Levitikas 25 - Buka Blahi Ka Cheke Holo

Fafitu finogha

¹ Kate au teu Moses ka Thogele Sanai, Lord ne cheke eghu ka mana,

² “Cheke ka naiknodi Israel kate tei ghotilo ka glose aheva teke nhaꞌa cheke hi iara mala tusu ari ka ghotilo teku ia, leuleghu fata ka fafitu finogha na, ghotilo mala thosei joꞌu gano ka nomi glose na. Nomi glose ghotilo na mala gnafa jateula narane Sabat eghu. Ghotilo mala eni igne mala fagaglana gna ghotilo te ghatho tahu ghau iara Lord.

³ Eigna ka namno finogha igre ghotilo tangomana te joꞌu gano ka nomi nagare ghotilo re, eghuteuna ghotilo tangomana te reireghidi nomi nagare grep, eghuteuna ghotilo tangomana te hata gano ka nagare.

⁴ Nu ka fafitu finogha na, ghotilo mala snakreni glose na mala gnafa. Eghuteuna ka fafitu finogha tuana, ghotilo mala eni jateula narane Sabat eghu ka glose na kaisei finogha mala ghatho tahu ghau iara Lord. Ghotilo thosei joꞌu kaisei gano ka glose na, eghuteuna thosei kato koko gregedi gaju grep eghu ka finogha tuana.

⁵ Gano te karha thedi ka phegra ghotilo ra, ghotilo mala thosei hata malami themi ba mala sabiri. Eghuteuna ghotilo mala thosei pala tei sisidi grep teke hata ka nomi nagare re mala tathajiu malami themi ba mala sabiri. Naugna igne, ghotilo mala eni Sabat ka glose nabagna kaisei finogha mala ghatho tahu ghau iara.

⁶ Neuba ghotilo thosei tobi ka finogha tuana, nu glose na tangomana te favuragha gano ka ghotilo naiknomi Israel. Kaisei gano teke karha thegna na, malami ghotilo, nei maladi naikno sneka, nei maladi naikno gloku, nei maladi naikno phosa te au balumi ghotilo.

⁷ Gano te karha thegna na, maladi nomi glepo tautagu ghotilo are baludi glepo tautagu te au mata are.”

Ka falimafulu finogha mala snagla naikno sneka

⁸ “Ghotilo kaha fitu finogha igre naba fitu fata, mala thokeni phiatutu nheva finogha.

⁹ Ka phiatutu nheva finogha tuare, ka fafitu nhigra na, ka fabotho narane gna na, igne Narane biꞌo mala Hata Fadelei Nakhibo, eghume ghotilo mala kurudi naiknore mala tei ifu fabiꞌo trampet heva heva ka nomi kantri na.

¹⁰ Ghotilo fablahi falimafulu finogha, igne mala kaisei finogha blahi mala nogu iara. Finogha igne mala chekeni ka naikno te au heva heva ka nodi glose re narane nate snagla nodi naiknore ke lamna gna kantri igne. Ka finogha igne, glose teke sabiri naiknore ka keha mae mala ke pulo mei ka tharakna teke kulu khotogna na. Eghuteuna ka finogha igne, iheire teke sneka ra nake snagla nodi mala tangomana mare teke pulo ka tharaknadi re.

¹¹ Ka finogha igne, ghotilo thosei joꞌu gano. Eghuteuna ka finogha igne gano teke karha thedi ka phegra ghotilo ra, ghotilo thosei hata tathajiu malami themi ba mala sabiri. Eghuteuna ghotilo thosei te pala sisi grep ka nagare ra tathajiu malami themi ba mala sabiri.

¹² Finogha igne blahi, ghotilo mala ghamu kolho kaisei gano teke karha thegna.

¹³ “Jame kaisei naikno neke sabiri nogna glose na ka keha mae, glose tuana mala ke pulo ka mae teke kulu khotogna na igne ka falimafulu finogha.

¹⁴ “Eghume, jame ihei ka ghotilo magnahaghei sabiri glose ka keha mae na, ba foli glose eghu, ghotilo thosei chaghi fari themi.

¹⁵ Te eghuna, ghotilo mala ei praes gna glose na mala horoghoto ka nabadi finogha glose igne tangomana te tusu lao gano ka mae ihei teke foli na, ghilei thokeni finogha glose tuana na teke snagla na teke pulo ka mae ihei teke kulu khotogna na.

¹⁶ Jame kmana finogha, praes gna na glose igne tangomana te haghe na, nu jame phei ba thilo finogha kolho, praes gna na pari. Igne ne eghu naugna praes tuana theome praes gna glose, nu praes di gano teke karha ka glose aheva teke hata mana ka glose tuana.

¹⁷ Ghotilo thosei chaichaghi fari themi. Nu ghotilo mala ghatho tahu ghau iara naugna iara Lord, nomi God ghotilo.”

Nogna nhaꞌa chekeLordmala fablahini nodi glose naiknore

¹⁸ “Jame te faꞌuvedi nei leghudi teu ghotilo nogu vetula nei nogu farirhiu teu iara igre na, ghotilo tangomana te au fakeli ka nomi glose na.

