Luku 15 - Buka Blahi Ka Cheke Holo

Sipu te snivi

¹ Kaisei fata, kmana mae te diꞌa mala salo takis, nei keha mae te diꞌa eghu ne khapru mei mala fanomho ka mae Jisas.

² Hatimare mae Farasi nei mae velepuhigna vetula nogna mae Moses eghu filoni igne ne buiburi ne cheke eghu, “Mae igne fofodu baludi mae te diꞌa igre, eghuteuna tangomana te ghamu baludi mare!”

³ Aonu mae Jisas ne cheke naba eghu ka mare,

⁴ “Jame kaisei mae au nogna kaisei gobi sipu, eghuteuna dofi kaisei, na faneha eghu mana? Mana na lisa laodi nhevasalei nheva sipu are ka thogele na mala hironighu te snivi na.

^5-6 Eghuteuna kate filo deni na mana na gleale'a fara na pala haghe ka fafragna na pala nake pulo ka suga na. Mana na kilodi kheragnare na cheke eghu, ‘Gleale'a balugu iara, iara kela filo deni nogu sipu teke dofi ia.’

⁷ Te chekeni iara na, jateula tuana eghu kligna na, naugna God nei hatimare mae engel kligna re ginauna na gleale'a ka mae ihei te hogri nagnafa na. Uve, nodi gleale'a mare balugna mana na ginauna uludi teke gleale'a fara mare baludi nhevasalei nheva naikno te keli te theome filo glanini gaoghathogna te mala hogri nagnafa na.”

Cheke naba eigna sileni te dofi

⁸ Eghuteuna mae Jisas ne cheke eghu, “Ba, jame kaisei naikno biꞌo au nabotho sileni eghuteuna dofi kaisei, naꞌa ginauna fakasa juta nei haglu suga na eghu. Naꞌa na famane hiro ka suga na ghilei filo deni.

⁹ Eghuteuna kate filo deni na, naꞌa nake kilo fodudi kheragna nei vikegna teure na cheke eghu, ‘Gleale'a balugu iara naugna iara kela filo deni sileni teke dofi ia.’

¹⁰ Na jateula tuana eghu nogna engel God re ginauna na gleale'a biꞌo fara kate hogri nagnafa kaisei naikno te diꞌa na.”

Cheke naba eigna mae ihei te snivi

¹¹ Aonu mae Jisas neke cheke eghu, “Kaisei mae au phei thugna.

¹² Mae ke iko na ne cheke eghu ka mae kmagna na, ‘Mama, famei gognaro nogu vido glepo mala famei ka iara thogheiro teku iagho ia.’ Aonu mae kmadi na ne tufa ka phia mae thugnare.

¹³ “Theome kmana narane ke leghugna igne, mae ke iko na ne boiboli ne tei ka namono delei. Jare mana ne chochoghei fahui gobigna lepo teke khotodi mana re ka puhi te theo nafugna.

¹⁴ Kate koko fahui mana gobigna lepo teke khotodi thegna re, narane behu te kafe theome naba gano heva heva ka namono te kmana re ne thokei mei. Mae sitei na ne rofo ne magnahaghei sileni.

¹⁵ Aonu mana tei ne loku ka kaisei mae khulumono jare. Mae khulumono na ne kuru teini mana ka nogna gloku na mala faghamu bosu.

¹⁶ Mae sitei na ne rofo fara ne magnahaghei ghamu mala boho ka vido gano te ghamu bosure, naugna theo kaisei naikno te fei ghegna mana na.

¹⁷ “Kate au papara tuana neke pulo mei nga gaoghatho te keli na ka mana. Mana ne ghaoghatho eghu, ‘Tore! Nogna mae gloku mae mama ra au ghedi kmana gano. Nu iara na au glehe rofo teu ao.

¹⁸ Iara ginauna nake jifla ke pulo ka mama. Iara ginauna na cheke eghu ka mana: Mama, iara la jafra ranghini God nei jafra ranghi nigho iagho.

¹⁹ Iara theome nabagu te kilo ghau thumu. Nu tusu mei gloku mala loku iara jateula kaisei nou mae gloku eghu kolho.’

²⁰ Aonu mae sitei na kegra haghe neke figri ka mae kmagna na. “Kate gaꞌu teu mae thugna na, mae kmagna na ne efra deni te mei mana na. Mana ne kokhoni nognani mae thugna na, chari ne tei ne gefe ka fafragna na ne gnanghoni mana.

²¹ “Mae thugna na ne cheke eghu, ‘Mama, iara la jafra ranghini God nei jafra ranghi nigho iagho. Iara theome nabagu te kilo ghau thumu.’

²² “Nu mae kmagna na ne cheke eghu ranghidi nogna mae glokure, ‘Faghose! Hata mei pohe majaghani mala pipichi mana. Eghuteuna falao ring ka geghesugna na nei sadol ka thatablagna na.

²³ Hata mei buluka te blokha ia, mala falelehe mala ghamu fodu tahati balu gleale'a.

²⁴ Naugna mae thugu iara gne neke lehehi, nu gognarona kela karha fapulo. Mana neke snivihi nu gognarona kela thakle mei ka tahati!’ Aonu, hatimare ne ghamu ne gleale'a fodu.

²⁵ “Ka vido te edi mare igre, mae tighagna na au neu ka nagare na. Kate mei namo mana ka suga na, mana ne nomhidi naogladi nifu nei gragi.

²⁶ Mana ne kilo meini kaisei mae gloku, ne ghusna eghu ka mana, ‘Unha si glepo te edi area?’

²⁷ Mae gloku igne ne cheke eghu ka mana, ‘Mae tahimu ia gognarona kela pulo mei. Eghuteuna mae kmamu na ne falelehe kaisei buluka te blokha ne ghamu, naugna mae tahimu na karha kela figri mei.’

²⁸ “Mae tighagna na ne diꞌatagna fara ne tirogna ruma ka gaghamu na. Aonu mae kmagna na jifla ne toreni mae thugna na mala ruma ka suga na.

²⁹ Mana diꞌatagna ne cheke eghu ka mae kmagna na, ‘Filo sagho, iara loku ranghigho kmana finogha. Iara theome saosakloni kaisei nou vetula. Nu iagho theome falelehe kaisei sua sipu mala ghamu mala gleale'a iara baludi mae kheragu fofodu gre.

³⁰ Nu mae thumu iagho igne neke falulhuvu fateo nou sileni iagho re ka naikno vine. Kate ke pulo mei mana ka suga na iagho ke falelehe buluka te blokha malagna mana.’

³¹ “Mae kmagna na ne cheke eghu ka mana, ‘Thuguo! Iagho au fabrahu balugu iara. Gobigna lepo te au ka iara re kafe nou iagho.

³² Nu ghehati neke eni gaghamu igne, mala gleale'a fodu balugna mana, naugna mae tahimu igne neke lehehi, nu gognarona kela karha fapulo. Mana neke snivihi nu gognarona kela kakhana.’ ”