Levitikas 17 - Buka Blahi Ka Cheke Holo

Dadaragna glepo te tautagu na blahi

¹ Lord neke cheke eghu ka Moses,

² “Igne nogu cheke iara te mala facheke iagho ka Eron baludi thugna mana ra, nei naiknodi Israel. Cheke ka mare:

^3-4 Jame kaisei khulumono gna Israel aknu falehe kaisei buluka, ba sipu, ba nanigot mala fafara ka iara, mana mala eni igne ke ulugna grengatha gna Suga Tapuale te Blahi na. Jame te aknu falehe glepo te tautagu igne ka keha vidoi, neubane ke lamnagna nomi namono ghotilo na ba ke kosi namono, nabagna na mae tuana mala papara eigna naugna mana ne huhughuni vetula eigna dadara jateula te falehe naiknora eghu mana. Eghume ghotilo lisei fakosi mae tuana ka naiknodi Israel.

⁵ Gaoghatho gna vetula igne mala lhotidi naiknodi Israel te mala fafara glepo tautagu ke kosi glalaba na igne theome doglo te eni igne. Ghotilo mala hata mei glepo te tautagu igne ka iara, eghuteuna ghotilo mala tusu lao ka pris ke ulugna grengatha gna Suga Tapuale te Blahi na. Eghuteuna ghotilo mala aknu falehe jare mala fafara mala laseni ghotilo te au fakeli balugu iara na.

⁶ Pris hata dadara gna glepo tautagu tuana mala fuafusa ka fati khukru gna olta te au rhegna grengatha gna Suga Tapuale te Blahi na. Eghuteuna mana mala gahu garofa gna na mala kelitagna Lord ka sisiri gna na.

⁷ Aonu ghotilo mala thosei ke fafarai ka nanigot naitu tuana, naugna puhi igne jateula gaꞌase te tei balugna mae te theome khetogna naꞌa ia eghu. Igne vetula te mala leghuni fabrahu ghotilo na.

⁸ “Jame kaisei naikno khulumono Israel, ba kaisei naikno phosa au balumi ghotilo, eni fafara te thofno krono ba eni keha fafara,

⁹ nu theome hata mei ka grengatha gna Suga Tapuale te Blahi na te theome fafara mei ka iara Lord na, ghotilo lisei fakosini ka naiknodi Israel.

¹⁰ “Eghuteuna jame kaisei naikno gna Israel, ba kaisei naikno phosa au balumi ghotilo, koꞌu dadara ba ghamu nafnahi te dadara teu, iara ginauna theome magnahagheni naikno tuana, hata fadeleini ka naiknodi Israel.

¹¹ Gobigna lepo te karha igre, nakarhadi na au ka dadaragna na. Naugna igne iara vahini dadaragna fafara na pris tangomana te toatoafa dadara igne ka olta na mala hata fadelei nakhibomi ghotilo re. Naugna dadaragna glepo te tautagu na jateula nakarhagna eghu, eghume dadara na tangomana te hata fadelei nakhibomi ghotilo re.

¹² Naugna igne iara cheke ka ghotilo naiknomi Israel ba naikno phosa te au balumi ghotilo, theome magnahagheni kaisei ka ghotilo te koꞌu dadara ba te ghamu nafnahi te au dadara teu tagna na.

¹³ “Jame kaisei khulumono gna Israel ba kaisei naikno phosa tei hili eghuteuna falelehe kaisei glepo tautagu ba kaisei nanghaji naba te mala ghamu na, mana tofa koko dadaragna na mala tatafru ka glose.

¹⁴ Nakarhadi gobigna lepore au ka dadara gna na, naugna igne te chekeni iara ka ghotilo naiknomi Israel, te mala thosei koꞌu dadara ba ghamu nafnahigna glepo tautagu te au teu dadara gna na. Jame ihei te ghamu nafnata nafnahi igne na, ghotilo ginauna hata fadeleini ka naiknodi Israel.

¹⁵ “Jame kaisei khulumono gna Israel ba mae phosa ghamu nafnahi glepo tautagu teke lehe thegna, ba neke kathu falehe khuma mhata, mae tuana mala titihi nogna pohe na, eghuteuna mana mala apu fakeli, mae igne ginauna theome klino ka tathagu iara na ghilei rafi. Nu ke leghu, mana ginauna klino ka tathagu iara na.

¹⁶ Nu jame te theome titihi mana nogna pohe na, ba te theome apu mana na, mana ginauna papara eigna.”