Levitikas 14 - Buka Blahi Ka Cheke Holo

Vetula te mala kelini ihei te au fogra diꞌa ka thini gna na mala klino ka tathagnaLord

¹ Lord ne cheke eghu ka Moses,

² “Igne vetula malagna ihei te gnafa fogra te diꞌa teke au ka guli gna na. Igne puhi te mala klino ka tathagu iara: mare atha mei ni mana mala filoni pris,

³ eghuteuna pris mala jifla ka vido te au ghotilo tagna na, eghuteuna mana mala tei filoni mana te au teu kosi na. Ka vido tuana pris mala fifilo fakeli ka thini gna mana na. Jame fogra diꞌa ka thinigna mana igne la mafohi,

⁴ pris chekedi naiknore mala atha mei phei nafnata nanghaji te klino te naba gna fafara igne balu kaisei gaju sida, nei kaisei gnarho ukru ikoi, nei kaisei grege gaju te kiloi hisop.

⁵ Eghuteuna pris ginauna chekedi mare mala atha mei kaisei ka phei nanghaji igre, eghuteuna mana mala loku fakligna gna kaisei suspen thina te fodu ka khoꞌu glokha. Eghuteuna mana mala aknu falehe nanghaji igne mala thofa lao dadara gna na ke lamna gna suspen thina igne.

⁶ Pris ginauna atha keha nanghaji te karha teuna balu gaju nei gnarho nei grege hisop tuare. Eghuteuna lisei lao gobigna lepo igre ka dadara tuana,

⁷ aonu pris na fuafusa katha dadara fitu fata ka mae ihei te magnahaghei klino ka tathagu iara Lord. Mana mala cheke thakleni mae igne tekela salhu na. Eghuteuna mana lisani keha nanghaji na mala tei nogna.

⁸ “Ke leghu, mae igne mala titihi fagae nogna pohe re eghuteuna ghoighori khakla gnare, eghuteuna mana mala apu, eghuteuna kate edi mana glepo igre, mana ginauna klino ka tathagu iara na. Funu ka narane tuana, mana tangomana te mei lamna ka vido aheva te au ghotilo tagna na, nu mana theome tangomana te tei lamna ka nogna suga tapuale na. Mana mala thuru kosi ka nogna suga tapuale na ghilei thokedi fitu narane.

⁹ Eghuteuna ka fafitu narane na, mana mala fapea fata ghoighori khakla ka phaꞌu gna na, balu gremoho gna, eghuteuna khakla ka tatha gnare, eghuteuna khakla te gnafa ka thini gnare, eghuteuna mana mala titihi nogna pohe na, eghuteuna mana mala apu. Ka puhi igne, mana la gaehi ka tathagu iara na.

¹⁰ “Ka fahana narane na, mae igne mala atha mei phei sipu nalhaꞌudi ikodi balugna kaisei sipu gaꞌase gna ikoi te kaisei finogha, eghuteuna thilo glepo igre theo kaisei thona ka thinidi re. Eghuteuna mana mala atha mei fafara ka thilo kilo flaoa ka famane wit teke ngigno fodu mare ka oliv oel, eghuteuna mana jaola mala atha mei kaisei kapu oliv oel biꞌo.

¹¹ Eghuteuna pris ginauna mala atha mei mae igne balu nogna fafara, eghuteuna phia mare mala mei ke ulugu iara Lord ka grengatha gna Suga Tapuale te Blahi na.

¹² “Eghuteuna pris mala atha kaisei ka sipu igre, balu kapu oliv oel biꞌo, eghuteuna eni poloru fafara gna mae igne. Pris mala pala haghe phei glepo igre ke ulugu iara jateula fafara eghu ka iara.

¹³ Mana mala aknu falehe sipu igne lamna ka vido gna Suga tapuale te Blahi na, ka vido te mala aknu falehe glepo tautagu gna fafara tuana mala ke doglo naikno na ka tathagu iara na eghuteuna fafara te thofno knoro. Igne mala aknu falehe ka vido tuana naugna nafnahi gna poloru fafara tuana mala ke doglo naikno na ka tathagu iara na fafara te thofno krono tuana. Mana mala aknu falehe ka vido tuana naugna nafnahi gna poloru fafara tuana thofno blahi fara, eghuteuna mala ghedi mae pris kolho jateula nafnahi gna fafara tuana mala ke doglo naikno na.

¹⁴ Mana mala atha keha dadara gna sipu ikoi igne, eghuteuna mana mala fa bothu ka vido te pila fei khuli nhetagna mae igne, nei ka geghesu biꞌo fei khame nheta, nei ka geghesu biꞌo fei ghahe nheta gna mana.

¹⁵ Aonu pris ginauna atha oliv oel nei tofa ka khame maeri gna thegna na.

¹⁶ Eghuteuna mana ginauna fabothu lao geghesu fei khame nheta gna na ka oliv oel igne, eghuteuna mana fuafusa fitu fata ka glose na ke ulugu iara.

