Levitikas 9 - Buka Blahi Ka Cheke Holo

Pris biꞌo Eron ne edi fafara

¹ Nhana narane ke leghugna teke taofi pris Eron igne, mae Moses ne kiloni mae Eron nei thugna mana re eghu baludi mae lidadi Israel mala kafe mei.

² Mana ne cheke eghu ka mae Eron, “Iagho atha mei kaisei buluka majaghani nalhaꞌugna nei kaisei sipu nalhaꞌugna te theo kaisei thona ka thinidi re. Buluka igne mala fafara mala doglo iagho ka tathagna Lord, eghuteuna sipu igne mala fafara mala thofno krono.

³ Eghuteuna iagho mala cheke ka naiknodi Israel mala atha mei kaisei nanigot mala fafara mala doglo mare ka tathagna Lord. Eghuteuna cheke ka mare mala atha mei kaisei buluka majaghani nalhaꞌugna balugna kaisei sipu majaghani nalhaꞌugna mala fafara te thofno krono fara. Repa kafe kaisei finogha, eghuteuna repa mala theo kaisei thona ka thinidi re.

⁴ Eghuteuna mare mala atha mei kaisei buluka nalhaꞌugna balugna kaisei sipu nalhaꞌugna mala fafara mala laseni te au fakeli balugna Lord. Mare jaola mala fafara ka glepo tautagu igre balu flaoa ka famane wit teke ngigno fodu mare balu oliv oel. Mare mala edi glepo igre gognaro, naugna Lord ginauna thakle ka tahati ka narane gognaro gne.”

⁵ Eghume naikno ra atha mei glepo igre ke ulu Suga Tapuale te Blahi jateula teke chekeni mae Moses igne eghu. Eghuteuna naikno te gnafa Israel igre mala kafe mei ke ulugna Lord.

⁶ Aonu mae Moses ne cheke eghu ka naiknore, “Lord neke cheke ka ghotilo mala edi glepo igre, mala ghotilo ginauna filoni siasiglagna nogna nolaghi mana na.”

⁷ Aonu mae Moses ne cheke eghu ka mae Eron, “Iagho tei ka olta mala fafara mala doglo themu ka tathagna Lord, eghuteuna ei fafara te thofno krono mala atha koko nakhibomu iagho. Eghuteuna ke leghu, iagho fafara mala atha koko nakhibodi naiknore, thofno jateula teke chekedi Lord ra eghu.”

⁸ Aonu mae Eron ne tei ka olta na ne aknu falehe buluka majaghani nalhaꞌugna na ne fafara mala doglo thegna ka tathagna Lord.

⁹ Eghuteuna thugna mana igre ne atha dadaragna buluka igne, ne tusu lao ka mana, aonu mana ne tihi lao geghesugna na ka dadara igne ne lilisei ka fati honagna olta na. Eghuteuna mana totofa vido dadara teke salaꞌui igne ka pesigna olta na.

¹⁰ Mana atha garofagna buluka igne baludi phei chauchau nei vido te keli ka khebugna na, eghuteuna mana ne gahu fahui ke kligna olta, jateula teke chekeni Lord ka mae Moses ia neu.

¹¹ Nu mana atha ne tei nafnahigna buluka na balu guligna na mala gnubra ke kosigna vido te au mare tagna na.

¹² Ke leghu, mae Eron ne aknu falehe sipu nalhaꞌugna na mala eni fafara te thofno krono na. Thugna mana igre falao ka mana dadaragna sipu teke aknu falehe mana igne ne totofa ka fati philegna olta na.

¹³ Eghuteuna mare atha phaꞌugna sipu igne baludi vido te gnafa re ne falao ka mana ne gnubra ke kligna olta.

¹⁴ Aonu mana ne titihi lamna ka thiꞌagna sipu igne baludi gobigna lepo te au tagnare, eghuteuna ghahedi sipu igne mana jaola ne gnubra ke kligna olta baludi keha vidogna sipu igne.

¹⁵ Ke leghu mae Eron ne fafara maladi naiknore. Mana atha nanigot na ne aknu falehe ne fafara mala doglo naiknore ka tathagna Lord, jateula teke enihi mana malagna thegna.

¹⁶ Eghuteuna mana atha ne mei kaisei buluka nalhaꞌugna nei kaisei sipu nalhaꞌugna teu igre, mala eni fafara te thofno krono fara na, eghuteuna mana ne eni fafara igne jateula teke chekeni Lord na neu.

¹⁷ Mana atha ne mei flaoa teke eni ka famane wit na, eghuteuna mana atha katha ka flaoa igne ne gnubra ke kligna olta. Mana neke nhaꞌa lao ka fafara te gnubra fabrahu leuleghu hamerane igne.

¹⁸ Aonu mae Eron aknu falehe buluka nalhaꞌugna nei sipu nalhaꞌugna teu igre mala fafara ranghidi naiknore mala laseni mare te au fakeli balugna Lord. Eghuteuna thugna mana igre atha dadaradi buluka ghe sipu igre ne tusu lao ka mana, aonu mana ne totofa ka fati philegna olta na.

¹⁹ Aonu mana atha ne mei garofadi phei glepo tautagu igre, garofa ka sekogna sipu igne, nei garofa lamna ka thiꞌadi, nei chauchaudi, nei famane vido ka khebudi teu phei glepo tautagu igre.

^20-21 Mare lilisei glepo igre ke klignadi nafnahi babangodi phei glepo tautagu igre, eghuteuna mana atha ne mei glepo igre ka olta na. Aonu mana ne gnubra garofa igre ke kligna olta. Nu mana atha babangodi phei glepo tautagu igre balu ghahe nhetadi, eghuteuna mana pala haghe ne tei ka tathagna Lord mala kaisei thufa ka mana jateula teke chekeni mae Moses na neu.

²² Ke leghugna te gnafa fafara igre, mae Eron ngafa haghe phei khamegna re ne fablahidi naiknore, aonu mana neke soru ka olta na.

²³ Aonu mae Moses ghe mae Eron ne tei ruma ka Suga Tapuale te Blahi na, eghuteuna kate jifla mei phia mare kosi na, phia mare ne fablahidi naiknore, eghuteuna siasiglagna nogna nolaghi Lord na ne siasigla mei ka mavitu na.

²⁴ Khaꞌaghi na megei nga ne jifla mei ka vido te au teu Lord na ne gnhubra fahui nafnahi te gnafa nei garofadi teu fafara ka olta na. Eghuteuna kate filoni igne, naiknore ne thagru fabiꞌo ne pogho soru ka glose na.