Levitikas 26 - Buka Blahi Ka Cheke Holo

Lordne fablahidi naikno te leghuni mana

¹ Lord ne cheke eghu, “Ghotilo thosei horo mumuju blahi, ba kaisei nafnata glepo mala tarai ghotilo tagna. Eghuteuna ghotilo mala thosei fakegra haghe thina mumuju brahu mala pogho soru ghotilo tadi, naugna iara Lord, nomi God ghotilo.

² “Ghotilo mala tajini narane Sabat, eghuteuna ghotilo mala ghatho tahuni vido te blahi te mala kilo fnakno ghau iara tagna na. Naugna iara Lord.

³ “Jame te leghudi ghotilo nogu vetula nei faꞌuvedi nogu cheke iara re teuna,

⁴ iara ginauna kuru mei nakhete malami ghotilo ka thofno narane gna na, mala tangomana ghotilo te au ghemi kmana gano ka nomi glose ghotilo re, eghuteuna nomi gaju ghotilo re tangomana jaola te au kmana sisi na.

⁵ Eghume, ghotilo ginauna au ghemi kmana gano salaꞌudi unha ghotilo tangomana te ghathodi. Eghuteuna ghotilo ginauna au ghemi kmana sisi grep salaꞌudi unha ghotilo tangomana te ghathodi. Eghuteuna ka nomi vido ghotilo re ginauna fodu ka gano, eghuteuna ghotilo ginauna tangomana te au fakeli.

⁶ “Iara ginauna togho ghami ghotilo mala au fakeli ka nomi kantri igne, eghuteuna ghotilo ginauna tangomana te thuru fakeli na eghuteuna bongiro na ghotilo ginauna theome mhaghuni kaisei glepo. Glepo tautagu te lase falehe naikno igre iara ginauna ngolhi fajifladi ka nomi vido ghotilo re, eghuteuna ginauna theo kaisei magra nate mei ka nomi kantri ghotilo igre.

⁷ Ghotilo ginauna ngolhi fajifladi nomi naokare eghuteuna aknu falehedi ka nodi naflahi mala magra re.

⁸ Glima mae ka ghotilo kolho nate ngolhi fajifladi kaisei gobi naoka! Eghuteuna kaisei gobi mae kolho ka ghotilo na ginauna ngolhi fajifladi nabotho thogha naoka! Nomi naoka ghotilo igre ginauna kafe lehe ka nomi naflahi mala magra ghotilo re.

⁹ “Eghuteuna iara ginauna fablahi ghami ghotilo, mala au kmana thumi ghotilo, jateula teke chekeni iara ka nhaꞌa cheke teke eni iara balumi ghotilo ia eghu.

¹⁰ Gano nate hata ghotilo ka nomi nagare re ginauna kmana fara salaꞌui, ginauna ghotilo naba gano salaꞌuni finogha thongana na. Eghuteuna leuleghu fata kate ari te gnafa finogha na, ghotilo ginauna tangomana te koko fahui gano teke kulu au re mala au kaisei chogho te krogha maladi gano majaghani.

¹¹ Iara ginauna au balumi ghotilo, eghuteuna iara ginauna theome thodo ghami ghotilo.

¹² Iara ginauna nomi God ghotilo fabrahu, eghuteuna ghotilo ginauna nogu naikno iara.

¹³ Ulu lahu na ghotilo neke loku jateula naikno sneka neku Ijep, nu iara nomi Lord God ghotilo neke hata fajifla ghami ka vido tuana. Eghuteuna iara kukusu chen teke edi mare teke hata ghami ghotilo mala thofno snagla ghotilo.”

Lordneke paradi naikno te theome leghuni mana

¹⁴ “Nu jame te theome fanomho ghotilo ka iara na, nei theome leghudi nogu cheke iara re teuna, iara ginauna para ghami ghotilo.

¹⁵ Jame te thofno tiromi leghudi ghotilo nogu vetula nei nogu cheke teu iara igre na, ghotilo huhughuni nhaꞌa cheke teke eni iara balumi ghotilo ia,

¹⁶ iara ginauna para ghami ghotilo. Iara ginauna ghosei hata mei puhi biꞌo mala thoke ghami nei goigoni ghami eghu ghotilo. Fogra tuana theome tangomana nate gnafa ka ghotilo na, eghuteuna fagrutu tuana ginauna mala dofu ghotilo, eghuteuna ghotilo na fogra fabrahu ghilei lehe. Kate joꞌu ghotilo nomi nagare re, ginauna theo nafudi kolho, naugna nomi naoka ghotilo re ginauna ghamu gano igre.