¹⁷ Pris ginauna atha oliv oel teke salaꞌu teku na ka khame maeri gna na, nei fabothu lao fei nheta ka vido phiapila khuli gna mae tuana, nei ka geghesu biꞌo ka khame nhetagna mana na, nei ka geghesu biꞌo ka ghahe nhetagna na, kligna ka dadara gna sipu teke nanhaꞌa tekuhi na.

¹⁸ Ke leghu, vido oliv oel salaꞌui teku ka khame gna pris na, mana mala tofa lao ka phaꞌugna mae tuana. Eghume ka puhi igne, mana eni mae tuana mala klino ka tathagu iara na.

¹⁹ “Ke leghu, pris mala aknu falehe sipu gaꞌase gna na mala ei fafara mala ke doglo mae tuana ka tathagu iara na, eghuteuna mana mala jaola ke aknu falehe keha sipu nalhaꞌu gna na mala eni fafara te thofno krono na.

²⁰ Eghuteuna mana mala gahu ke kligna olta mala tarai nei pogho soru eghu ka iara, balu fafara ka flaoa ka famane wit. Ka puhi igne, pris eni mae igne mala klino mana ka tathagu iara Lord na.

²¹ “Jame kaisei mae kuma fara, eghuteuna mana theome tangomana te atha te mei thilo sipu te edi fafara igre, mana tangomana te atha kaisei sipu nalhaꞌu gna te ikoi kolho mala eni fafara poloru igne mala klino mana ka tathagu iara na. Pris mala pala haghe sipu igne ka tathagu iara na jateula kaisei fafara eghu ka iara. Eghuteuna mala eni fafara igne ka flaoa ka famane wit, mana mala atha kaisei kilo flaoa te ngigno balu oliv oel, eghuteuna mana mala jaola atha kaisei kapu oliv oel biꞌo.

²² Eghuteuna mana mala atha mei phei balhu ba phei thukmu majaghani unha te naba te foli mana na. Kaisei mala fafara mala ke doglo mana ka tathagu iara na, eghuteuna keha na mala eni fafara te thofno krono.

²³ “Ka fahana gna narane na, mae igne mala atha mei glepo igre mala tusu lao ka pris ka grengatha gna nogu Suga Tapuale te Blahi iara Lord.

²⁴ Eghuteuna pris mala atha mei sipu igne balu kapu oliv oel biꞌo mala eni nogna fafara poloru mae tuana. Pris mala pala haghe phei glepo igre ke ulugu iara jateula fafara eghu ka iara.

²⁵ Mana mala aknu falehe sipu malagna fafara poloru igne eghuteuna mana mala atha keha dadara gna, nei fa bothu lao ka vido phiapila khuli fei nheta gna mae tuana, nei ka geghesu biꞌo fei khame nheta, nei ka geghesu biꞌo fei ghahe nheta gna mana.

²⁶ Pris mala atha oliv oel eghuteuna mana mala jaola tofa keha ka khame mairi gna thegna na.

²⁷ Eghuteuna mana mala tihi lao geghesu fei khame nhetagna na ka oliv oel igne, eghuteuna mana mala fuafusa fitu fata ka glose na ke ulugu iara.

²⁸ Eghuteuna mana mala atha ka khame mairi gna na oliv oel teke salaꞌu teku na mala fabothu lao ka phiapila khuli fei nheta gna mae tuana, nei ka geghesu biꞌo fei khame nhetagna, nei ka geghesu biꞌo fei ghahe nhetagna, kligna ka dadara gna sipu teke kulu auhi na mala fafara.

²⁹ Vido oliv oel au teku ka khame gne mana igne tofa lao ka phaꞌugna mae tuana. Ka puhi igne, mana ginauna eni mae tuana mala klino ka tathagu iara na.

³⁰ Aonu mana mala fafara mei ka iara phei balhu ba phei thukmu majaghani naba unha mana tangomana te foli.

³¹ Kaisei na mala ei fafara mala ke doglo mana ka tathagu iara na, eghuteuna keha na mala fafara eigna te mala thofno krono na. Eghuteuna mana mala gahu fapea balhu na kligna olta na fodu balugna fafara flaoa ka famane wit. Ka puhi igne, mana eni mae tuana mala klino ka tathagu iara na.

³² “Igre vetula maladi iheire te kuma te theome tangomana te foli sipu te mala fafara na. Mae te kuma igre mala thofno leghudi jame fogra te diꞌa ka guli gna mana igne gnafa eghuteuna mana magnahaghei te klino ka tathagu iara na.”

Thona diꞌa kotu ka gringni gna suga na

³³ Lord ne cheke eghu ka Moses ghe Eron,

³⁴ “Kate tei ghopa te atha glose gna Kenan nate tusu ari iara ka ghotilo te mala khotogna fabrahu igne, eghuteuna jame kaisei naikno filoni kaisei thona teke lilisei iara te kotu ka gringni gna nogna suga na,

³⁵ mae khoto gna suga tuana tei cheke ka pris glahu kaisei fogra diꞌa te kotu ka gringni gna nogna suga na.

