Levitikas 6 - Buka Blahi Ka Cheke Holo

^1-3 Aonu Lord ne cheke eghu ka mae Moses, “Jame kaisei mae chaghi eigna glepo teke tusu lao keha mae na ka mana mala reireghi mana tekuna, ba mana blau nogna ihei, ba chaghini ihei, ba mana deni nogna glepo keha mae na nu mana chaghi tathaji glepo igne. Jame te edi mana thua nafnata phoge igre, ba mana nhaꞌa cheke eidi thua nafnata phoge igre nu mana chaghi kolho, mae tuana huhughuni nogu vetula iara na eghuteuna mana tapla jafra ka nakhibo,

^4-5 eghuteuna mana nabagna te papara eigna igne. Mae tuana mala ke tusu fapulo gobigna lepo teke atha mana ka puhi te diꞌa igre, eghuteuna mana mala ke nhaꞌa lao kaisei ke klignadi glima sileni ka praesdi glepo igre.

⁶ Aonu mana atha mei kaisei sipu nalhaꞌugna te theo kaisei thona ka thinigna na, mala tusu lao ka mae pris mala fafara mala poloru ka iara Lord. Praes gna sipu igne mala nabagna unha teke eni mana na.

⁷ Ka puhi igne, pris ginauna fafara mala atha koko nakhibodi naiknore, eghuteuna iara ginauna atha koko nakhibogna mae igne maladi thua nakhibo teke edi mana te nabagna te mala papara eidi mana re.”

Vetula gna fafara te thofno krono na

⁸ Aonu Lord ne cheke eghu ka mae Moses,

⁹ “Cheke ka mae Eron baludi thugna mana ra cheke igne: Igne vetula gna fafara te thofno krono na. Fafara te thofno krono igne te mala atha te mei ghotilo leuleghu rafi na, fafara igne mala au ke kligna olta ghilei hamerane, eghuteuna mae pris mala reireghi khaꞌaghi gna olta na mala dudulu fabrahu bongi thongana na.

¹⁰ Aonu hamerane na, kaisei mae pris ginauna fahaghe nogna phoko na balugna nogna trasis kmo'ei na, eghuteuna mana tei mala atha koko nakrofu baludi garofa re eghuteuna lisei fadelei rhegna olta na.

¹¹ Aonu mana tei tughu nogna pohere, eghuteuna ke pulo mei mala atha nakrofu igre tei kosi ka vido te au ghotilo na tei ka kaisei vido te gae ka tathagu iara Lord na mala totofa ka vido tuana.

¹² Eghuteuna khaꞌaghi ka olta na mala dudulu fabrahu, theome mala lehe. Leuleghu hamerane na mae pris ginauna ke nhaꞌa lao keha gaju tagna, eghuteuna lilisei fafara te thofno krono na ke kligna olta, eghuteuna mana gnubra garofadi fafara igre mala laseni mare te au fakeli balugu iara na.

¹³ Khaꞌaghi ka olta na igne theome mala lehe, nu mala dudulu fabrahu kolho.”

Vetuladi flaoa te edi ka famane wit

^14-15 Lord ne cheke eghu ka mae Moses, “Igne vetula eidi flaoa te edi ka famane wit. Mae pris thugna mae Eron igre mala atha fajifla keha famane flaoa ka khamegna na eghuteuna ngigno balu oliv oel nei insens, eghuteuna pala mei ke ulu olta mala tusu mei ka iara. Aonu mana ginauna gnubra ke kligna olta mala laseni mae igne te tusu mei ka iara na, eghuteuna sisirigna glepo blahi igne iara Lord keli taguni fara.

^16-17 Aonu keha vido flaoa te au teu igne maladi mae pris, mala tangomana mare te ei bisket tagna na, nu blahi te nhaꞌa lao isi tagna na. Eghuteuna mare ghamu bisket igne ka glalabagna Suga Tapuale te Blahi na, naugna vido igne blahi. Gano te tusu lao iara ka mare igne kaisei glepo blahi, blahi fara jateula fafara te mala doglo naikno na ka tathagu iara na igne eghu, nei fafara mala poloru.

¹⁸ Ihei ka tharaknagna mae Eron igne mare tangomana te ghamu vido gano igne naugna vidodi mare fabrahu. Gano igne blahi fara, eghume ihei te haboni na blahi ginauna mei ka mana.”

¹⁹ Lord ne cheke eghu ka mae Moses,

²⁰ “Igne flaoa teke eni ka famane wit teke tusu lao mae Eron ba kaisei thugna ke leghugna mana re mala atha mei ka iara Lord funu ka narane teke taofi pris gna mana na. Leghu narane na mana atha kaisei kilo famane flaoa eghuteuna fofota ka phei vido. Kaisei vido malagna hamerane eghuteuna keha vido na malagna grafi.

²¹ Flaoa igne ngigno balu oliv oel eghuteuna frae. Nguanguja bret igne eghuteuna atha mei jateula fafara te keli tagna Lord ka sisirigna na ra eghu.

²² Eghuteuna thugna mae Eron, mae ihei mala teke mae pris biꞌo ke leghugna mana na mala eni koba igne, eghuteuna mana mala gnubra fahui thufagna Lord igne.

²³ Jateula tuana eghu, flaoa te gnafa teke edi ka famane wit teke atha mei kaisei mae pris igre mala thofno gnubra fahui ke kligna olta. Blahi te ghamu mae pris kaisei vido tagna na.”

Vetula eigna fafara te mala doglo naikno na ka tathagnaLord

²⁴ Lord neke cheke ka mae Moses,

²⁵ mala cheke mana ka mae Eron baludi mae thugna re mala thofno leghuni mare nogna gloku mae pris na. Mana ne cheke eghu, “Igne vetula gna fafara te mala doglo naikno na ka tathagu iara, ke raru olta igne mala aknu falehe mare glepo tautagu malagna fafara te thofno krono na, tuana vido aheva mare te mala aknu falehe glepo tautagu malagna fafara igne. Aonu nafnahigna fafara igne thofno blahi fara.

²⁶ Eghume mae pris teke gnubra fafara igne, mana ghamu nafnahi igne ka vido blahi na, ka glalabagna Suga Tapuale te Blahi na.

²⁷ Kaisei naikno ba kaisei glepo te tafini nafnahi teke fafara tuana, mana ginauna jaola blahi. Eghuteuna jame dadaragna fafara igne au ka nogna pohe kaisei naikno, mana titihi pohe igne ka vido blahi tuana kolho.

²⁸ Jame kaisei mae pris kuki nafnahi ka kaisei suspen teke horo ka glose, mana ginauna poposa suspen tuana. Ba mana jame kuki ka kaisei suspen, mana grahi mala gae, eghuteuna titihi ka khoꞌu.

²⁹ Kaisei mae ka tharaknadi mae pris mana tangomana te ghamu nafnahigna fafara tuana, naugna thono blahi fara.

³⁰ Nu jame mae pris biꞌo fafara mala doglo ka tathagu iara Lord, eghuteuna mana atha mei dadaragna na lamna ka Suga Tapuale te Blahi na, eghuteuna blahi kaisei naikno te ghamu nafnahigna fafara igne. Mare mala thofno gnubra fahui ka khaꞌaghi.”