Levitikas 10 - Buka Blahi Ka Cheke Holo

Nakhibodi mae Nadab ghe mae Abihu

¹ Aonu mae Nadab ghe mae Abihu phei thugna mae pris biꞌo Eron igre, phia mare ne atha phei dis, mala lilisei nakrofu khaꞌaghi te ngaja. Eghuteuna phia mare ne lilisei insens ka khaꞌaghi, aonu phia mare atha ne ruma lamna ka vido aheva te au Lord na. Nu khaꞌaghi igne ne theome blahi naugna Lord neke theome chekedi phia mare te mala eni igne.

² Aonu khaꞌaghi igne megei nga ne jifla mei ka vido aheva te au teu Lord na ne gnhubra ne lehe phia mare ke ulugna mana.

³ Aonu mae Moses ne cheke eghu ka mae Eron, “Igne gaoghatho gna unha teke cheke eghu Lord ia: “ ‘Iara ginauna fakakhana te blahi iara ka iheire te mei namo ka iara na. Eghuteuna nogu naikno iara gre ginauna fafnaknoni nogu nolaghi iara na.’ ” Nu mae Eron ne au kmu kolho.

⁴ Aonu mae Moses ne kilodi mae Misael ghe mae Elsafan phei thugna mae Usiel nebugna mae Eron. Mana ne cheke eghu ka phia mare, “Ghopa mei mala pala tei delei thinidi phei mae kherada igre. Ghopa atha fajifladi phiamare ka Suga Tapuale te Blahi igne mala tei lilisei ke kosigna vido te au tahati tagna ana.”

⁵ Aonu phiamare mei ne loku ka pohe phiamare re pala ne jifla kosi jateula te chekeni mae Moses na neu.

⁶ Mae Moses ne cheke eghu ka mae Eron baludi phei thugna mana igre, mae Eleasa ghe mae Itama, “Ghotilo thosei fakakhana te diꞌanagnafa ghotilo ka glehedi phia mae igre, eigna ghotilo mala thosei pore, ba rerheku nomi pohere. Jame te eghu ghotilo na, Lord ginauna diꞌatagna na falehe ghami ghotilo. Nu kherami te gnafa ghotilo Israel igre tangomana te tanhidi phia mae te lehe ka khaꞌaghi teke kuru mei Lord igne.

⁷ Ghotilo thosei jifla ka grengathagna Suga tapuale te Blahi na. Jame te jifla ghotilo ka vido tuana na, ghotilo ginauna lehe, naugna iara neke taofi ghami ghotilo hi ka nogna oel blahi Lord.” Aonu thilo mare ne eni jateula teke chekeni mana na neu.

Nogna vetulaLordranghidi mae pris

⁸ Lord ne cheke eghu ka mae Eron,

⁹ “Jame iagho ba kaisei thumu iagho koꞌu waen ba beer, ghotilo thosei mei ruma lamna ka Suga tapuale te Blahi igne. Jame kaisei ka ghotilo huhughuni blahi igne mana ginauna lehe. Igne kaisei vetula te mala tathaji fabrahu tharaknamu iagho na.

¹⁰ Ghotilo mala ghaoghatho fakeli mala vahidi glepo te blahi nei glepo te theome blahi, nei mala vahidi glepo te klino nei glepo te theome klino ka tathagu iara na.

¹¹ Eghuteuna vetula teke tusu lao iara ka mae Moses ra, ghotilo mala farirhiudi naiknodi Israel.”

¹² Aonu mae Moses ne cheke ka mae Eron nei ka phei thugna mana mae Eleasa ghe mae Itama, phei thugna mana te karha nga teu, mana ne cheke eghu, “Kate atha te mei naiknore flaoa teke eni ka famane wit na, ghotilo tangomana te atha flaoa blahi te theome krono igne mala ei bret te theo isi gna. Eghuteuna leuleghu fata na, ghotilo ghamu bret igne rhegna olta kolho, naugna blahi fara.

¹³ Ghotilo mala ghamu ka kaisei vido blahi, naugna nogna glepo blahi Lord teke tusu ari ka ghotilo. Cheke igne, Lord teke cheke ka iara na mala cheke ka ghotilo.

^14-15 Nu babangogna nei grege ghahe fei nhetagna eghu glepo tautagu teke pala iagho teke tusu lao ka Lord baludi garofadi teu fafara blahi igne, nafnahi igre ghemi ghotilo. Ghotilo baludi thumi nalhaꞌu nei thumi gaꞌase teu ghotilo are, ghotilo te gnafa na tangomana te ghamu na. Eghuteuna ghotilo mala ghamu nafnahi igre ka vido te klino ka tathagna Lord. Nafnahi teke jifla mei ka glepo blahi gna fafara te mala laseni mare te au fakeli balugna Lord, nafnahi igne malami ghotilo fabrahu nei vikemi ghotilo are, jateula teke chekeni Lord igne eghu.”

¹⁶ Mae Moses ne ghusnadi thilo mare eigna nanigot teke fafara te mala doglo naiknore ka tathagna Lord. Nu mana ne laseni te Eleasa ghe mae Itama phei thugna mae Eron te karha teu igre, phiamare la gnubrahi. Kate filoni mana puhi igne, mana ne diꞌatagna fara ka phiamare, ne cheke faheta eghu ka phiamare,

¹⁷ “Fafara igne mala doglo naikno te gnafare ka tathagna Lord! Eghume naugna unha si ghotilo te theome ghamu thofno nafnahi blahi igne ka glalaba blahi gna Suga tapuale te Blahi gnea?

¹⁸ Theo kaisei naikno teke atha dadaragna fafara igne te tei ruma lamna ka Chogho Blahi na, eghume nafnata fafara te ghamu ghotilo nafnahigna ka vido blahi aheva te nabagna, jateula te chekeni iara ia eghu. Nu neuba, ghotilo la thofno gnubrahi.”

¹⁹ Aonu mae Eron ne cheke eghu ka mae Moses, “Nu jame gognaro gne, iara neke ghamu nafnahigna fafara te mala doglo mare ka tathagna Lord, jau Lord na theome tangomana te gleꞌa balugu iara na! Iagho laseni, gognarona phei mae thugu iara ra neke fafara mala doglo naiknore ka tathagna Lord, eghuteuna phiamare neke eni fafara te thofno krono na, nu puhi biꞌo igne ne thoke ghau iara.”

²⁰ Eghuteuna kate nomhi mae Moses igne, unha te chekeni mae Eron igne thofno doglo kolho ka Moses.