Letas Teke Rioriso Mae Jud 1 - Buka Blahi Ka Cheke Holo

¹ Iara mae Jud tahigna mae Jemes nei nogna mae gloku Jisas Kraes. Uve kheraguro, iara rioriso ari letas igne ka ghotilo naikno te gnafa God teke kilo ghami. God Kmada namha ghami ghotilo, nei mae Jisas Kraes jaola reireghi fakeli ghami ghotilo.

² Iara tarai ka God mala kokhoni ghami nei lolokeli ghami eghu koba, eghuteuna mana ginauna tusu ranghi ghami pharikeli nei jaola namha ghami tifa tifa.

Mae tharai chaichaghi

³ Ranghi ghami kheraguro, ulu lahu na iara magnahaghei te rioriso ari ka ghotilo kaisei letas eigna God te fakarhi ghita tahati te gnafa. Nu gognaro na iara thono tahu mei ka gaoghathogu na te mala rioriso letas igne, mala nheta ghotilo. Iara magnahaghei ghami ghotilo te magra heta mala loku famaku thofno cheke tela fatutuani nihi tahati igne. U thofno cheke igne God neke tusu mei kaisei fata ngala ka nogna naiknore, eghuteuna na keli fabrahu tifa tifa.

⁴ Iara chekeni igne ka ghotilo naugna keha naikno te tirodi leghuni God re poru la ruma meihi ke lamna khiloau. Naikno igre cheke fadiꞌani koba chekegna God na. Mare chaghi nei cheke eghu koba, “Neubane edi tahati puhi te diꞌare, theome fadiꞌa ka God naugna God namha ghita fara.” Eghuteuna mare tirodi fatutuani ni noda funei kaisei ngala mae Jisas Kraes. Nu tifa na hatimare mae profet neke kulu chekenihi u fate biꞌo nate thoke mei ginau ka nafnata naikno igre.

⁵ Neubane lasedihi ghotilo igre, iara magnahaghei ghami ghotilo teke ghatho fapuloni noda Lord teke fakarhidi naiknodi Israel, ka teke hata fajifladi mana Ijep. Nu ke leghugna igne mana neke falelehe fahui iheire teke theome fatutuani nei theome leghuni chekegna.

⁶ Eghuteuna ghotilo ke ghatho fapulo dila hatimare mae engel. God neke tusu ranghidi nolaghi biꞌo. Nu keha ka mare theome magnahagheni nolaghi igne ne rikhani nodi famane namono nafnakno na. Aonu God ne reridi ka chen te maku ne koko laodi ka namono te romno fara na. Mare na ofou ka namono tuana ghilei thokeni narane biꞌo te mala fatedire.

⁷ Ghotilo jaola ke ghatho fapulodi phei namono biꞌo Sodom ghe Gomora nei keha namono te au faligohodi phei namono biꞌo tuare. Naiknodi namono igre neke jafra jateula engel te jafra teke theome leghuni God igre neku. Naugna namono igre fodu ka gnognoro, eghuteuna mae nalha'udire neke gnognoro fari thedi. Aonu mare neke au papara ka khaꞌaghi te theo ka glehegna na. Eghume mae igre kaisei fagaglana mala filoni tahati hui.

⁸ Ginauna jateula tuana eghu mae velepuhi chaichaghi te tirodi leghuni God igre. Mare chekeni koba ne filodi thedi keha mifi eghu chaghi na. Naugna igne mare fatothonadi thinidi thedire ka nakhibo. Mare filo faparini kolho nogna nolaghi God na nei cheke fadiꞌadi engel re.

⁹ Tulao mae Maekol mae funeidi engel gre neke theome eni igne. Mana neke fapholai balugna mae Satan eigna mae ihei ka phiamare nate hata thinigna mae Moses. Nu mae Maekol neke theome chekeni kaisei cheke te diꞌa ranghini mae Satan. Mana neke khogla cheke eghu kolho, “God ginauna para nigho iagho.”

¹⁰ Nu mae velepuhi chaichaghi igre cheke fadiꞌadi unha glepo te theome lasedire. Mare mae glalase fara, nu unha te lase fakelini mare jateula glepo te laseni ngala khuma ba bosu teu, tuana ngala te eni mare na. Nafnata puhi te edi mare tuare ginauna roꞌedi kolho thedi.

¹¹ Puhi biꞌo fara na thokei mei ka mare! Eigna mare ne leghuni puhigna mae Kein tifa ia. Eghuteuna mare jateula mae Belam eigna mare magnahaghei hata sileni fara kate toutonu chaghi na. Mare huhughuni God jateula mae Kora teke huhughuni God tifa ia eghu. Mare ginauna jateula mana eghu mala lehe.

