Luku 2 - Buka Blahi Ka Cheke Holo

Karhagna mae Jisas

¹ Ka narane tuana, mae Funei Sisa Aghastus gna Rom na ne eni kaisei vetula mala riso nanghadi naikno te gnafa te au ka provins fateo te funei frunidi mana re.

² Igne ngala riso nangha ulu lahu teke eni kate gavana teku mae Kurenas ka Provins Siria.

³ Aonu naikno te gnafare ne tei ka nodi namono thedire mala rioriso nangha.

⁴ Mae Josep ghe khetogna ne jifla Nasaret kaisei namono ka Provins Galili ne tei Betlehem ka Provins Judia. Namono igne namonogna mae King Devet tifa. Mae Josep ne tei jare naugna mana kaisei mae ka vikegna mae King Devet.

⁵ Mae Josep ne tei rioriso nangha repa Meri naugna naꞌa paru mala tolaghi ka mana. Meri gognaro na la buklahi.

⁶ Kate au teu Josep ghe Meri Betlehem na, narane te mala karhagna sua na la namohi.

⁷ Ka suga binaboli na, repa theo vido keli mala thurudire. Aonu Meri ne fakarha thugna nalhaꞌu ulu lahu na. Naꞌa ne pipiha ka pohe na, ne fatuthuruni ka sape mala faghamu buluka na.

Mae greireghi sipure ne nomhi eigna mae Jisas

⁸ Ka bongi tuana, keha mae grereighi sipu au neu jare ke kosigna namono na fiofilodi neu tothoghei sipure.

⁹ Kaisei engel nogna Lord megei nga kegra neu ke uludi mare, nei nogna nolaghi biꞌo Lord na ne sigla faligohodi mare. Eghuteuna hatimare ne mhaghu nodi fara.

¹⁰ Engel na ne cheke eghu ka mare, “Thosei mhaghu! Naugna iara hata mei keha nonomho te keli ka ghotilo. Naikno te gnafare ginauna na keli tadi fara ka nonomho igne.

¹¹ Ka bongi gognaro gne kaisei mae te mala fakarha ghami ghotilo ka nakhibo na la karhahi ka namonogna mae King Devet. Mana mae Kraes noda mae funei tahati.

¹² Ghotilo ginauna tei jare mala filoni kaisei fagaglana: ghotilo ginauna filoni u sua gegeꞌe te pipiha teu ka nabreku pohe na te fatuthuru teu ka sape te mala faghamu buluka na.”

¹³ Eghuteuna kaisei tothoghei engel gna kligna ghosei ne mei ne salo fodu balugna engel au tekeu jare na ne kafe koje kilo fnaknoni God, ne cheke eghu,

¹⁴ “Kilo fnaknoni God ka maloa kligna nei pharikeli na au agne ka nauthoglu gne baludi naikno te keli tagnadi God gre.”

¹⁵ Ka teke pulo engel re kligna na, mae grereighi sipure ne cheke eghu fari thedi, “Tahati na tei Betlehem, mala filodi glepo igre. Tahati na filoni glepo te cheke ranghi ghita Lord igne.”

¹⁶ Aonu mae grereighi sipure ghosei ne tei ludedi Meri ghe Josep, eghuteuna mare filoni sua gegeꞌe te thuru teu ka sape mala ghamu buluka na.

¹⁷ Kate filoni sua gegeꞌe na mare ne toutonu ranghidi Meri ghe Josep unha glepo teke chekeni engel eigna sua na.

¹⁸ Eghuteuna mare te gnafa na nomhini igne ne jaglo nodi fara ka unha te toutonu mae greireghi sipure.

¹⁹ Meri ne ghatho fabrahudi glepo igre ka nagnafagna na.

²⁰ Mae greireghi sipure filo dedi gobigna lepo igre ne nanaba fara ka unha teke cheke ranghidi engelre. Aonu, mare neke pulo ka nodi sipure balu koje ne kilo fnaknoni God eidi unha glepo teke nomhidi nei filodi teku mare re.

Narane mare teke fanganghani mae Jisas

²¹ Kate kaisei wik gnahi sua na, mare ne tohi fagaglanani mana. Eghuteuna mare ne kiloni mana mae Jisas. U nangha teke chekeni engel kani teke theome bukla nga tekeu Meri na.

Meri ghe Josep hatani mae Jisas ne tei ka Sugablahi na

²² Kate thokei narane te mala leghuni nogna vetula mae Moses eigna te mala gae ke leghugna teke karha sua na, Meri ghe mae Josep ne tei Jerusalem mala eni igne. Aonu repa hata sua na ne tusu ranghini Lord.

²³ Te chekeni ka nogna vetula God na cheke eghu agne, “Sua nalhaꞌu ulu lahu re mala tusu ranghini God.”

²⁴ Josep ghe Meri jaola ne tei mala fafara jateula te eghu ka nogna vetula God na, “Ghotilo hata mei phei balhu ba phei thukmu.”

²⁵ Kaisei mae biꞌo te kiloi Simion, mana jaola au Jerusalem. Mana kaisei mae doglo fara nakarhagna na ke ulugna God nei tarai koba eghu. Mana ofoni u narane God nate fakarhadi naiknodi Israel re. Eghuteuna u Tharunga te Blahi na ne au balugna mana.

²⁶ Mae Tharunga te Blahi na neke chekehi eghu ka mae Simion, “Iagho ginauna na theome leheu ghilei filoni mae Mesia teke kulu nhaꞌa cheke God na.”

