Luku 22 - Buka Blahi Ka Cheke Holo

Ghaoghaho mala faleheni mae Jisas

¹ U Gaghamu Bret te Theo Isi gna te kiloi mare “Gaghamu Ghasa-Polho” igne la namohi.

² Kau narane tuana hatimare mae pris ulu, nei hatimare mae velepuhigna vetula nogna mae Moses eghu ne hiro phoge mala faleheni mae Jisas. Nu mare ne mhaghudi naiknore, glahula eni naiknore kaisei magra biꞌo.

Mae Judas ne majorani mae Jisas

³ Kaisei mae ka hatimare nabotho phei nogna mae fanomho mae Jisas igre nanghagna mae Judas Iskariot. Mae Satan ne au ka mae Judas.

⁴ Eghuteuna mana ne tei ka hatimare mae pris ulu, nei ka hatimare keha mae soldia eghu te reireghi gna Sugablahi na. Mana ne cheke ka mare eigna puhi te mala snakreni mae Jisas ka mare na.

⁵ Hatimare keli tadi fara, ne nhaꞌa cheke te mala tusu lao keha sileni ka mae Judas te mala eni tuana.

⁶ Mae Judas ne kaisei gaoghatho ka mare ne ofoni narane aheva nate snakreni mae Jisas kate iho teu naiknore.

Mae Jisas ne tarabana malagna Gaghamu Ghasa-Polho na

⁷ Narane gna Bret te Theo Isi gna igne ne thokei mei. Igne narane te mala falelehe sipu te fafara malagna Gaghamu Ghasa-Polho na.

⁸ Mae Jisas ne cheke eghu ka mae Pita ghe mae Jone, “Tei ghopa mala tarabana Gaghamu Ghasa-Polho te mala ghamu tahati na.”

⁹ Phiamare ne ghusna eghu ka mae Jisas, “Aheva te magnahagheni iagho te mala tarabana ghepa na?”

¹⁰ Mae Jisas ne cheke eghu ka phiamare, “Kate posa lao ghopa ka namono biꞌo na, ghopa ginauna filoni kaisei mae te pala khoꞌu. Leghuni mana tei ka suga te ruma mana na.

¹¹ Cheke eghu ka mae te khotogna suga na, ‘Mae velepuhi na ne cheke eghu mei ka iagho: Aheva chogho te mala ima iara Gaghamu Ghasa-Polho na baludi nogu mae fanomhore?’

¹² Mana ginauna falalase ka ghopa kaisei chogho biꞌo te au ke tagru suga, jare tela kulu auhi gobigna lepore. Jare te mala tarabana ghopa na.”

¹³ Aonu, mae Pita ghe mae Jone tei ne filodi gobigna lepore la kulu edihi jateula teke chekedi mae Jisas re neu. Jare phiamare te tarabana Gaghamu Ghasa-Polho na.

Narane teke fufunu gna ima blahi

¹⁴ Kate thokeni vido narane mala ima na, mae Jisas ne gnokro ka tevo na baludi nogna mae khurure.

¹⁵ Mana ne cheke eghu ka mare, “Iara magnahaghei fara te ima fodu balumi ghotilo u Gaghamu Ghasa-Polho igne ame au papara nga iara me lehe eghu.

¹⁶ Ke leghugna igne iara ginauna theome imani Gaghamu Ghasa-Polho igne ghilei thokeni narane nate horoghoto gaoghathogna narane te funei frunidi God nogna naiknore.”

¹⁷ Eghuteuna, mae Jisas ne hata kaisei hinao te fodu ka waen ne cheke fakelini ka God. Mana ne cheke eghu ka mae fanomhore, “Ghotilo, hata hinao igne mala kafe koꞌu tagna.

¹⁸ Te chekeni iara ka ghotilo na, iara ginauna theome ke ko'uni kholo waen igne ghilei thoke mei narane nate ko'uni iara waen majaghani na ka nogna nauthoglu majaghani God.”

¹⁹ Ke leghugna igne, mana hata bret na, ne cheke fakelini ka God, mana piepike ne tufa ka mae fanomhore. Aonu mana ne cheke eghu, “Igne thinigu iara na, iara tusu ari ka ghotilo mala fakarha ghami ghotilo. Ima igne mala ghatho fapulo ghau iara.”