³⁶ Aonu pris ginauna cheke ka mae khoto gna suga na mala pala fajifla gobigna lepore ka suga na ame tangomana nga mana tei fifilo fakeli ka thona igne teuna, glahu gobigna lepo teke au ka suga igne theome klino ka tathagu iara na. Eghuteuna ke leghu, pris mala ke tei lamna ka suga tuana.

³⁷ Eghuteuna mana mala fifilo fakeli ka thona te kotu ka nogna gringni na. Jame te filoni mana thona igne roi kakarha kakatha ba roi ukru kakatha eghuteuna thona igne au lamna ka gringni gna nogna suga mana na,

³⁸ eghuteuna mana mala jifla kosi mala bibilakhi suga na mala kroghau ghilei thokeni fitu narane.

³⁹ Eghuteuna ka fafitu narane na, pris mala ke pulo mei ka suga na mala ke fifilo fakeli tagna. Eghuteuna jame thona te diꞌa igne ikotongana ka gringni gna Suga na,

⁴⁰ mana mala chekedi mare mala atha koko thina ka gringni gna suga aheva thona te diꞌa igne te kotu tagna na. Mare mala pala tei thina igre mala tei koko delei ka vido aheva te theome klino ka tathagu iara na.

⁴¹ Eghuteuna pris mala jaola grahi koko plasta te au ka gringni thina te gnafa lamna suga igre, eghuteuna mare mala tei koko ke kosi namono, ka vido aheva te theome klino ka tathagu iara na.

⁴² Mare mala atha keha thina majaghani mala ke tughudi te diꞌa te atha kokore, eghuteuna mare mala ke tughu plasta majaghani ka gringni igre.

⁴³ “Nu jame thona igne ke thakle mei ke leghudi teke atha koko mare gobigna lepore teke babana fapulo gringni igne,

⁴⁴ pris mala ke tei fifilo fakeli ka suga igne. Eghuteuna jame thona diꞌa igne ke ikotongai, te eghu na thona diꞌa igne goigoni suga, eghuteuna theome klino ka tathagu iara na.

⁴⁵ Eghume mare mala pa'e soru suga igne, eghuteuna pala tei thina te gnafa baludi thaba nei chara re eghu mala tei ke kosi namono mala koko ka kaisei vido te theome klino ka tathagu iara na.

⁴⁶ “Iagho laseni, ihei te tei lamna ka suga igne ka narane pris te bobotho igre, mana theome klino ka tathagu iara na, eghuteuna mana na theome klino ghilei rafi.

⁴⁷ Eghuteuna ihei te thuru ba ghamu lamna ka suga igne, mana mala titihi nogna pohere.

⁴⁸ “Nu jame pris tei fifilo ka suga igne, eghuteuna mana filoni thona igne neke theome ke jifla mei ke leghugna narane teke lilisei plasta majaghani na, mana mala chekeni suga tuana klino ka tathagu iara na, naugna thona tuia la gnafahi.

⁴⁹ Te mala klino suga tuana ka tathagu iara na, pris mala atha mei phei nanghaji, balu kaisei gaju sida, nei kaisei gnarho ukru ikoi, nei kaisei grege gaju hisop ikoi.

⁵⁰ Mana atha kaisei ka phei nanghaji igre, mala loku haghe ke kligna gna kaisei suspen thina te fodu ka khoꞌu glokha. Eghuteuna mana aknu falehe nanghaji igne mala thofa soru dadara gna na ka suspen te fodu ka khoꞌu glokha igne.

⁵¹ Eghuteuna mana ginauna atha keha nanghaji te karha teuna, balu gaju sida nei gnarho ukru nei grege hisop, eghuteuna tihi lao gobigna lepo igre ka dadara gna nanghaji teke aknu falehe ia ngigno balu khoꞌu. Aonu mana fuafusa fitu fata ka suga na.

⁵² Ka puhi igne, mana atha dadara gna nanghaji teke ngigno balu khoꞌu glokha ia, eghuteuna nanghaji te karha balu gaju nei hisop nei gnarho teu igre mala eni suga igne klino ka tathagu iara na.

⁵³ Eghuteuna ke leghu, pris igne ginauna atha nanghaji tuana tei ka sare ke kosi namono mala lisa teini, mala flalo tei delei. Ka puhi igne, pris eni suga igne mala klino ka tathagu iara na, eghuteuna suga igne ginauna klino hi.”

^54-57 Igre vetula eidi fogra diꞌa ka guli, nei thubu, nei nhuge, nei bakua, nei flea te diꞌa te au ka pohe ba ka gringnidi suga. Vetula igre mala lasedi ghotilo jame kaisei naikno ba kaisei glepo klino ka tathagu iara na, ba theome klino.