Lamentations 2 - Buka Blahi Ka Cheke Holo

Namono biꞌo Jerusalem ne papara

¹ Lord ne toku tafru namono Jerusalem kate diꞌatagna na. Diꞌatagna mana igne jateula saeklon biꞌo te toku tafru namono na ka gromno biꞌo ra neu. Tifa na Jerusalem gne neke kaisei famane namono agne Israel, aheva te au nogna Sugablahi funei na. Nu ka narane te diꞌatagna Lord igne, mana goigoni namono igne, eghuteuna mana theome ghatho tahuni Sugablahi igne.

² Suga te gnafa ka namono te gnafa Juda igre, Lord theome kokhoni nognadi. Mana diꞌatagna fara ne paꞌe soru ne gnafa suga mala poru ka namono igne. Mana goigoni fahui kantri igre baludi hatimare mae funei te gnafa igre mala mamaja nodi naiknore.

³ Mana thono diꞌatagna fara, aonu mana hata fadelei nogna nolaghi na ka mae Israel mala glaꞌe fara mare. Kate mei mae naokare, mana tirogna toghodi naiknodi Israel. Diꞌatagna mana igne jateula khaꞌaghi te nhako te hui nodi gobigna lepo vikegna mae Jekop ra eghu.

⁴ Mana jateula mae naoka te ghao nogna phaloho na mala fada jata na teura eghu, mana tarabana mala goigoni ni Jerusalem. Mana jateula mae naoka te aknu falehedi te gnafa famane naikno ra eghu. Diꞌatagna mana na jateula khaꞌaghi brana te gnhubra namono Jerusalem ra eghu.

⁵ Lord jateula mae naoka te mei goigoni ni Israel eghu. Mana jaola goigoni vido mala poru, baludi nodi suga biꞌo naikno te dedei. Mana eni igne ka naiknodi Juda mala diꞌanagnafadi fara nei tanhi eghu mare.

⁶ Lord ne paꞌe soru nogna Sugablahi na, jateula grorofe ka thobi ra neu. Narane biꞌo nei narane Sabat teu igre, mana bobotho nagnafadi naiknodi Saion mala ghatho ihodi narane biꞌo igre. Naugna mana diꞌatagna fara ka mare, eghuteuna mana theome magnahaghedi mae king nei mae pris teu igre.

⁷ Mana tirognani nogna olta na, ne lisani nogna vido blahi na. Mana snakredi mae naoka re mala mei paꞌe soru gringni thinagna Sugablahi igne. Tifa na naiknore neke eha fabiꞌo mala glealeꞌa ka narane biꞌo ra. Jaola mae naoka eha fabiꞌo, naugna mare ne uluni namono na.

⁸ Lord au nogna gaoghatho rheta te mala paꞌe soru gringni thinagna Jerusalem. Mana fafajahi gringni thina igne, eghuteuna fakakhana nogna nolaghi na mala goigonidi mare. Mana koko sorudihi pari mala jateula mae te nigra ra eghu mare mala diꞌanagnafa nei tanhi eghu.

⁹ Grengatha te gnafa ka namono biꞌo na ne khoko pari ne thafru ka glose, eghuteuna loki re ne klopa. King baludi nogna mae funei re, naoka hata tei au ka keha kantri delei, eghuteuna theo kaisei naikno teke farirhiudi naiknore nogna vetula God na. Eghuteuna Lord theome fakakhana mifi ka hatimare mae profet.

¹⁰ Mae biꞌodi Jerusalem theome gleꞌa gnokro soru kmu kolho ka glose na. Mare ghiha nakrofu ka phaꞌudire, eghuteuna pipichi ka pohe thona. Eghuteuna gaꞌase majaghani re jaola turupuku balu mamaja, eghuteuna tufru soru phaꞌudi re pari ka glose na.

¹¹ Iara tanhi ghilei kabru tathagu re, naugna iara kokhoni nogudi fara naiknore. Nagnafagu na kabru fara, naugna nogu naikno iara re la dofidihi. Eghuteuna goro sua nei gegeꞌe teure jaola lehe ka glehe grofo heva heva ka nabrougna namono na.