¹⁷ Iara ginauna figri tagru ghami ghotilo, eghuteuna nomi naoka ghotilo are ginauna ulu ghami ghotilo, eghuteuna iheire te susuku ghami ghotilo are ginauna funei fruni ghami ghotilo. Neubane theo kaisei naikno te ngolhi ghami ghotilo na, ghotilo ginauna rikha, naugna ghotilo ne thono mhaghu nomi fara!

¹⁸ “Eghuteuna jame ghotilo theome leghu ghau iara ke leghudi papara igre, iara ginauna para ghami ghotilo fitu fata salaꞌudi nakhibomi ghotilo re.

¹⁹ Kate fahaehaghe nei thofno patu gama fara teu ghotilo na, iara ginauna faparidi kolho nomi gaoghatho ghotilo re. Uve, theo kaisei nakhete nate soru mei ka nomi vido ghotilo re, eghuteuna nomi glose ghotilo re ginauna khapra fara, eghuteuna maku jateula aean eghu.

²⁰ Nomi nakmusa ghotilo re ginauna theome tangomana nate togho ghami ghotilo na, naugna nomi glose ghotilo re ginauna theome tangomana nate tusu ari gano ka ghotilo na, eghuteuna nomi gaju ghotilo re ginauna theome tangomana nate ure sisi na.

²¹ “Eghuteuna jame te theome keli ranghi ghau iara ghotilo na, nei theome leghu ghau iara teuna, iara ginauna thofno para ghami ghotilo fabrahu eidi nakhibomi ghotilo re.

²² Iara ginauna kuru tei glepo tautagu mala kathu falehe thumi ghotilo re, baludi nomi glepo tautagu ghotilo re. Eghume ginauna na phei ba thiloi kolho nate karha na ghilei theo kaisei nate au te mala nolo ka nomi nabrou ghotilo are.

²³ “Jame papara igre theome tangomana te tughu puhimi ghotilo re teke figri mei ka iara na, nu heta ghemi kolho te theome keli ranghi ghau iara teuna,

²⁴ iara thegu ginauna goigoni ghami fara ghotilo. Eghuteuna iara thegu ginauna thofno papara ghami ghotilo fabrahu eidi nakhibomi ghotilo re.

²⁵ Iara ginauna snakreni magra biꞌo na mala roꞌeni nomi vido ghotilo na, mala para ghami ghotilo naugna ghotilo ne huhughuni nhaꞌa cheke teke eni iara balumi ghotilo ia. Eghuteuna jame te rikha te tei poru ghotilo ka vido keli ka nomi namonore, iara ginauna kuru ari thua nafnata fogra mala thoke ghami ghotilo, eghuteuna iara ginauna snakre lao ghami ghotilo ka khamedi nomi naoka ghotilo re.

²⁶ Ginauna na thoke mei thofno narane ninhigrana nate theo gano nate rofo ghotilo na, eghuteuna nabotho gaꞌase kolho nate tangomana nate kafe gahu bret ka kaisei biti kolho. Eghuteuna kate tufa ghotilo katha bret kolho, ghotilo ginauna rofo.

²⁷ “Jame papara igre theome togho ghami ghotilo teke figri mei ka iara, nu heta ghemi kolho ghotilo te theome keli ranghi ghau iara na,

²⁸ iara ginauna diꞌatagu fara nei theome keli ranghi ghami eghu ghotilo. Eghuteuna iara thegu ginauna thofno para ghami ghotilo fabrahu.

²⁹ Ghotilo ginauna thono rofo fara salaꞌudi tifa ra, ghilei ghamu ghotilo thumi themi are.

³⁰ Eghuteuna iara ginauna goigoni nomi vido blahi ghotilo are. Iara ginauna paꞌe olta te mala gahu insens ghotilo are. Eghuteuna iara ginauna koko lao thinimi ghotilo te lehe are mala pagu ke klignadi nomi mumuju blahi ghotilo te theome karha te pogho soru ghotilo tadi are. Eghuteuna iara ginauna tirogu ghami fara ghotilo.

³¹ Iara ginauna goigoni fahui nomi namono ghotilo are, eghuteuna paꞌe soru nomi vido blahi ghotilo are. Iara ginauna tirogudi sisiridi nomi fafara ghotilo are.

