Lamentations 5 - Buka Blahi Ka Cheke Holo

Profet ne tarai kaLordmala kokhonidi naiknore

¹ Lord, ghathoni sagho puhi biꞌo te thoke ghami ghehati igne. Eghuteuna iagho jaola filoni eigna ghehati la mamaja nomi fara.

² Namono teke tusu mei iagho ka ghehati igre baludi nomi suga igre eghu gognarona au ka khamedi maedi delei te mei au ka nomi namono ghehati igre.

³ Ghehati gognarona jateula sua te theo idodi nei kmadi teura eghu, eghuteuna idomi ghehati na jateula tela lehehi khetogna na ra eghu.

⁴ Ghehati mala foli khoꞌu mala koꞌu ghemi, eghuteuna theome naba sileni te mala foli gaju te mala kuki na.

⁵ Mae naoka gre para ghami ghehati, eghuteuna ghehati theome gnafa ka gloku na babaꞌo fara.

⁶ Ghehati lisa soru ghami themi ke parigna nodi nolaghi naiknodi Ijep ghe Asiria mala tangomana ghehati te au gano karha teuna.

⁷ Kuꞌemi ghehati tifa ra neke tapla jafra ka nakhibo, nu la kafe lehehi eghu, eghuteuna gognarona ghehati papara fara eidi nakhibodi mare igre.

⁸ Mae gloku kolho te funei fruni ghami ghehati na, eghuteuna theo kaisei naikno te tangomana te hata fajifla ghami ka nodi nolaghi mare na.

⁹ Ghehati nabami te tei mata mala hiro gano, nu ninhigrana fara eghu, naugna mae te aknu poru re au tafri ke lamna namhata te krogha.

¹⁰ Ghehati fagrutu fara, naugna ghehati rofo ne salaꞌui.

¹¹ Mae naoka mei goigoni gaꞌasedi Jerusalem, nei gaꞌasedi ka namono te gnafa Juda.

¹² Mare haru gnarho graradi mae mala baubatu ka ghehati re, eghuteuna mare theome ghatho tahudi mae biꞌore.

¹³ Mare huhurudi mae majaghani re mala tugha thina biꞌo te mala ghorhu wit te mala ei flaoa re. Eghuteuna mae sitei re mala pala nanhiꞌo gaju te tahu fara mala gahu gano.

¹⁴ Mae mala baubatu re theome gnokro ka vido mala fari thafoi ka namono na, eghuteuna mae majaghani re theome lalahu gita.

¹⁵ Ghehati theome tangomana te glealeꞌa na. Tifa na ghehati neke tangomana te ragi nei glealeꞌa teuna, nu gognarona ghehati au diꞌanagnafa nei tanhi eghu kolho.

¹⁶ Glepo teke fahaehaghedi ghehati ra, gognarona theo nafudi kolho. Kokhoni ghami fara, naugna ghehati gne tapla jafra ka nakhibo!

¹⁷ Naudi naꞌau papara igre ghehati fadiꞌa ghami fara, eghuteuna ghehati diꞌanagnafa nei tanhi eghu fabrahu ghilei theome tangomana te fifilo na.

¹⁸ Ghehati au diꞌanagnafa nei tanhi eghu fabrahu, naugna Thogele Saion na la vuhai namono nagou aheva khuma mata kolho te au jare na.

¹⁹ Nu iagho Lord, iagho king fabrahu tifa tifa.

²⁰ Naugna unha sagho te ghatho iho ghami ghehati fabrahu gnea? Naugna unha sagho te tirou ghami ghehati gnea?

²¹ Lord, ghehati tore nigho mala hata fafigri ghami ka iagho, nei mala au glealeꞌa jateula teke tifa ra eghu!

²² Nu iagho theome magnahaghei ghami ghehati fara! Diꞌatamu iagho ka ghehati igne ginauna theome gnafa.