Levitikas 11 - Buka Blahi Ka Cheke Holo

Glepo tautagu naba te mala ghamu

¹ Lord ne tusu lao vetula ka mae Moses ghe mae Eron

² mala cheke phiamare ka naiknodi Israel. Mana ne cheke eghu, “Ghotilo tangomana te ghamu glepo te tautagu

³ te fnota phei thatabla ghahegna eghuteuna reꞌe tangomana te ghamu buburu jateula buluka eghu.

^4-6 “Nu nafnata glepo tautagu te jateula kamel, nei nakusi biꞌo te tangomana te au ka khora thina, nei rabet, neuba reꞌe ne ghamu buburu jateula buluka neu, nu thatabladi re theome fnota pea, eghume glepo igre blahi te mala ghamu ghotilo na. Nafnata glepo tautagu igre theome klino ka tathagu iara na.

⁷ Eghuteuna bosu na, neuba thatablagna na ne fnota pea, nu ghotilo thosei ghamu, naugna ne theome ghamu buburu jateula buluka neu. Blahi te ghamu ghotilo na, naugna ne theome klino ka tathagu iara na.

⁸ Ghotilo thosei ghamu nafnahidi re, eghuteuna jame te lehe reꞌe na, ghotilo jaola thosei habo tadi. Glepo tautagu igre theome klino ka tathagu iara na.

⁹ “Glepo karha te au ka khoꞌu ba ka thongna teu au thingodi nei khapudi teu igre ghotilo tangomana te ghamu na.

¹⁰ Nu ghotilo thosei ghamu glepo te au lamna khoꞌu ba lamna thongna te theome au thingodi nei khapudi teu are.

¹¹ Nafnata glepo igre thono theome keli nei theome klino eghu ka tathagu iara Lord na, eghuteuna ghotilo thosei habo ka thinidi tela lehehi re.

¹² Gobigna lepo te au ke lamna khoꞌu ba ke lamna thongna te theome au thingodi nei khapudi teu igre, ghotilo lasedi glepo igre thono diꞌa fara.

^13-19 “Igre keha nafnata nanghaji te thosei ghamu ghotilo re: Gaghata, saroko, nakrudu, gleghaha, chiochio, nei nasihe. Nafnata nanghaji igre thono diꞌa fara.

²⁰ “Ghotilo thosei ghamu nafnata momogo te lase flalo nei lase tagu ka ghahedi re teu igre, ghotilo lasedi glepo igre thono diꞌa fara.

^21-22 Nu keha nafnata momogo te lase ghasa tafri igre klino ka tathagu iara na. Nafnata cheche nei khupo teu igre te tangomana te ghamu ghotilo na.

²³ Nu keha momogo te lase flalo nei tagu ka ghahedi re teu igre ghotilo lasedi glepo igre thono diꞌa fara.

²⁴ “Jame kaisei naikno ka ghotilo haboni thinigna kaisei glepo tautagu te theome klino teke lehe na, mana ginauna theome klino ka tathagu iara na ghilei rafi.

²⁵ Ihei te pala kaisei glepo tautagu te theome klino teke lehe na mana mala titihi nogna pohe re, eghuteuna mana theome klino ka tathagu iara na ghilei rafi.

²⁶ Ghotilo lasedi keha nafnata glepo te tautagu igre theome klino ka tathagu iara na. Nafnata glepo te tautagu igre thatabladi re theome fnota pea, ba theome ghamu buburu jateula buluka eghu. Nafnata glepo te tautagu igre theome klino ka tathagu iara na eghuteuna jame ihei te haboni thinigna kaisei glepo te tautagu teke lehe na, mana ginauna jaola theome klino ka tathagu iara na.

²⁷ Ghotilo lasedi nafnata glepo te tautagu te theome fnota pea thatabladi re te jateula khuma teu igre theome klino ka tathagu iara na. Nafnata glepo te tautagu igre theome klino ka tathagu iara na eghuteuna jame ihei te haboni thinigna kaisei glepo te tautagu te lehe na. Mana ginauna jaola theome klino ghilei rafi.

²⁸ Ihei te pala thinigna kaisei glepo te tautagu teke lehe na, mana mala titihi fagae nogna pohe na eghuteuna mana na theome klino ka tathagu iara na ghilei rafi.

^29-30 “Keha nafnata glepo te tautagu te lase nolo ka glose igre jaola theome klino ka tathagu iara na: Nakusi, nei thotoli, nei garo.

³¹ Jame ihei te haboni thinigna kaisei glepo te tautagu teke lehe na, mana ginauna na theome klino ka tathagu iara na ghilei rafi.