²⁰ Ke leghugna te gnafa ima na, mana jaola neke hata hinao na, ne cheke eghu, “Waen igne fagaglana gna nhaꞌa cheke majaghani teke eni God ka nogna naiknore. Eghume nhaꞌa cheke majaghani igne fufunu ka dadaragu iara te thofa te mala fakarhi ghami ghotilo gnafa.”

²¹ Mae Jisas jaola ne cheke eghu, “Kaisei mae ka ghotilo ginauna majora ghau iara. Mana gnokrou ngala agne balugu iara.

²² Iara mae teke mei funu ka God na ginauna jateula teke magnahagheni God na eghu mala lehe. Nu diꞌa fara ranghini mae ihei nate majora ghau iara tuana!”

²³ Ka cheke mana igne mae khurure ne funu ghusna fari thedi mala laseni mae ihei ka mare te eni igne.

Farirhiu eigna mae baubatu te keli

²⁴ Mae khurure ne funu fapholai eigna mae ihei nate mae biꞌo lahu ka mare na.

²⁵ Nu mae Jisas ne cheke eghu ka mare, “Mae funei ka nauthoglu igne mare au nodi nolaghi te mala funei frunidi nodi naiknore. Eghuteuna mae te au nolaghi ke klignadi naiknore, kilodi ‘Mae biꞌo’.

²⁶ Nu ghotilo na theome mala jateula tuana eghu. Mae ihei te mae biꞌo lahu ka ghotilo na, mana mala jateula kaisei mae sitei eghu kolho, eghuteuna mae ihei te mae baubatu na mana mala mae gloku.

²⁷ Ba, mae ihei te mae biꞌo ka ghotilo na, mae te gnokro ghamu teu igne, ba mae te hata gano te mei ka tevo gne? Ghotilo gaoghathomi na mae te gnokro ka tevo na igne ne mae biꞌo eghu. Nu iara theome jateula tuana eghu. Tutuani, iara jateula kaisei mae gloku eghu fari hoteimi ghotilo mala togho ghami ghotilo.

²⁸ Ghotilo mae igre au fabrahu hi balugu iara ke lamnadi kmana nafnata vido te ninhigrana.

²⁹ Eghume iara gognarona tusu ari nolaghi ka ghotilo mala funei frunidi naikno gre balugu iara, jateula mae Mama teke tusu mei nolaghi igne ka iara.

³⁰ Eghuteuna ghotilo ginauna mala gnokro balugu iara ka tevo na mala ghamu nei koꞌu eghu ka nogu nauthoglu majaghani iara na. Ghotilo ginauna na gnokro ka sape nafnakno te mala fatedi nabotho phei vikegna Israel.”

Mae Jisas ne kulu cheke thakleni u thufu mae Pita na

³¹ Mae Jisas ne cheke eghu, “Ghema Simon, God ginauna na snakreni mae Satan mala fariuriu ghami ghotilo gnafa mala laseni mae ihei te maku nogna fatutuani na ka ghotilo.

³² Nu iara tarai eimu iagho mala theome blogho iagho ka nou fatutuani na. Eghuteuna kate figri mei iagho ka iara na, iagho ke toghodi mae kheramu are mala ke heta fapulo mare nodi fatutuani na ka iara.”

³³ Nu mae Pita ne cheke eghu ka mae Jisas, “Lord, iara la tarabanahi te mala tei balumu iagho ka suga sosolo na, nei mala lehe balumu iagho!”

³⁴ Mae Jisas ne cheke eghu ka mae Pita, “Iara na cheke ari ka iagho, Pita. Iagho ginau bongi na na theome tanhi ngau khokorako na, na thilo fata chekeni ne theome lase ghau iara teuna.”

Tarabana malagna puhi biꞌo

³⁵ Mae Jisas ne cheke eghu ka mae khurure, “Kate kuru fajifla ghami iara tifa na ghotilo neke theome hata balumi sileni, gloi, ba sadol. Ba, ghotilo neke magnahaghei glepo sia?” Hatimare ne cheke eghu ka mana, “Theo!”

