Lamentations 3 - Buka Blahi Ka Cheke Holo

Neuba ne au papara, Jerusalem na au nogna grouronu ka God

¹ Iara kaisei mae te lase fakelini puhigna Lord te parani kaisei naikno kate diꞌatagna fara tagna na.

² Mana khi fajifla ghau iara kate phae na, mala au iara kate romno.

³ Mana puri fadiꞌa ghau iara, funu hamerane ghilei romno.

⁴ Nafnahigu nei guligu teu iara re jateula thini khuekuꞌe neu, eghuteuna mana ne lolhopa nhubragu iara re.

⁵ Mana para ghau iara, eghuteuna lisa mei ke klignagu nafnata nakarha te ninhigrana fara, jateula naoka te kegra faligohoni namono na tarabana mala goigonini namono tuana.

⁶ Mana nhaꞌa lao ghau iara ka vido te romno, jateula mae teke lehehi tifa ra eghu.

⁷ Mana reri ghau iara ka chen maku, eghuteuna nhaꞌa lao ghau iara ka suga sosolo mala theome tangomana iara te rikha na.

⁸ Neuba iara ne eha ka mana, mana tirogna fanomho ka nogu tharai iara na.

⁹ Ka vido aheva te magnahaghei tei iara na, mana bara ghau iara. Jateula te lilisei kaisei thina biꞌo te fanagra ka nogu nabrou iara naia eghu.

¹⁰ Mana ofo ghau iara, jateula bea ba lion te ofo teu te mala hata unha te mei salaꞌu jare na mala ghamu.

¹¹ Mana loki ghau iara, eghuteuna korho fadelei ghau iara ka nabrou na ne goigoni ghau iara. Eghuteuna lisei soru ghau iara ka vido aheva te theo kaisei naikno te mala togho ghau iara na.

¹² God iagho jateula mae te fadi ghau iara ka phaloho ra neu ne fadi ghau iara.

¹³ Jata te fadi ghau iara na ne churu ka nagnafagu iara na.

¹⁴ Kheragu thofno iara re filo fapari ghau iara. Mare ei khoje mala maꞌe ghau iara kolho funu hamerane ghilei rafi.

¹⁵ Mana goigoni nakarhagu iara na, iara jateula te ghamu gano te boto nei koꞌu khoꞌu te raha ra eghu.

¹⁶ Mana huju soru ghau iara pari ne tapla ka iara, tathagu nei foflogu teure ne totokhei ka glose, eghuteuna kheꞌigu re ne klopa ka thina.

¹⁷ Gognarona iara theome au ka pharikeli, eghuteuna iara ghatho iho nogudi puhi teke au glealeꞌa ra.

¹⁸ Eghume nanhetagu nei nogu grouronu teura la gnafahi! Iara theome tangomana te ofoni Lord te mala togho ghau na!

¹⁹ Leuleghu fata na iara ghathodi puhi biꞌo te thoke mei ka iara igre, eigna iara thono diꞌanagnafagu fara. Iara jateula te theo sugagu te mala gnafa ra eghu, eghuteuna iara jateula te koꞌu khori ra eghu.

²⁰ Uve, leuleghu fata na iara ghathoni glepo igne, thono diꞌanagnafagu fara.

²¹ Nu neuba, keha glepo na ke mei ka gaoghathogu iara na ne pala hagheni nagnafagu iara na:

²² Nogna namha Lord na theo ka khusu gna. Puhi te kokhoni ghita nei keli ranghi ghita teu mana igne au fabrahu tifa tifa.

²³ Uve, puhigna Lord na au fabrahu, jateula narane majaghani te haghe fabrahu hamerane boibongi ra eghu. “Uve, Lord, iara cheke fakeli nigho eigna iagho ne namhadi fabrahu nou naiknore!”

²⁴ Te ghathoni iara na, “Lord ngala thua nafnotu te magnahaghedi iara re, eghume iara tangomana te fatutuanini mana na.”

²⁵ Lord na fablahidi iheire te fatutuani ni mana, nei iheire te magnahaghei lase fakelini mana.

²⁶ Te keli na tahati jame au kmu, ofoni Lord mala mei fakarhi ghita.

²⁷ Te keli na tahati jame hata farirhiu ka mana kani majaghaniu.

²⁸ Jame Lord parani kaisei mae, te keli na mae igne tei gnokro thegna ka vido aheva te muana.

²⁹ Te keli na mana au faparini thegna, glahu mei Lord toghoni mana ginauna.

³⁰ Jame naiknore magnahaghei magrini mae igne ba cheke fadiꞌani eghu mana, keliu kolho, mana tangomana te snakre lao ka mare te eni unha te magnahagheni mare na.

³¹ Lord theome tangomana te thodo ghita fabrahu na.

³² Neuba mana ne para ghita, nu mana ginauna tangomana te kokhoni ghita nei keli ranghi ghita teuna, naugna mana ghatho tahu ghita fabrahu.

