Lamentations 1 - Buka Blahi Ka Cheke Holo

Namono Jerusalem ne papara

¹ Namono Jerusalem, tifa na neke fodu ka naikno. Gognarona krogha. Tifa, naiknogna nauthoglu igne neke ghatho tahuni namono Jerusalem. Gognarona jateula gaꞌase teke lehehi khetogna ra eghu, te au thegna kolho. Namono igne tifa na jateula Kuin te funei frunidi keha namono ra neku. Gognarona jateula kaisei naikno sneka eghu kolho.

² Ka bongi thongana igne naꞌa tanhi ghilei hamerane, eghuteuna kholodi thatagna re oro soru ka foflogna nei tathagna re. Tifa na naꞌa jateula gaꞌase te au kmana khetogna ra neku. Gognarona, mare tirodini naꞌa. Kheragna re tirodini naꞌa, kela nogna naoka naꞌa.

³ Mae naoka mei goigoni naiknodi Juda, eghuteuna hata fajifladi ka nodi namono na. Gognarona mare tei au ka keha kantri delei, aheva mare te theome tangomana te kiloi namono. Mae naoka lokidi mare, mala theome tangomana mare te rikha na.

⁴ Nabrou te mala tei ka namono Jerusalem na krogha fara, nei diꞌanagnafa eghu, naugna theo kaisei naikno te mei ka narane biꞌo re. Eghuteuna grengatha re jaola krogha eghuteuna hatimare mae pris jaola tanhi nodi. Eghuteuna goro gaꞌasedi re au papara, eghuteuna Thogele Saion thofno diꞌa parilahu.

⁵ Lord ginauna lisa lao na au papara ke klignadi, naugna mare ne tapla jafra fabrahu ka nakhibo ranghini Mana. Naoka mei funei fruni au fakeli nodi. Neubane goro sua ikodi, naoka mei hata fajifladi ka nodi namono re.

⁶ Nafnakno biꞌogna Jerusalem ia la theo nafugnahi, gognarona ari la diꞌahi. Mae biꞌore jateula bosu te theome tangomana te dei ghedi ganora eghu. Mare glaꞌe soru theome tangomana te rikha na.

⁷ Jerusalem gognarona thofno diꞌa parilahu, eghuteuna naiknore neke ghatho fapulodi nakarha te keli nei dedei fara teku tifa re. Kate mei naoka te uluni namono biꞌo Jerusalem igne, theo kaisei naikno nate toghoni na. Kate filoni igne, mae naoka gre ne maꞌeni, naugna namono igne la groꞌehi.

⁸ Jerusalem gne jateula gaꞌase te gnognoro fara ra eghu, eghume naꞌa theome gae ka tathagna God na. Naꞌa soesole kolho, eghuteuna naiknore thofno cheke faparini naꞌa. Naꞌa pophoru tathagna re balu diꞌanagnafa nei tanhi, naugna naꞌa ne mamaja nogna fara.

⁹ Naikno te gnafare filodi nakhibogna naꞌare, nu naꞌa theome nanga nogna kolho ka unha nate thoke mei ginauna. Nu mae naoka igre thofno koko soruni naꞌa pari, eghuteuna theo kaisei naikno te toghoni naꞌa na. “Lord! Naoka gre la ulu ghauhi iara. Filo ghau nei kokhoni ghau iara!”

¹⁰ Mae bongihehe teke chekedi Lord mala thosei tei ruma lamna Sugablahi teku igre, Jerusalem ne filodi mare te tei ruma lamna Sugablahi na, eghuteuna mare blau glepo blahire.

¹¹ Naiknodi Jerusalem re ne tanhi kate hiro gano tafri na. Mare ne sabiri nodi glepo te keli re mala foli gano, mala tangomana mare te au karha teuna. “Lord! Naikno te gnafa igre theome ghatho tahu ghau iara gognarona. Iagho kokhoni ghau iara nei filo mei ka iara!”

Jerusalem ne cheke eghu

¹² “Ghotilo te salaꞌu ka iara ra, papara biꞌo te thoke ghau iara igne glepo theo nafugna kolho ka ghotilo? Ka narane te diꞌatagna Lord na, iara para ghau fara. Theo kaisei papara te jateula te para ghau iara igne teuna!

¹³ “Mana kuru soru khaꞌaghi funu kligna ne gnhubra glamnagu iara na. Mana ne lilisei kaisei phighoro malagu iara, mala uka iara. Mana tei koko ghau iara, mala glaꞌe soru iara.

¹⁴ “Nogu funei neke hata nakhibogu gre neke loku fodu. Nakhibo igre jateula glepo tahu te nhaꞌa mei ke klignadi fafragu iara ra eghu, eghume iara thofno glaꞌe soru fara. Mana lisa lao ghau iara ka khamedi nogu naokare, eghuteuna iara theome nheta te mala magra ka mare na.

¹⁵ “Funei igne tirognadi nogu mae nheta iara re. Mana kuru mei naoka mala goigonidi nogu mae majaghani iara re. Eghuteuna mana kina ngujadi nogu naikno iara re jateula mae te kina ngujadi sisi grep te mala eꞌei waen ra neu.

¹⁶ “Naugna igne te tanhini fara iara na, eghuteuna kholodi phei tathagu iara re oro soru ka thinigu iara na. Eghuteuna theo kaisei naikno te au teu jare te mala farhetani gaoghathogu iara na. Mae naoka gre ulu ghau iara, eghuteuna nogu naikno iara re ne rhana nodi fara.”

Mae profet ne cheke eghu

¹⁷ Jerusalem tore thotogho, nu theo kaisei te au te mala toghoni naꞌa na. Lord ne cheke ka naikno te au faligohoni Jerusalem igre mala nogna naoka naꞌa, eghuteuna te ghathoni mare na Saion gne glepo theo nafugna kolho.

Jerusalem ne cheke eghu

¹⁸ “Lord na thofno doglo fara, nu iara tirogu leghuni nogna Vetula mana na. Fanomho mei, ghotilo naiknogna nauthoglu igne! Filo mei ka puhi te au papara iara igne! Nogu mae majaghani nei gaꞌase majaghani teu iara ra, mae naoka gre la hata la tei kokodi nodi namono re, la tei au ka keha kantri delei!

¹⁹ “Iara kilo meidi kheragure, nu mare tirodi ghau iara. Nogu mae pris nei mae funei teu iara re, mare tei hiro gano ka nabrougna namono na, nu mare theome tangomana te thafoni kaisei gano, eghuteuna gognarona mare lehe ka grofo kolho.

²⁰ “Lord! Filo mei! Iara au papara fara! Iara diꞌanagnafagu fara, naugna iara ne figri tagru nigho iagho. Ke lamnagna nogu suga iara na, naiknore lehe, eghuteuna ke kosi na, naoka mei aknu falehe gnafa naiknore.

²¹ “Naiknore nomhini te tanhi fabiꞌo iara na, nu theo kaisei naikno te au teu jare te mala togho ghau iara na. Mae naokare jaola nomhini, nu mare kelitadi fara kolho, naugna iagho kuru mei puhi biꞌo igne mala thoke ghau iara. Lisa mei sagho narane te mala thoke mei puhi biꞌo igne leghuni unha teke chekeni iagho ia mala jaola papara mae naoka igre jateula iara eghu.

²² “Filo mei sagho ka puhidi naikno te diꞌa igre, paradi sagho, jateula iagho te para ghau iara eidi nakhibogu iara gre eghu. Iara tanhi gaoghathogu fara, eghuteuna nagnafagu na glaꞌe soru fara.”