³⁶ Mae Jisas ne cheke eghu ka mare, “Nu gognaro na, mae ihei ka ghotilo te au nogna sileni, ba gloi na hata balugna. Mae ihei ka ghotilo te theo nogna naflahi na sabiri nogna pohe brahu na mala foli kaisei nogna naflahi.

³⁷ Eghuteuna te chekeni iara ka ghotilo na, grioriso te blahi na cheke eghu, ‘Mana na snakreni thegna mala lehe baludi mae te glalama fara re’. Cheke igne na tutuani fara ka iara nei unha teke risoni mae profet eigu iara tifa ia la horoghoto fara gognaro gne.”

³⁸ Aonu mae khurure ne cheke eghu ka mae Jisas, “Filo mei, Lord, igre phei naflahire!” Mana ne cheke eghu ka mare, “Tuana la nabahi.”

Mae Jisas ne tei tarai ka thogele na

³⁹ Mae Jisas gne tei koba ka Thogele Gaju Olivi. Eghuteuna ka bongi igne, mae Jisas jifla ka namono biꞌo na ne tei jare. Nogna mae fanomho mana re ne tei balugna mana.

⁴⁰ Kate thoke jare na mae Jisas ne cheke eghu ka nogna mae fanomhore, “Tarai ka God mala theome khale ghami fariuriu.”

⁴¹ Eghuteuna mana ne tei fagaꞌu katha vido ka mare. Mana tuturupuku soru pari ne tarai.

⁴² Mana ne cheke eghu, “Mama, jame te magnahaghei iagho na, iara tore nigho te mala hata fadelei kakhabruana biꞌo jateula hinao te fodu ka waen te raha teu ka iara igne. Nu eni unha te magnahagheni iagho themu na, thosei leghui unha te magnahaghei iara na.”

⁴³ Eghuteuna kaisei engel funugna kligna mei ne thakle ka mana mala toghoni mana.

⁴⁴ Mae Jisas ne tarai faheta fara naugna mana ne diꞌanagnafa fara. Eghuteuna buibuhigna mana re ne jateu dadara neu, ne khoko soru ka glose na.

⁴⁵ Ke leghugna te gnafa tharai na, mana kegra haghe neke pulo mei ka nogna mae fanomhore. Mare thuru iho neu, naugna mare babaꞌo fara ka diꞌanagnafa.

⁴⁶ Aonu mae Jisas mei ne cheke eghu ka mare, “Thuru unha si ghotilo ia? Dofra haghe mala tarai, mala theome khale ghami fariuriu.”

Mare mei ne lokini mae Jisas

⁴⁷ Ka vido cheke teu mae Jisas na, kaisei tothoghei naikno ne posa mei. Mae Judas, kaisei mae ka hatimare nabotho phei mae fanomhore, baubatudi mare ne mei. Eghuteuna mae Judas lao rhegna mae Jisas ne gnanghoni mana.

⁴⁸ Nu mae Jisas ne cheke eghu ka mae Judas, “Ghema Judas, iagho gnangho ghau iara mae teke mei funu ka God gne mala snakre lao ghau iara ka khamedi nogu mae naoka iara gre sia?”

⁴⁹ Nogna mae fanomho Jisas re filoni unha te eni mare ka mana igne ne cheke eghu, “Funei, tahati na magra sia? Ghehati au keha naflahi mala magra!”

⁵⁰ Kaisei mae ka mae fanomhore ne hata nogna naflahi na ne kusu koko khuli fei nhetagna nogna mae gloku mae pris biꞌo na.

⁵¹ Mae Jisas ne cheke eghu ka mana, “Ghema, kelihi!” Mae Jisas habo lao ka khuligna mae gloku igne neke keli fapulo.

⁵² Mae iheire te mei lokini mae Jisas igre neke hatimare mae pris ulu, hatimare mae soldia te mala reireghi gna Sugablahi na nei keha mae biꞌo langau eghu. Mae Jisas ne cheke eghu ka mare, “Ba, ghotilo ne mae blau iara eghu gaoghathomi na mei agne mala loki ghau iara balu naflahi nei nanala eghu sia?