³³ Mana theome glealeꞌa kate filoni te paradi naiknore ba te thokedi puhi biꞌo.

³⁴ God laseni ka narane naoka te tapla ke klignada kate au tahati ka suga sosolo na.

³⁵ God mae ihei te Haghe Fara igne laseni jame te hata fadelei mare nodi nolaghi keha naiknore,

³⁶ Lord ginauna jaola laseni te theome leghuni mae fate na puhi te doglo na kate fate ghita tahati na.

³⁷ Ba, ihei tangomana te eni kaisei glepo jame te theome snakreni Lord na? Thono theo fara!

³⁸ God mae ihei te haghe fara igne ngala te tangomana te cheke, eghuteuna glepo te keli ba puhi biꞌo teu igre ginau thoke mei.

³⁹ Ba, keliu kolho te diꞌatada kate thoke mei papara biꞌo ka tahati eidi nakhiboda gre? Theola!

⁴⁰ Te keli na tahati filo fakeli ka puhida gre, eghuteuna koko puhi te diꞌa igre mala ke pulo mei ka Lord.

⁴¹ Te keli na tahati pala haghe nagnafada nei khameda teugre ka God mae ihei te au teu kligna, eghuteuna tarai eghu tei ka mana,

⁴² “Ghehati tapla jafra ka nakhibo, eghuteuna ghehati theome keli ranghi nigho, nu iagho theome koko fadeleidi la ngau nakhibomi ghehati gre.

⁴³ “Diꞌatamu iagho na ngolhi tafri ghami ghilei falehe ghami ghehati, eghuteuna iagho theome kokhoni ghami ghehati.

⁴⁴ Diꞌatamu iagho na jateula khoveo te thuta ra eghu, eghuteuna nomi tharai ghehati gre theome ari posa ka iagho.

⁴⁵ Iagho eni ghami ghehati mala jateula bukrei chara eghu ka gaoghathodi naiknogna nauthoglu igne.

⁴⁶ “Mae naoka gre cheke fapari ghami ghehati.

⁴⁷ Ghehati papara fara, eghuteuna kmana puhi biꞌo jaola thoke ghami ghehati. Ghehati mhaghu nomi fara, eghuteuna nakarhami ghehati gre thofno diꞌa fara.”

⁴⁸ Iara tanhi fabiꞌo, eghuteuna kholodi tathagu re oro soru jateula khoꞌu biꞌo neu, naugna iagho ne goigonidi nogu naikno iara gre.

⁴⁹ Iara ginauna na theome gnafa te tanhi fabiꞌo na,

⁵⁰ ghilei thoke mei narane Lord mae ihei te au kligna na te filo soru ka puhi biꞌo igne.

⁵¹ Kate filoni iara puhi biꞌo te thokedi goro gaꞌasegna namono Jerusalem, iara ne thofno diꞌanagnafagu fara ne tanhi fabiꞌo.

⁵² Neuba iara ne theome eni kaisei puhi ka mare, nu mae naoka gre mei fakhale ghau iara jateula nanghaji te khale ka phighoro ra neu.

⁵³ Mare magnahaghei te falehe ghau iara ne koko lao ghau iara ka kaisei khora, aonu mare ne fadi ghau iara ka thina.

⁵⁴ Jateula khoꞌu te mei te toku tafru ghaura. Aonu iara ne cheke eghu, “Ao iara glehegu naia!”

⁵⁵ Nu lamna ka khora igne, iara ne tanhi ari eghu ka iagho,

⁵⁶ “Lord! Fanomho mei ka iara, thosei fofotho khulimu na kate tanhi ari iara ka iagho na!”

⁵⁷ Iagho neke mei rhegu iara mala togho ghau iara neku neke cheke eghu ka iara, “Thosei mhaghu.”

⁵⁸ Lord, mei au balugu iara, mala fakarhi ghau iara.

⁵⁹ Iagho filodihi mae naoka te goigoni ghau iara gre. Nu gognarona iagho fate ka puhi te doglo, fakakhana sagho te doglo iara na.

⁶⁰ Iagho lasedihi mae naoka gre mare theome magnahaghei ghau nei ghaoghatho mala falehe ghau eghu iara.

⁶¹ Lord, iagho nomhinihi te cheke fadiꞌa ghau nei roghe poru mala falehe ghau teu mare igre.

⁶² Mare cheke fapari ghau iara funu hamerane ghilei bongi.

⁶³ Uve, leuleghu fata na, mare koje maꞌe faparini mana eghuteuna gnokro pari, koje kegra haghe eghu funu hamerane ghilei bongi.

⁶⁴ Lord, tughu fapulo sagho ka mare gobigna lepo fateote'o teke edi mare ka ghehati ra.

⁶⁵ Bobotho sagho nagnafadire mala thoke mei puhi biꞌo ka mare!

⁶⁶ Ngolhidi nei roꞌedi eghu sagho kate diꞌatamu te salaꞌui na mala dofidi mare ka nauthoglu igne.