¹² Goro sua igre tanhi ghedi gano nei khoꞌu eghu ka idodire. Ghilei khoko soru lamna nabrou jateula mae te fnera ra neu. Eghuteuna lehe soru nodi ka thinidi idodire.

¹³ Jerusalem, iara kokhoni nogu nigho! Unha gne naba te mala chekeni iara ka iagho te mala togho ghau na? Juda, iara kokhoni nogu nigho! Unha gne naba te mala pala hagheni iara gaoghathomu iagho na? Puhi te thoke nigho iagho igne thono biꞌo fara, eghuteuna theo kaisei naikno naba teke fakeli nigho iagho na.

¹⁴ Nou profet iagho igre chaghi kolho theo nafudi. Nodi mifi mare igre theome tangomana te tathakle nakhibomu iaghore, eghuteuna theome togho nigho mala koko nakhibo igre mala ke au fakeli, eghuteuna fakarhi nigho ka puhi biꞌo. Cheke te chekedi mare igre chaghi kolho, eghuteuna batu nigho mala leghuni nabrou te jafra.

¹⁵ Jerusalem, naikno te ari salaꞌu ka iagho are, filo fapari nigho iagho, naugna naoka ra neke mei goigoni nighohi, mare neke cheke fadiꞌa eghu nighohi, “Igne si namono te chekeni mare famane namono ka nauthoglu igne, eghuteuna naikno te gnafa gre kelitadini fara te au tagna?”

¹⁶ Nou naoka iagho igre maꞌe nigho iagho eha eghu fabiꞌo, “Tahati la goigoni nodanihi! Igne narane teke ofoni tahati ia, eghuteuna narane igne la meihi!”

¹⁷ Tifa na Lord neke ghathonihi glepo igne mala eni neku. Uve, gognarona mana la enihi unha teke chekeni mana tifa ia. Mana la goigoni nighohi, eghuteuna mana theome kokhoni nigho iagho kolho. Mana tusu lao nolaghi biꞌo ka nogna naokare mala tangomana mare te glealeꞌa te mala ulu nigho iagho na.

¹⁸ Ghotilo naiknomi Jerusalem ne eha tei ka Lord! Gringni thinagna Jerusalem, kholodi tathamu iagho are ginauna thofa soru jateula khoꞌu biꞌo eghu bongi narane! Te keli na iagho eghu fabrahu ghilei glaꞌe soru iagho.

¹⁹ Leghu bongi, kate tughu mae te reireghi igre, jame te keli na iagho dofra haghe mala tanhi ka Lord. Ngafa haghe khame ka mana, mala toreni mana mala toghodi goro sua. Goro sua igre glehe grofo heva heva ka sulukhugna nabrou biꞌo na.

Jerusalem ne cheke eghu

²⁰ “Lord! Filo mei sagho ka iara, mala ghatho ghau iara: Iagho neke parani kaisei naikno jateula igne neku tifa na? Neubane gaꞌase te namhadi fara thudi re, rehati ghamu thinidi thudi te lehe re! Nou mae pris nei profet teu iagho igre, mae naoka igre aknu falehedi ke lamna nou Sugablahi iagho!

²¹ “Neubane naikno majaghani ba naikno biꞌo, mare kafe lehe ke lamna nabrou. Nalhaꞌu ba gaꞌase, naoka mei neke aknu falehedi ka naflahi. Iagho themu ngala teke aknu falehedire ka narane teke diꞌatamu iagho ra, eghuteuna iagho neke theome kokhoni noudi kolho.

²² “Iagho toredi nogu naoka iara re, jateula mae te kilo meidi naikno ka gaghamu ra neu ne kilo meidi mae naoka gre, ne mei edi kmana glepo te au heva heva faligoho ghau iara ne mhaghu nogu fara iara. Lord, ka narane te diꞌatamu fara iagho na, theo kaisei naikno te tangomana te rikha na, eghuteuna theo kaisei naikno nate karha na. Iheire te namhadi fara iara re, iara na reireghi fakelidi, nu nogu naoka iara re, mare na goigonidi gnafa.”