⁵³ Leuleghu narane na iara au balumi ghotilo fabrahu ke lamna Sugablahi, eghuteuna ghotilo theome mei loki ghau ngala iara. Nu igne ngala nomi narane ghotilo te mala loku ka nogna nolaghi Satan, mae ihei te funei frunini gromno na.”

Mae Pita ne thufu eigna mae Jisas

⁵⁴ Aonu mare ne lokini mae Jisas hatani mana ne tei ka sugagna mae pris biꞌo na. Mae Pita ne tei ke leghudi mare, nu mana theome tei namo ka mare.

⁵⁵ Hatimare mae soldiare ne eni kaisei khaꞌaghi ke kosi ka glalabagna suga na. Aonu mae Pita gnokro peha neu baludi mare.

⁵⁶ Kaisei gaꞌase gloku ne filoni mae Pita te gnokro teu kate phae na. Naꞌa ne efra tutu ka mana, ne cheke eghu, “Mae igne jaola kaisei mae balugna mae Jisas!”

⁵⁷ Mae Pita ne thufu ne cheke eghu, “Gaꞌase, iara iho noguni mae tuana.”

⁵⁸ Theome raugha ke leghugna igne, kaisei mae ne filoni mae Pita ne cheke eghu, “Ghema, iagho gne kaisei mae baludi la mare.” Nu mae Pita ne cheke eghu, “Ghema, iara theo!”

⁵⁹ Raugha lao katha vido ke leghugna tuana, kaisei mae langau ne heta ghegna fara, ne cheke eghu, “Tutuani fara, mae igne kaisei mae balugna mae Jisas. Phiamare kafe mae di Galili!”

⁶⁰ Mae Pita ne cheke eghu, “Ghema, iara theome laseni unha te chekeni iagho gne!” Kate cheke teu mae Pita na khokorako na ne taitanhi.

⁶¹ Ka vido tuana la mae Jisas ne figri ne filo lao ka mae Pita. Aonu ka vido tuana mae Pita neke ghatho fapuloni unha teke cheke eghu mae Jisas na, “Iagho ginau bongi na na theome tanhi ngau khokorako na, na thilo fata chekeni ne theome lase ghau iara teuna.”

⁶² Aonu mae Pita jifla kosi ne tanhi ne srudu balu diꞌanagnafa.

Mae soldiare ne maꞌeni mae Jisas

⁶³ Keha mae soldia te reireghini mae Jisas igre, ne funu maꞌeni mana ne cheke fapari mana nei purini mana.

⁶⁴ Eghuteuna mare ne pipiha tathagna mae Jisas re. Aonu mare ne ghusna eghu ka mana, “Ghema profet, gognarona iagho cheke ka ghehati. Mae ihei site tapo nigho iagho ia?”

⁶⁵ Mare chekedi kmana glepo te diꞌa fara ka mana.

Mae Jisas ke uludi mae Paelat ghe mae King Herod

⁶⁶ Hamerane ghagra pasa, hatimare goro mae biꞌo, nei hatimare mae pris ulu, nei hatimare mae velepuhigna vetula nogna mae Moses eghu igre ne salofodu mei. Eghuteuna mare hatani mae Jisas ne mei fakegrani mana ke uludi mare kau vido te mala fate na.

⁶⁷ Mare ne cheke eghu ka mae Jisas, “Cheke sagho ka ghehati. Iagho mae Kraes sia?” Mae Jisas ne cheke eghu ka mare, “Jame chekeni iara ka ghotilo ne mae Kraes teuna, ghotilo theome tangomana te fatutuani ghau iara na.

⁶⁸ Eghuteuna jame ghusna ghami iara na, ghotilo theome tangomana te cheke tughu na.

⁶⁹ Nu funu gognarogne, iara mae teke mei funu ka God na ginauna gnokro fei nhetagna God mae te nolaghi.”

⁷⁰ Mare ne kafe cheke eghu ka mae Jisas, “Icho idomi! Iagho si Thugna God na ia?” Mae Jisas ne cheke eghu ka mare, “Uve, ghotilo doglou ngala kate chekeni ghotilo ne iara teuna.”

⁷¹ Mare ne cheke eghu fari thedi, “Mala unha si tahati te hironi kaisei naikno te mala toutonu eigna mana gnea? Tahati la nomhinihi theda unha te chekeni mana eigna thegna na!”