¹⁹ Jame te eghu ghotilo na, nomi glose ghotilo igne ginauna au kmana gano, eghuteuna ghotilo ginauna theome tangomana te kmoꞌe ka gano na, eghuteuna ghotilo ginauna tangomana te au fakeli ka vido tuana.

²⁰ Nu glahu cheke eghu keha naikno, ‘Jame ka fafitu finogha na, theome snakre ghami te joꞌu gano nei bubukrei gano ka sugami re teuna, ghehati na ghamu unha ginauna?’

²¹ Iara Lord, iara ginauna fablahi nomi glose na ka fafamno finogha na mala au kmana gano nabagna thilo finogha.

²² Gano gna fafamno finogha na, ghotilo ginauna tangomana te ghamu te ghilei gnafa ka fahana finogha na. Eghuteuna ka fahana finogha na ghotilo ginauna tangomana teke joꞌu gano majaghani. Eghuteuna ghotilo ginauna ghamu au ngala gano igre ghilei thokeni faheva finogha na teke hata gano ghotilo ka nomi nagare are.”

Keha farirhiui ka faglima fulu finogha

²³ “Jame kaisei ka ghotilo magnahaghei sabiri nogna glose na ka keha mae, mana ginauna thosei sabiri fahui, naugna glose igne theome nogna mana, nu nogu iara Lord. Iara neke tusu ari ka ghotilo mala loku ghotilo, nu ghotilo jateula naikno phosa te au katha vido kolho ka glose igne eghu.

²⁴ Eghuteuna heva heva ka nomi kantri ghotilo igne, kate sabiri kaisei mae nogna glose na ka keha mae, mae ihei teke kulu khotogna mana au nogna nolaghi te mala ke foli fapulo glose tuana, eigna mana neke kulu khotogna tifa.

²⁵ “Jame kaisei ka ghotilo thono kuma fara, eghuteuna mana sabiri nogna glose na, kheragna ka tharakna gna mana na mala ke foli mala ke hata fapulo glose tuana.

²⁶ Eghuteuna jame mae tuana theome au kaisei kheragna mala foli mala ke hata fapulo glose tuana, nu ke leghu, mana mae dedei, te eghu na mana tangomana teke foli mala ke hata fapulo glose igne.

²⁷ Jame te eni mana igne na, mana mala kaha niha finogha te au na ame thokeni nga Falimafulu Finogha na teke snagla glose igne ka khamegna mana na. Eghuteuna mana mala foli fajifla ka mae ihei teke foli tifa, ka praes te nabagna niha finogha ame thoke mei nga Falimafulu Finogha igne. Mana tangomana teke pulo au ka nogna glose na.

²⁸ Nu jame mana theome naba te mala foli fapulo glose teke sabiri mana igne, te eghu na, glose tangomana te au ka mae khotogna majaghani na ghilei thokeni Falimafulu Finogha. Aonu ka Falimafulu Finogha igne, glose igne ginauna snagla nake pulo mei ka mae ihei teke kulu khotogna na, mana tangomana teke loku tagna.

²⁹ “Jame kaisei mae au nogna suga ke lamna namono te au gringni thina biꞌo, eghuteuna mana sabiri suga igne ka keha mae, mana au nogna nolaghi mala foli mala teke hata fapulo ke lamnagna finogha thongana te funu ka narane teke sabiri mana na.

³⁰ Nu jame te theome foli mana mala ke hata fapulo ka finogha igne na, mana theo nogna nolaghi mala teke foli ke leghu na. Eghuteuna suga igne ginauna nogna mae teke foli eghuteuna nogna tharakna gna mana na fabrahu. Eghuteuna ka Falimafulu Finogha igne, suga igne theome tangomana teke pulo mei ka mae ihei teke khotogna ulu lahu na.

³¹ Nu suga te au ka namono te theo kaisei gringni thina na, ghotilo mala leghuni jateula puhi te leghuni ghotilo ka nagare na are eghu. Mana tangomana te foli mala ke hata fapulo, ba suga igne tangomana te snagla teke pulo mei kolho ka Falimafulu Finogha igne.

³² “Nu ka nodi namono vikegna Livae te au gringni thina biꞌo igne, jame mana neke sabiri nogna suga na, mae igne au nogna nolaghi fabrahu mala foli mala ke hata fapulo suga igne.

³³ Jame kaisei mae ka vikegna Livae mana theome mala foli mala ke hata fapulo nogna suga na, te eghu na, kate thokeni Falimafulu Finogha igne, suga igne mala snagla mala ke pulo mei ka mana. Naugna suga te au ka nodi namono mae Livaet igre nodi mare fabrahu.

³⁴ Nu glose te au falithui ka kaisei nodi namono vikegna Livae igre, mare theome tangomana te sabiri na. Glose igne nodi mare fabrahu.”

Puhi te mala reireghidi naikno kuma

³⁵ “Jame kaisei kheramu thono kuma fara eghuteuna mana thono theome au kaisei glepo te mala reireghini thegna na, te eghu na, ghotilo mala reireghini nei toghoni eghu mana jateula puhi te reireghidi nei toghodi teu ghotilo naikno phosa te au balumi ghotilo are eghu.