¹² Kate ei famane gaghamu ghotilo fagaglana gna nomi namha biꞌo na eghuteuna te mei mare me ima fodu balumi ghotilo teuna, mare famamaja ghami ghotilo fara ka puhidi te diꞌare. Ka vido tuare mare ghathodi thedi kolho. Naikno tuare jateula khoveo te pala te mei nuri ia eghu kolho, nu theo kaisei nakhete te mei na. Eghuteuna mare jateula gaju te theome ure kate thoke mei nhigra dira eghu kolho. Eghume mae glokure ginauna na rathu koko naikno tuare mala koko lao ka khaꞌaghi. Mae velepuhi chaichaghi igre jateula gaju tela botohi ia eghu.

¹³ Nafnata naikno igre tahati filodi koba puhidi te diꞌare. Naikno tuare jateula galo te pulei mei kmana chara ka glilihi ia eghu, ba jateula nathunu te tei kokodi vido mala audira eghu kolho. God la kulu tarabanahi namono te romno fara na mala audire, mare naꞌau papara fabrahu jare tifa tifa.

¹⁴ Mae Inok teke karha ka fafitu phagusu ke leghugna mae Adam na neke kulu laseni unha nate eni ka mae igre. Eghuteuna mana neke cheke eghu eidi mare, “Filo si ghotilo, Lord ginauna mei balu nogna thogha thogha engel te blahi.

¹⁵ Mana ginauna fatedi naikno diꞌa te gnafa ka nauthoglu gne, eghuteuna paradi fara naikno te theome leghuni mana re, naugna mare ne edi glepo te diꞌare nei cheke fadiꞌani mana.”

¹⁶ Mae igre mae mala eꞌei puhi nei cheke diꞌa koba eghu kolho. Mare magnahaghei te leghudi kolho gaoghathodi thedi te diꞌa fara re nei mare mae fahaehaghe fara la eghu. Eghuteuna mare mae lase famaemahe fara ka keha naiknore mala toghodi thedi kolho.

Cheke faheta ranghidi naikno khiloau

¹⁷ Uve kheraguro, thosei ghatho ihodi cheke teke edi hatimare nogna mae khuru noda Lord Jisas Kraes tifa ra.

¹⁸ Mare neke cheke eghu ka ghotilo, “Kate namo mei narane leghu lahu na keha naiknore ginauna maꞌeni Nonomho te Keli gne. Mare magnahaghei te leghudi kolho gaoghathodi thedi te diꞌa fara re nei mala tirodi leghuni God.”

¹⁹ Igre mae iheire te mala paꞌeni khiloau na. Naugna mae igre leghudi kolho nodi gaoghatho thedire, eghuteuna mae Tharunga te Blahi na theome au ka mare.

²⁰ Nu ghotilo kheraguro, nomi fatutuani na thono blahi fara. Eghume ghotilo loku heta mala kegra maku ka nomi fatutuani te blahi fara tuana. Eghuteuna tarai ka nogna nolaghi mae Tharunga te Blahi.

²¹ God namha ghami ghotilo nei mana magnahaghei ghami ghotilo te au fabrahu ka nakarha te doglo. Ofoni narane noda Lord Jisas Kraes nate tusu mei ka nogna kokhoni ghita u karha te tifa.

^22-23 Filo kokhonidi iheire te ghatho peapea eigna karha fei tifa. Eghuteuna ke korho fapulodi iheire te namo khoko lao lamna khaꞌaghi glehe ka nabrou te doglo, mala ke karha. Jaola lolokelidi iheire te sneka nakarhadire ka puhi te diꞌa. Nu fiofilo ghami eghu, na eghunu leghudi ghotilo puhidi mare te diꞌa are eghu.

Cheke leghu lahu

²⁴ Uve, kaisei God ngala tangomana te reireghi ghami te mala leghuni fabrahu mae Kraes. Kaisei mana ngala tangomana hata ghami te tei ka nogna famane namono kligna na. Jare ghotilo ginauna na au gleale'a fara, naugna jare na ghotilo na theo kaisei glepo te jafra ke ulugna God.

²⁵ Mana kaisei God ngala. Mana kaisei ngala te fakarhi ghita ka nogna gloku mae noda Lord Jisas Kraes. Ka mana ngala siasigla na, nafnakno na, nolaghi na, nei mana funu tifa te mei, nei gognaro, nei tifa tifa! Amen. Me gnafa. Iara, mae Jud.