²⁷ Eghuteuna u Tharunga te Blahi na batuni mae Simion ne tei ka Sugablahi na. Aonu, Meri ghe Josep hata mae sua Jisas na ne tei ka Sugablahi na mala eni unha te chekeni ka nogna vetula God na.

²⁸ Mae Simion ludedi, mana pala haghe sua na ne cheke fakelini God,

²⁹ “Lord, gognaro nou nhaꞌa cheke iagho na la horoghoto tutuani, eghume iagho tangomana te snakre teini nou mae gloku na mala au mana kau pharikeli.

³⁰ Naugna mae teke vavahi iagho mala fakarhidi naikno te gnafare, gognaro iara la thofno filonihi ka tathagu na.

³¹ Iagho neke tarabanani mana mala laseni mana naikno te gnafare.

³² Mana jateula kaisei juta eghu mala faphaedi naikno te theome mae Jiure mala filo glani nigho mare. Mana ginauna jaola hata mei nafnakno ka nou naikno Israel.”

³³ Idogna kmagna eghu mae Jisas re ne jaglo nodi ka unha te chekedi mae Simion eigna sua igne.

³⁴ Eghuteuna mae Simion ne fablahidi retilo ne cheke eghu ka Meri, “U sua igne God neke vahini mala fakarhidi kmana naiknodi Israel te au ka nakhibo, nei mana na theome fakarhidi kmana naiknodi Israel iheire te fahaehaghedi thedi. Naugna mana ginauna na kaisei fagaglana te mei vuhagna ka God. Kmana naikno tirodini mana.

³⁵ Naugna mana, ginauna na falalase gaoghatho teke poru ka naikno te gnafare. Eghuteuna iagho themu ginauna na diꞌanagnafamu fara ka unha nate edi ginau re.”

Anna ne filoni mae Jisas

³⁶ Kaisei khaekave nanghagna na Anna, naꞌa kaisei thau profet au jare ka Sugablahi na. Anna gne thugna mae Fanuel nei vikegna mae Asa. Kani thau majaghani gna tekeu na naꞌa neke tolaghi nabagna fitu finogha kolho neke lehe khetogna na.

³⁷ Eghuteuna ke leghugna te lehe khetogna na, naꞌa ne au kolho nabagna nhanasalei fati finogha. Anna gne theome tei kokoni u nogna Sugablahi God na nu bongi narane na naꞌa au kolho jare mala dangna nei tarai eghu.

³⁸ Uve, kau narane te cheke teu ngala mae Simion tuana, naꞌa kegra neu jare ne funu cheke fakelini God. Naꞌa jaola toutonu eigna mae Jisas ka iheire te kafe ofoni teu God te mala mei fakarhidi naiknodi Israel.

Ke pulo Nasaret

³⁹ Ke leghugna tela gnafahi unha te chekeni eigna sua igne ka vetula na, Josep ghe Meri neke pulo Nasaret ka Provins Galili ka nodi thofno namono na.

⁴⁰ Mae sua ikoi na ne funu biꞌo haghe ne lalase fara. Eghuteuna God ne fablahini mana fabrahu.

Mae Jisas ke lamnagna Sugablahi

⁴¹ Leuleghu finogha na idogna kmagna mae Jisas re tei koba Jerusalem ka Gaghamu Ghasa-Polho.

⁴² Aonu, kate nabotho phei finogha gna hi mae Jisas na, retilo ne tei Jerusalem ka gaghamu tuana.

⁴³ Kate gnafahi u narane Gaghamu na, naiknore neke funu pulo ka namonodire. Nu mae Jisas neke au fapulo Jerusalem. Mae Josep ghe Meri ne theome laseni mae Jisas te au faleghu teuna.

⁴⁴ Aonu mae Josep ghe Meri neke pulo narane thongana tuana, eghuteuna repa gaoghathodi na ne kafe soruhi eghu. Eghume, kate dofini mana na, repa ne funu hironi mana farihoteidi kheradi nei vikedi teu thedire eigna mana.

⁴⁵ Nu repa ne theome filoni mana. Aonu repa neke pulo harini mana Jerusalem.

⁴⁶ Mare hiro ne hiro. Ka fatilo narane na repa ne ruma ka Sugablahi na ne ludeni mana jare. Mae Jisas gnokro neu baludi hatimare mae velepuhigna vetula nogna mae Moses re fanomho neu ka cheke te edi mare re, eghuteuna mana ne faghusna ka hatimare.

⁴⁷ Mae te kafe fanomho ka mana re ne jaglo nodi fara ka nogna glalase nei ka nogna cheke tughu eghu te edi mana re.

⁴⁸ Ka vido tuana, idogna kmagna mana re jaola ne jaglo nodi fara kate filoni mana na. Aonu, idogna na ne cheke eghu ka mana, “Thuguo, naugna unha site eni iagho ka ghepa ignea? Ghepa kmamu ne nanga nomi fara ne hiro nigho iagho.”

⁴⁹ Mae Jisas ne cheke eghu, “Ido, naugna unha ghopa ne hiro ghau iara? Ghopa theome laseni te keli fara te au iara ka sugagna mae Kmagu na?”

⁵⁰ Nu repa ne theome lasedi gaoghathodi unha te chekedi mana igre.

⁵¹ Mae Jisas neke pulo baludi repa Nasaret. Mana ne leghudi unha te chekedi repa re. Eghuteuna idogna mana na ne ghaoghatho eidi unha teke edi re ne tathaji u cheke igre ka nagnafagna na.

⁵² Mae Jisas biꞌo haghe ne heta eghuteuna mana biꞌo ne biꞌo nogna glalase na. God ne keli tagna fara ka mana nei naiknore jaola ne keli tadi ka puhigna mana na.