Levitikas 16 - Buka Blahi Ka Cheke Holo

Narane mala hata koko nakhibo

¹ Lord ne cheke eghu ka Moses ke leghugna narane te lehe phei thugna Eron naugna phia mare neke mei ka Lord ka puhi te theome doglo.

² Lord ne cheke eghu, “Cheke ka thabusimu Eron, mala thosei ruma mei fabrahu mana ke lamnagna Chogho te thono Blahi fara te bobotho ka pohe igne. Jame te mei mana ka narane te theome naba te mala mei mana na, mana ginauna lehe naugna ka vido blahi igne iara tangomana te mei ka ghopa ke lamna grokho ke kligna thotoku gna Bokis Nhaꞌa Cheke te thofno Blahi fara na.

³ “Nu ka puhi igne kolho Eron tangomana te mei ka Thofno Chogho te Blahi fara igne: Mana mala fafara kaisei sua buluka nalhaꞌugna, fafara igne malagna thegna mala doglo ka tathagu iara na, eghuteuna mana mala fafara kaisei sua sipu nalhaꞌugna, fafara igne mala thofno krono fara.

⁴ Mana mala kulu apu, eghuteuna mana mala fahaghe nogna pohe blahi teke horo ka famane pohe. Tuana nogna pohe brahu mana na, nei nogna trasis kmoꞌei na, nei nogna nhugha pohe na, nei nogna khepi na.

⁵ Naikno te gnafa Israel igre mala hata mei phei nanigot nalhaꞌudi nei kaisei sipu nalhaꞌugna eghu ka pris biꞌo mala fafara phei nanigot igre mala ke doglo ghotilo gnafa ka tathagu iara na, eghuteuna sipu nalhaꞌugna igne malagna fafara te thofno krono na.

⁶ “Eron mala hata mei kaisei buluka nalhaꞌugna mala fafara eigna mana balu tharakna gna mala ke doglo ka tathagu iara na.

⁷ Aonu mana mala hata mei phei nanigot igre ka iara Lord ke ulu grengatha gna Suga Tapuale te Blahi na.

⁸ Jare Eron mala hata phei thina mala lalahu khale, ‘Nogna Lord’ kaisei eghuteuna ‘Nogna Asasel’ keha na. Eghuteuna mana lalahu khale ka phei thina igre mala laseni nanigot igne nogu iara ba nanigot igne nogna naitu Asasel te au ka namono nagou.

⁹ Nanigot te nogu iara na, Eron mala aknu falehe malagna fafara igne mala kafe doglo ghotilo hui ka tathagu iara na.

¹⁰ Nu nanigot nate tei ka Asasel igne theome mala aknu falehe. Nanigot igne mala kegra ke ulugu iara mala hata fadelei nakhibomi ghotilore kate faririkhani mare te tei ka namono nagou na mala tei ka Asasel.

¹¹ “Kate aknu falehe Eron buluka nalhaꞌugna igne mala fafara eigna thegna nei tharakna gna mana teu te mala ke doglo ka tathagu iara na,

¹² mana mala mei ka olta mala gahu insens. Eghuteuna mana mala hata fajifla keha nakrofu khaꞌaghi te karha teu, eghuteuna fafofodu ka kaisei dis, eghuteuna mana mala hata mei ka khamegna na keha sitha malagna insens te famane sisiri keligna. Aonu mana mei ruma lamna ka Chogho te Thofno Blahi fara na.

¹³ Jare ke ulugu iara, mana ginauna lisei lao insens ka khaꞌaghi te au ka dis na, eghuteuna gagahu gna na ginauna eni igne mala theome tangomana Eron te filoni thotoku gna Bokis Blahi na, aonu mana ginauna theome lehe.

¹⁴ Kate mei mana lamna na, mana mala hata mei keha dadara buluka, mana mala tihi lao geghesu gna ka dadara igre mala fuafusa katha ke kligna thotoku gna Bokis Blahi na. Eghuteuna mana mala fuafusa katha dadara igre fitu fata ka glose ke ulugna Bokis Blahi igne.

¹⁵ “Eghuteuna ke leghu na, mana mala aknu falehe nanigot gna fafara te mala ke doglo ghotilo ka tathagu iara na. Eghuteuna mana mala hata mei dadara gna na lamna ka Chogho te Thofno Blahi fara na, eghuteuna mana mala fuafusa lao katha ka thotoku gna Bokis Blahi na nei ka glose ke ulugna Bokis Blahi na, jateula teke eni ka dadara gna buluka ia eghu.

¹⁶ Eghume ka puhi igne, pris biꞌo tangomana te eni igne ka Chogho te Thofno Blahi fara na nei ka Suga Tapuale te Blahi na mala klino ka tathagu iara na. Eron mala jateula igne eghu ka nakhibodi naiknodi Israel naugna mare theome klino ka tathagu iara na.

¹⁷ Eghuteuna kate mei mana lamna ka Chogho te Thofno Blahi fara na te mala edi glepo ranghini mana balu tharakna gna nei iheire te gnafa Israel mala klino ka tathagu iara na, theo kaisei naikno te au lamna ka Suga Tapuale te Blahi na ghilei thokeni narane te gnafadi glepo igre.

