Lamentations 4 - Buka Blahi Ka Cheke Holo

Ke leghugna narane teke mei naoka teke roꞌeni Jerusalem

¹ Tifa na noda gol tahati gre, ulu lahudire neke famane siasigla fara, nu gognarona thofno thona fara. Eghuteuna thina blahi ka Sugagna Lord na igre, naga tafri ke lamna nabrou.

² Mae majaghanidi Jerusalem, mare neke keli fara jateula gol ra neku. Nu gognarona naiknore ghatho faparidi mare, jateula suspen te theo nafudi ra eghu kolho.

³ Neuba idogna khuma mata na famane fachuꞌuni thugna na. Nu nogu naikno iara gre gognarona theome fanomho jateula nanghaji biꞌo te tirogna reireghidi thugna ra eghu.

⁴ Goro sua gegeꞌe re rodi koꞌu fara. Goro sua te ikodire tore ghedi gano, nu theo kaisei naikno te tusu ranghidi.

⁵ Tifa na, naiknore neke ghamu gano te keli. Gognarona, mare rofo lehe kolho ke lamna nabrou. Iheire teke biꞌo haghe ka sugadi mae te dedei ra, gognarona mare hiro gano ka chara.

⁶ God neke roꞌeni kaisei fata kolho namono Sodom, eghuteuna theo kaisei naikno te toghodi naiknogna namono tuana. Nu naꞌau papara te thokedi nogu naikno iara igre thofno diꞌa fara salaꞌuni nodi naꞌau papara naiknodi Sodom tifa ra.

⁷ Tifa na, mae biꞌore neke klino fara, neke famane filodi re. Mare nheta fara eghuteuna theo kaisei fogra te tangomana te thokedi mare.

⁸ Nu gognarona tathadi nei foflodi teure thona jateula nakrofu khaꞌaghi eghu, eghuteuna naiknore theome tangomana te filo glanidire. Mare nhubradi kolho eghuteuna thinidi re mojadi tahu jateula gaju eghu.

⁹ Mare theo ghedi gano ka nagare, eghuteuna mare thono rofo nodi fara. Te keli na mare nabadi te lehe na, jateula iheire te lehe ka magra ra eghu.

¹⁰ Tifa na, idodi suare reireghi fakelidi thudire. Nu kate goigonidi God nogu naikno iara igre na, idodi re aknu falehe sua igre mala gahu ghamu.

¹¹ Lord ne thono diꞌatagna fara, eghuteuna diꞌatagna mana igne jateula khaꞌaghi biꞌo te tofa soru te gnhubra Jerusalem ra neu ne ghilei glose kolho te au na.

¹² Theo kaisei king ba kaisei fiti mae kolho ka nauthoglu igne te fatutuani nate ruma lamna mae naoka te goigoni ni namono biꞌo Jerusalem.

¹³ Nu naoka gre ne jugru lamna, naugna mae profet nei mae pris teu igre ne ei puhi te diꞌa ke lamnagna namono igne. Mae igre aknu falehe naikno te doglo re.

¹⁴ Mae mala baubatu igre tei tafri jateula mae te dofu eghu ke lamna nabrou biꞌo. Mare fathonadi thedi ka dadara, mala theome tangomana kaisei naikno te habo ka nodi pohe mare re.

¹⁵ Naiknore ne eha eghu fabiꞌo ka mare, “Tei nomi delei! Ghotilo thosei habo ghami ghehati! Ghotilo theome gae ka tathagna God na!” Eghuteuna kate rikha tafri mare na, naiknodi keha kantri igre ne cheke eghu ka mare, “Mare theome tangomana te au balumi ghehati agne na!”

¹⁶ Lord diꞌatagna fara ne fariki raka tafridi mala tei au tafri mare delei. Mana jaola theome magnahaghei te ghatho tahudi hatimare mae pris. Eghuteuna mana theome kelitagnadi hatimare mae mala baubatu igre.

¹⁷ Tahati jaola toetoe fakelini ihei nate mei togho ghita na. Jateula mae te toetoe teu ke kligna thoa ra eghu, tahati ofoni kantri te fofodu ka tahati na mala mei eghu, nu kantri igne theome tangomana kolho te totogho na.

¹⁸ Mae naoka gre tapla leghu ghita fabrahu, mala theome tei tahati ke lamnagna namono na. Uve, thofno glola fara te noda narane tahati na la gnafahi teuna.

¹⁹ Noda naoka tahati gre flalo jateula gaghata te flalo te soru te hata ghegna gano ra eghu. Mare ngolhi ghita ke kligna thogele, eghuteuna poru ka namono nagou mala loki ghita.

²⁰ King igne neke vavahi Lord, mana jateula te louloku teu eghu nakarhada tahati gre. Tahati gaoghathoda na mana tangomana te reireghi ghita ka keha kantri are neku, nu naoka hata fajiflani mana ka tahati.

²¹ Ghotilo naiknomi Idom nei Us teura ghotilo glealeꞌa nomi gognaro gne. Nu ginauna puhi biꞌo na thoke ghami ghotilo, eigna ghotilo nolo jateula mae te koꞌu te fagoigoli ra neu, eghuteuna ghotilo mamaja nomi naugna ghotilo ne soesole.

²² Ghotilo naiknomi Jerusalem ra, noda naꞌau papara tahati ra ginauna hui. Lord ginauna theome snakre ghita te au fabrahu tahati ka kantri te khaba. Nu ghotilo naiknomi Idom ra, Lord ginauna para ghami ghotilo eidi nakhibomi ghotilo are, eghuteuna fakakhana najafra teke edi ghotilo ra eghu.