Levitikas 20 - Buka Blahi Ka Cheke Holo

Mae ihei te huhughuni nogna vetula God na, mana mala papara

^1-2 Lord neke cheke ka Moses mala cheke mana ka naiknodi Israel. Moses ne cheke eghu, “Jame ihei ka ghotilo, ba kaisei naikno phosa te au balumi ghotilo, mana snakreni thugna na ka god Molek jateula kaisei fafara eghu, ghotilo fada falehe ka thina.

³ Mae ihei te eni igne mana goigoni ni nogu vido blahi iara na, nei goigoni ni nanghagu iara te blahi na. Eghume iara ginauna figri tagruni nei lisei fadeleini ka naiknodi Israel.

⁴ Jame te theome ghathoni ghotilo unha te eni mae tuana kate fafara mana thugna na ka god Molek, nei theome faleheni mana teu ghotilo na,

⁵ iara thegu nate figri tagruni mana nei tharaknagna mana na, nei keha naikno iheire te loku fodu balugna mana te mala leghuni god Molek igne, eghuteuna iara ginauna hata fadeleidi mare ka naiknodi Israel.

⁶ “Eghuteuna jame kaisei ka ghotilo tei ka mae ihei tangomana te cheke baludi tharungadi naikno teke lehe tifa ra ba ka keha naitu, iara ginauna figri tagruni mana eghuteuna lisei fadeleini mana ka naiknodi Israel.

⁷ “Ghotilo lisei fadelei ghami themi mala blahi ke ulugu iara, naugna iara Lord, nomi God ghotilo.

⁸ Ghotilo faꞌuvedi nei leghudi eghu nogu vetula nei nogu cheke teu iara gre, naugna iara Lord neke fablahi ghami ghotilo.

⁹ “Jame kaisei naikno tibrini idogna ba kmagna na, ghotilo aknu faleheni mana, eghuteuna glehegna mana na najafra gna thegna.

¹⁰ “Jame kaisei ka ghotilo tapla jafra ka khetogna keha mae na, ghotilo mala aknu falehedi repa.

¹¹ “Jame kaisei mae tapla jafra ka khetogna kmagna na, mana famamajani kmagna na. Eghume ghotilo aknu falehedi repa, glehedi repa igne najafradi thedi repa.

¹² “Jame kaisei mae tapla jafra ka khetogna thugna na, ghotilo aknu falehedi repa. Repa igre eni kaisei glepo te theome doglo, eghuteuna glehedi repa igne eigna nodi najafra thedi.

¹³ “Jame kaisei mae eni puhi te diꞌa na ka keha mae na jateula kaisei gaꞌase eghu, phia mare eni puhi te thofno suku noguni fara iara na. Ghotilo aknu falehedi phia mare, glehe igne eigna nodi najafra thedi phia mare.

¹⁴ “Jame kaisei mae tolaghi ka kaisei gaꞌase eghuteuna ke leghu mana jaola ke tolaghi ka idogna gaꞌase tuana, igne kaisei thofno glepo diꞌa fara. Eghume ghotilo gnubradi retilo ghilei lehe retilo, mala theo kaisei glepo te diꞌa jateula igne eghu na teke eni fari hoteimi ghotilo.

¹⁵ “Jame kaisei mae eni puhi te diꞌa na ka kaisei glepo tautagu, ghotilo faleheni mana, eghuteuna ghotilo jaola aknu falehe glepo tautagu tuana.

¹⁶ “Eghuteuna jame kaisei gaꞌase eni puhi te diꞌa na ka kaisei glepo tautagu, ghotilo faleheni naꞌa, eghuteuna ghotilo jaola aknu falehe glepo tautagu tuana. Glehedi gaꞌase ghe glepo tautagu igre najafradi thedi.

¹⁷ “Jame kaisei mae tolaghi ka thofno greghagna na, neubane thugna gaꞌase kmagna mana, ba thugna gaꞌase idogna mana, repa mala mamaja ka glepo igne. Eghuteuna mare mala au fadelei ka kheradi repa re. Naugna mana famamajani greghagna na, mae igne nabagna te mala papara eigna puhi igne.

¹⁸ “Jame kaisei mae thuru fodu balugna gaꞌase te thokeni khabru gaꞌase na, ghotilo lisa fadeleidi repa ka naiknodi Israel, naugna repa ne fakakhana vido aheva te jifla mei dadara tagna na.

¹⁹ “Eghuteuna jame kaisei mae ei puhi diꞌa ka greghagna idogna na ba greghagna kmagna na, mae igne balugna gaꞌase igne mala papara eigna puhi igne, naugna repa kaisei tharakna kolho.

²⁰ “Eghuteuna jame kaisei mae eni puhi te diꞌa na ka khetogna mae thabusigna kmagna na, mana famamajani nebugna na, mae igne balugna gaꞌase na mala papara eigna. Eghume repa ginauna theome tangomana nate au kaisei sua na ghilei thokeni narane te lehe repa na.

²¹ “Jame kaisei mae atha khetogna mae thabusigna na kate karha nga teu mana na, mae igne famamajani mae thabusigna na. Glepo igne kaisei glepo diꞌa, eghume repa ginauna theome thudi kolho.

²² “Iara ginauna atha ghami ghotilo tei ka glose te mala au ghotilo tagna na. Ghotilo mala faꞌuvedi nogu vetula iara re, eghuteuna ghotilo mala leghudi nogu cheke te gnafa iara re. Jame te eghu na, iara ginauna theome ki fajifla ghami ka glose teke tusu ari iara ka ghotilo igne.

²³ Ghotilo ginauna mala thosei leghudi nodi kastom te diꞌa naikno bongihehe gna kantri teke brue fajifladi iara ra, mala tei au ghotilo tagna. Naikno bongihehe igre neke edi kmana glepo te diꞌa, iara thofno tirogudi mare.

²⁴ Nu iara neke nhaꞌa chekehi ka ghotilo te mala atha ghotilo nodi glose mare na. Uve, iara ginauna tusu ari ka ghotilo mala khotogna namono aheva glosegna na thofno keli fara, eghuteuna leuleghu fata na au kmana gano.” Iara Lord, nomi God ghotilo. Iara neke vahi ghami ghotilo neke hata fajifla ghami ka keha naikno re, mala nogu naikno iara.

²⁵ “Eghume ghotilo mala fofota glepo tautagu nei nanghaji eghu te theome klino. Ba unha glepo tautagu nei nanghaji eghu te klino ka tathagu iara na. Ghotilo mala thosei fathona ghami ka tathagu iara na ka kaisei glepo te blahi te mala ghamu ghotilo jateula nafnata glepo tautagu nei nafnata nanghaji, nei keha glepo ikodi te theome klino ka tathagu iara na.

²⁶ Ghotilo mala au blahi naugna iara Lord, iara blahi, eghuteuna iara neke atha fajifla ghami ghotilo ka keha naiknore, mala nogu naikno iara.

²⁷ “Jame kaisei mae ba gaꞌase cheke baludi tharungadi naikno teke lehe ra ba ka keha naitu, ghotilo fada faleheni ka thina, eghuteuna glehegna na eigna najafra gna mana thegna.”