³² Iara ginauna goigoni nomi glose ghotilo are, ghilei nomi naoka ghotilo te mala au ka nomi glose ghotilo igre ginauna rhana nodi fara ka unha te eni iara tagna na.

³³ Iara ginauna kurudi nomi naoka ghotilo are mala ngolhi fajifla ghami ghotilo mala tei au tafri ka keha kantri delei. Eghuteuna ke leghu, mare ginauna goigoni fahui nomi namono ghotilo are ghilei krogha.

^34-35 Ka narane tuana, nomi glose ghotilo na ginauna thofno gnafa ka finogha te krogha tuana. Kate tei ghotilo te sosolo ka nodi vido nomi naoka re, eghuteuna nomi glose ghotilo na mala gnafa jateula narane Sabat. Naugna ghotilo ne theome snakreni glose na mala gnafa leuleghu fitu finogha jateula teke chekeni iara ka ghotilo ia eghu.

^36-37 “Iara ginauna famamhaghu ghami ghotilo iheire te au teu ka keha kantri ra mala thofno mhaghu nomi fara ghotilo. Neubane naogla gna kaisei khakla gnognofi te flalo ka nuri, ghotilo mhaghu na rikha. Eghuteuna ghotilo ginauna rikha jateula te ngolhi ghami mae naoka ra eghu, eghuteuna ghotilo ginauna tangomana te uka na, neubane theo kaisei naikno te ngolhi ghami ghotilo na. Eghuteuna ghotilo ginauna rikha na tothokei fari themi kolho, na uka tafri pari, eghuteuna ginauna theo nomi nolaghi te mala magridi nomi naoka re.

³⁸ Ghotilo ginauna lehe ka keha kantri te tei au ghotilo tagna na, eghuteuna mae naoka ginauna giugilu ghami ka nodi glose re.

³⁹ Eghuteuna tothoghei ikoi iheire te karha nga teu ka ghotilo igre, ghotilo ginauna diꞌa nagnafami fara ka nodi vido nomi naoka ghotilore. Uve, ghotilo ginauna diꞌa nagnafami fara eidi nakhibomi themi re, nei nakhibodi kuꞌemi ghotilo ra.”

Lordginauna tajini nogna nhaꞌa cheke na

^40-41 “Nu ginauna tharaknami ghotilo mala cheke thakledi nakhibodi re, nei cheke thakledi nakhibodi kuꞌedire. Eghuteuna mare ginauna mala cheke thakledi kuꞌedi mare teke figri tagru ghau iara ra. Mare ginauna mala cheke thakledi puhidi kuꞌedi ra teke figri tagrudi iara teke ghilei kuru teidi iara ka nodi kantri nodi naoka mare re. Eghuteuna jame iheire te patu gama igre faparadi thedi, mare laseni papara igne thoke mei ka nakhibodi thedi,

⁴² te eghu na, iara ginauna ghathoni nogu nhaꞌa cheke teke eni iara baludi kuꞌedi mare, Ebraham, Isak, nei Jekop. Eghume iara ginauna nake ghathoni nomi glose ghotilo na mala ke pulo mei mare tagna.

⁴³ Nu ulu lahu na, mare mala tei kokoni glose igne, mala tangomana glose igne mala gnafa fakeli kate krogha na. Eghuteuna mare te gnafa na mala papara naugna ghotilo neke figri tagru ghau iara, eghuteuna ghotilo tiromi leghudi nogu vetula iara re.

^44-45 Nu ka narane tuana kani au nga teu mare ka nodi kantri mae nodi naoka re, iara ginauna theome tangomana te thofno lisa kokodi mare, ba thododi mare, mala goigonidi mare hui. Eghuteuna iara theome tangomana te huhughuni nogu nhaꞌa cheke baludi mare ia, naugna iara Lord, nomi God ghotilo. Iara ginauna toghodi mare, naugna iara ginauna ghathoni nogu nhaꞌa cheke iara ia. Nhaꞌa cheke igne iara neke eni balumi ghotilo kani teke hata fajifla ghami iara Ijep ka tathadi keha naikno ra mala nodi God mare. Iara Lord.”

⁴⁶ Igre vetula, nei farirhiu, nei nogna cheke Lord teke tusu lao ka Moses ka Thogele Sanai, mala chekedi ka naiknodi Israel mala leghudi.