neke thugna mae Admin. Mae Admin gne neke thugna mae Arni. Mae Arni gne neke thugna mae Hesron. Mae Hesron gne neke thugna mae Peres. Mae Peres gne neke thugna mae Juda.

³⁴ Mae Juda gne neke thugna mae Jekop. Mae Jekop gne neke thugna mae Isak. Mae Isak gne neke thugna mae Ebraham. Mae Ebraham gne neke thugna mae Tera. Mae Tera gne neke thugna mae Naho.

³⁵ Mae Naho gne neke thugna mae Seru. Mae Seru gne neke thugna mae Riu. Mae Riu gne neke thugna mae Pela. Mae Pela gne neke thugna mae Eba. Mae Eba gne neke thugna mae Sela.

³⁶ Mae Sela gne neke thugna mae Kainan. Mae Kainan gne neke thugna mae Afasad. Mae Afasad gne neke thugna mae Sem. Mae Sem gne neke thugna mae Noa. Mae Noa gne neke thugna mae Lamek.

³⁷ Mae Lamek gne neke thugna mae Metusela. Mae Metusela gne neke thugna mae Inok. Mae Inok gne neke thugna mae Jared. Mae Jared gne neke thugna mae Mahalali. Mae Mahalali gne neke thugna mae Kainan.

³⁸ Mae Kainan gne neke thugna mae Enos. Mae Enos gne neke thugna mae Seti. Mae Seti gne neke thugna mae Adam. Mae Adam gne neke thugna God.