¹⁸ “Eghuteuna ke leghu, Eron ginauna mala hata tei keha dadara buluka nei nanigot eghu mala lilisei ka Olta mala Gahu Fafara mala jaola klino mana. Mana mala lilisei dadara igre ka fati hona gna olta na,

¹⁹ eghuteuna mana ginauna mala tihi lao geghesu gna na ka dadara igne, eghuteuna fuafusa fitu fata ka olta na, eghuteuna ka puhi igne mana fablahini olta igne mala klino ka nakhibomi ghotilore.”

Nanigot mala hata fadelei nakhibodi naiknore

²⁰ Lord ne cheke eghu, “Kate fablahi te gnafa pris biꞌo Eron Chogho te Thofno Blahi fara igne, nei Suga Tapuale te Blahi na, nei Olta te mala Gahu Fafara na teu igre, mana ginauna hata mei nanigot te karha igne.

²¹ Eghuteuna Eron ginauna habo lao phei khame gna re ka phaꞌu gna nanigot igne, mala cheke fajifladi nakhibo te gnafa nei puhi te diꞌa te gnafa baludi puhi te diꞌa te gnafa te edi ghotilo ranghi ghau iara ra. Eghume ka puhi igne mana lisa lao nakhibo te gnafare ka nanigot tuana. Eghuteuna mana ginauna snakre tei nanigot igne ka kaisei mae tela vahinihi mare na. Mae tuana mala hata nanigot igne tei ka namono nagou.

²² Kate tei nanigot igne ka namono nagou na, naꞌa ginauna pala tei nakhibomi ghotilore ke kligna gna thegna ka vido te khaba aheva te theo kaisei naikno te au tagna.

²³ “Eghuteuna pris Eron ginauna ke pulo ke tei ruma ke lamna ka Suga Tapuale te Blahi, mala hata koko pohe fahaghe teke mei mala ruma lamna ka Chogho te Thofno Blahi fara na, mana mala lilisei pohe igre ka vido tuana.

²⁴ Eghuteuna mana mala apu ka vido blahi tuana, eghuteuna ke leghu mana mala fahaghe keha pohe mala eni nogna gloku na. Mana fahaghe nogna pohe ne jifla kosi mala fafara sipu nalhaꞌugna te thofno krono fara na mala hata fadelei nakhibo gna thegnare, eghuteuna mana fafara keha sipu nalhaꞌu gna na mala thofno krono fara mala hata fadelei nakhibodi naiknore.

²⁵ Mana mala hata garofadi glepo tautagu teke fafara re mala gahu ke kligna olta mala ke doglo ghotilo ka tathagu iara na.

²⁶ “Mae ihei teke vahini mare te mala hata te tei nanigot igne ka Asasel ka namono nagou na, mana mala titihi nogna pohere nei apu eghu ame tangomana nga mana teke figri ke lamnagna vido aheva te au ghotilo tagna na.

²⁷ Eghuteuna mare hata ne tei keha vidodi buluka igne nei nanigot eghu teke fafara pris biꞌo igne mala ke doglo ghotilo ka tathagu iara na, eghuteuna dadara teke hata teke mei pris Eron lamna ka Chogho te Thofno Blahi fara na. Mare mala hata tei thinidi phei glepo igre balu gulidi nei butudi eghu mala tei gnubra ke kosigna vido te au ghotilo tagna.

²⁸ Eghuteuna ke leghu, mare mala titihi nodi pohe re, nei apu fakeli eghu mala tangomana mare te mei lamna ka vido te au ghotilo tagna na.”

Keha vetula eidi Narane biꞌo te mala Hata Fadelei Nakhibo

²⁹ “Igne vetula eigna Narane biꞌo te mala Hata Fadelei Nakhibo te mala leghuni fabrahu ghotilo na. Leuleghu finogha, ka fafitu nhigra, ka fabotho narane gna na, ghotilo naiknomi Israel baludi keha naikno te au balumi ghotilo are, ghotilo te gnafa na mala thosei ghamu nei thosei eni kaisei gloku.

³⁰ Ka narane igne, pris biꞌo ginauna mala edi gobigna lepo teke chekedi iara te mala hata fadelei nakhibomi ghotilore mala ke klino ghotilo ka tathagu iara na.

³¹ Narane igne kaisei narane ulu mala gnafa fakeli ghotilo tagna jateula kaisei narane Sabat eghu. Eghume leuleghu finogha, ka narane igne, blahi te mala ghamu ghotilo na, eghuteuna jaola blahi te mala loku ghotilo na. Vetula igre ghotilo mala thofno leghudi fabrahu.

³² Pris biꞌo teke tofa oel blahi mare ka phaꞌu gna na te fablahi na mala ke tughuni kmagna na, mana tangomana te edi glepo te mala hata fadelei nakhibodi naiknore. Aonu, mana mala fahaghe nogna pohe mae pris biꞌo na.

³³ Mana mala fablahi Chogho te thofno Blahi fara na, nei Suga Tapuale te Blahi na, nei Olta te mala Gahu Fafara na, mala kafe klino ka tathagu iara na. Eghuteuna ka narane tuanala mana mala edi mae pris nei naiknodi Israel teu igre mala klino ka tathagu iara na.

³⁴ “Vetula igre ghotilo mala leghudi fabrahu. Kaisei narane kolho leghu finogha na ghotilo mala edi glepo igre ka narane biꞌo igne mala hata fadelei nakhibomi te gnafa ghotilore.” Eghume, Eron neke leghudi unha teke chekedi Lord ka Moses.