³⁶ Eghuteuna ghotilo mala thosei chekeni mae te kuma igne mala foli intres ka kaisei kaoni teke tusu lao ghotilo ka mana. Ghotilo mala ghatho tahuni Lord, eghuteuna ghotilo mala keli ranghidi naikno te kuma te au balumi ghotilo are.

³⁷ Ghotilo thosei snakredi naikno te kuma re mala foli intres ka kaisei kaoni teke tusu lao ghotilo tadi re, eghuteuna ghotilo thosei nhaꞌa lao intres ka gano teke sabiri ghotilo ka naikno te kuma re.

³⁸ Ghotilo mala edi glepo igre naugna iara Lord, nomi God ghotilo. Iara neke hata fajifla ghami ghotilo Ijep, mala tusu mei kantri Kenan igne ka ghotilo, eghuteuna mala nomi God ghotilo.”

Puhi te mala snakredi naikno sneka mala tei ka nasnagla

³⁹ “Jame kaisei kherami ghotilo thono kuma fara ghilei sabirini thegna ka kaisei ka ghotilo, te eghu na, ghotilo thosei snakreni mana mala loku jateula kaisei nomi sneka eghu.

⁴⁰ Ghotilo filo laoni mana jateula nomi mae gloku eghu ghotilo ba jateula kaisei naikno phosa eghu. Mana mala loku balumi ghotilo tei thokeni Falimafulu Finogha igne.

⁴¹ Aonu ka Finogha igne, mana baludi thugna re mala snagla ke pulo ka thabukna gna na, nei ka nodi glose na.

⁴² Ghotilo naiknomi Israel, iara neke hata fajifla ghami Ijep aheva ghotilo teke sneka tagna. Tutuani, ghotilo nogu naikno gloku iara Lord. Naugna igne blahi kaisei ka ghotilo te mala sneka ka keha mae na.

⁴³ Ghotilo thosei fanolidi naikno te kuma re naugna ghotilo mala ghatho tahu ghau iara kolho, nomi God ghotilo.

⁴⁴ “Eghume, jame te magnahaghei au nomi naikno sneka ghotilo na, ghotilo tangomana te tei foli nalhaꞌu ba gaꞌase ka keha kantri te au falithui ghami ghotilo are.

⁴⁵ Eghuteuna ghotilo tangomana te foli kaisei naikno sneka ka naikno phosa te au balumi ghotilo are. Eghuteuna thudi naikno phosa teke karha ka nomi glose ghotilo are, ghotilo tangomana te tajidi mala nomi sneka ghotilo.

⁴⁶ Thumi nalhaꞌu ghotilo are tangomana teke hata kasa ka kaisei sneka, eghuteuna mare ginauna mala loku jateula naikno sneka eghu fabrahu ghilei lehe. Nu ghotilo mala thosei tapla faparini kaisei kherami maegna Israel mala jateula kaisei naikno sneka eghu, eghuteuna ghotilo mala thosei fagoigolidi mare.

⁴⁷ “Jame kaisei mae phosa te au balumi ghotilo na kaisei mae dedei, eghuteuna kaisei kherami ghotilo kuma ne ghilei sabirini thegna ka mae dedei igne, ba ka kaisei tharakna gna mae dedei tuana.

⁴⁸ Neuba ne eghu ngau, mae khuma igne au nogna nolaghi te mala kiloni mae thabusigna na mala ke mei foli fajifla ka mana.

⁴⁹ Ba mana tangomana te toreni nebugna na, ba keha thabusigna na, ba kaisei kheragna ka tharakna gna mana mala mei ke foli fajifla ka mana. Ba mana thegna tangomana te dei sileni, mana tangomana te fajifla thegna mala tei snagla.

⁵⁰ Eghuteuna te mala laseni praes te mala foli na, mana mala toutonu balugna mae dedei igne, eghuteuna phiamare mala kahadi finogha gna nogna kontrak na, funu ka finogha teke sabiri thegna ka mae dedei tuana te tei thokeni Falimafulu Finogha. Eghuteuna phia mare eni praes te nabagna foligna mae gloku ka finogha teke kaha phia mare na.

⁵¹ Jame kmana finogha te au na ame thokeni nga Falimafulu Finogha. Te eghu na, praes te mala folini mana na haghe te nabadi finogha igre,

⁵² nu jame phei ba thilo finogha kolho te au na ame thokeni nga Falimafulu Finogha, te eghu na, praes te mala foli na pari nabadi finogha igre.

⁵³ Mae gna Israel teke sabirini thegna ka mae dedei tuana mana neke jateula mae ihei te loku ka sileni eghu. Eghuteuna ghotilo mala fiofilo ghami ka mae dedei igne glahu fagoigolini mana kherami na.

⁵⁴ “Jame te theo kaisei mae te foli fajiflani mae kherami igne, ka Falimafulu Finogha, mana baludi thugnare mala tei snagla.

⁵⁵ Ghotilo naiknomi Israel ra nogu iara. Iara neke hata fajifla ghami ghotilo Ijep, uve, ghotilo nogu naikno gloku iara Lord nomi God ghotilo.”