³² Eghuteuna jame kaisei ka glepo te tautagu igre lehe eghuteuna khoko soru ka kaisei glepo, neuba glepo igne ne khoko soru ke kligna kaisei vido thaba, ba ka pohe, ba ka guli glepo te tautagu, ba ka baeg, glepo igne theome klino ka tathagu iara na. Neuba ghotilo ne eni glepo igne ka unha nafnata gloku, ghotilo mala lilisei lamna khoꞌu, ginauna na theome klino ghilei rafi, nu ke leghu na nake klino fapulo.

³³ Ba jame kaisei ka glepo te tautagu igre lehe, eghuteuna khoko soru ke lamna suspen teke horo mare ka glose. Aonu, gobigna lepo ke lamnagna suspen igne theome klino ka tathagu iara na, eghuteuna ghotilo mala jaola poposa suspen igne.

³⁴ Jame ghotilo titihi kaisei famane gano ka khoꞌu te au ke lamnagna suspen tuana, gano igre theome klino ka tathagu iara na. Ba jame kaisei glepo te keli mala koꞌu au ke lamnagna suspen tuana, glepo tuana ginauna jaola theome klino ka tathagu iara na.

³⁵ Jame kaisei nafnata glepo tautagu ka igre lehe, eghuteuna khoko soru ka kaisei nomi glepo ghotilo, glepo igne theome klino ka tathagu iara na. Ba jame glepo te tautagu igne lehe eghuteuna khoko soru ka kaisei biti teke horo ka glose ba ka kaisei suspen glose biꞌo te mala kuki bret mare tagna na, ghotilo poposa naugna theome klino ka tathagu iara na.

³⁶ Jame nafnata glepo te tautagu igne lehe ne khoko soru ka glokha khoꞌu, ba ka seu, phei glepo igre klinou ka tathagu iara na. Nu ihei te haboni thinigna nafnata glepo tautagu te lehe igne theome klino ka tathagu iara na.

³⁷ Jame glepo tautagu igne lehe ne khoko soru ka kaisei nafnata khatu mala joꞌu, khatu igre klinou ka tathagu iara na.

³⁸ Nu jame ghotilo lilisei khatu igre ka khoꞌu, eghuteuna kaisei glepo tautagu lehe ne khoko soru ka khatu igre, khatu igre theome klino ka tathagu iara na.

³⁹ “Jame kaisei glepo tautagu te naba te mala ghamu ghotilo na lehe thegna, eghuteuna ihei te habo tagna na, mana theome klino ka tathagu iara Lord na ghilei rafi.

⁴⁰ Ba jame kaisei mae ghamu nafnahigna kaisei glepo tautagu teke lehe thegna, mana mala titihi nogna pohe na, eghuteuna mana ginauna na theome klino ka tathagu iara na ghilei rafi. Eghuteuna jame ihei te pala glepo tautagu igne na, mana mala titihi nogna pohe na, eghuteuna mana ginauna na theome klino ka tathagu iara na ghilei rafi.

⁴¹ “Glepo tautagu te ikodi te tagu tafri ka glose na igre, thono diꞌa fara, eghuteuna blahi te mala ghamu ghotilo na.

⁴² Neuba reꞌe ne agra tafri ka thiꞌadi re, ba au fati ghahe, ba au kmana ghahe, reꞌe kafe thofno diꞌa fara.

⁴³ Ghotilo thosei ghamu kaisei ka glepo tautagu igre. Jame te ghamu ghotilo na, ghotilo ginauna na theome klino ka tathagu iara na.

⁴⁴ Iara Lord nomi God ghotilo, eghume ghotilo mala klino ka tathagu iara na, eghuteuna ghotilo mala au blahi naugna iara au blahi. Eghume ghotilo thosei ghamu kaisei nafnata glepo tautagu igre nate fathona ghami ghotilo ka tathagu iara na.

⁴⁵ Naugna iara, Lord, iara neke atha fajifla ghami ghotilo Ijep, mala tangomana iara te nomi God ghotilo na. Eghume, ghotilo mala au blahi naugna iara blahi.

⁴⁶ “Igre vetula te cheke eidi nafnata glepo te tautagu, nei nafnata nanghaji, nei nafnata sasa baludi keha glepo ka khoꞌu, nei keha nafnata momogo.

⁴⁷ Ghotilo mala famane ghaoghatho fakeli mala vavahi glepo te klino ka tathagu iara na, nei glepo te theome klino ka tathagu iara na. Eghuteuna ghotilo mala jaola vavahi ka glepo te karha naba te mala ghamu ghotilo na, nei glepo te blahi te mala thosei ghamu ghotilo na.”