Josua 9 - Buka Blahi Ka Cheke Holo

Maedi Gibeon ne chaghidi mae Israel

¹ Mae Josua baludi maedi Israel igre mare magra ne uludi phei namono biꞌo Jeriko ghe Ai. Eghuteuna nonomho eigna igne ne tei thoke ka mae king te au ka namono te gnafa ke mosu Khoꞌu biꞌo Jordan. Mae king igre funudi ka vikegna mae Hit, ka vikegna mae Amo, ka vikegna mae Kenan, ka vikegna mae Peres, ka vikegna mae Hivi, nei ka vikegna mae Jebus. Mae igre au ka thogele nei ka gukhu ke mosu, nei ka sare rhegna Mediterenian, tei posa ke raru kantri Lebanon. Mare kafe nomhini thoutonu eigna mae Josua igne baludi mae Israel te uludi nodi naokare ka magra igre.

² Aonu mae king igre ne salo fodu balu nodi soldia mala magra ka mae Josua nei ka armi gna Israel.

³ Nu iheire te karha mei ka vikegna mae Hivi te au ka namono Gibeon igre ne nomhini mae Josua te roꞌedi phei namono biꞌo Jeriko ghe Ai,

^4-5 mare ne ghaoghaho mala chaghini mana mala fakarhadi thedi. Aonu keha ka mare hata baeg tiatifa tela brekuhi, eghuteuna mare atha bret te khapra nei diꞌahi teu igre ne hohono ka baeg. Mare jaola ne hata keha botol teke horo ka guli sipu tela brekuhi, nu mare ne susuki ne fafodu ka waen. Mare ne lilisei gobigna lepo igre ka nodi dongkire. Eghuteuna mare ne pipichi ka pohe te breku nei jaola fahaghe sadol tiatifa.

⁶ Mare ne tei ka mae Josua baludi naiknodi Israel te au teu Gilgal igre ne cheke eghu ka mare, “Ghehati mei funu ka kantri te khaba fara. Eghuteuna ghehati magnahaghei ghami ghotilo te eni kaisei nhaꞌa cheke balumi ghehati mala kaisei loku fodu tahati.”

⁷ Nu maedi Israel igre ne cheke eghu ka mae Hivi igre, “Theome doglo ghehati te eni kaisei nhaꞌa cheke balumi ghotilo naugna glahu ghotilo au rhemi ghehati kolho.”

⁸ Mare ne cheke eghu ka mae Josua, “Ghehati tarabanau kolho te mala nou sneka iagho na.” Mae Josua ne ghusna eghu ka mare, “Mae iheire si ghotilo ia? Ghotilo mei funumi aheva?”

⁹ Mare ne cheke eghu ka mana, “Ghehati mei funu ka kaisei kantri te khaba fara. Ghehati nomho kmana thoutonu eigna Lord nomi God ghotilo te edi ka naiknodi Ijep.

¹⁰ Eghuteuna ghehati jaola nomhidi unha te edi mana ka phei nodi king maedi Amoraet te au ke maghati rhegna Khoꞌu biꞌo Jordan. King Sihon maegna kantri Hesbon ghe king Og maegna kantri Besan, nei namono biꞌo Astarot.

¹¹ Nomi mae lida nei naikno teu ghehati re neke cheke ka ghehati mala tarabana keha gano mala ima kate mei ghehati gne mala mei filo ghami ghotilo. Eghuteuna mare cheke ka ghehati mala mei tore ghami ghotilo mala tangomana ghehati te nomi naikno gloku ghotilo na. Eghuteuna ghehati tore ghami ghotilo mala nhaꞌa cheke balumi ghehati mala loku fodu balumi ghotilo.

¹² Filo si ghotilo ka gano hata te mei ghehati igre. Gano igre brana neku neke mei ghehati, nu gognarona gano igre la mojadihi nei la fleahi eghu.

¹³ Guli sipu te mala totoho waen igre neke majaghani neku, nu gognarona la brekuhi. Eghuteuna nomi sadol nei nomi pohe teu igre la jaola la thono diꞌa fara.”

¹⁴ Mae Josua baludi mae Israel igre ne ima gano hata teke mei mare igre. Nu mare theome kulu ghusnani Lord.

¹⁵ Mae Josua nei mae lida di Israel teu igre ne nhaꞌa cheke baludi maedi Gibeon mala loku fodu baludi mare te mala au ka pharikeli na.

¹⁶ Thilo narane ke leghugna nhaꞌa cheke igne, maedi Israel igre laseni te au teu kolho mae igre rhedi mare na.

¹⁷ Aonu maedi Israel igre ne tei ke leghudi mare, eghuteuna ka fatilo narane na, mare ne tei posa ka nodi fati namono biꞌo mare igre, Gibeon, Kefira, Berot, nei Kiriat-Jaerim.

¹⁸ Nu mare ne theome falehedi naiknore, naugna mae lidare neke nhaꞌa chekehi ka nanghagna Lord nodi God mae Israel. Naiknodi Israel igre ne diꞌatadi fara ka mae Josua baludi keha mae lidare eigna nhaꞌa cheke igne.

¹⁹ Mare ne cheke eghu, “Tahati enihi kaisei nhaꞌa cheke ka mare ka nanghagna Lord noda God. Gognarona tahati theome tangomana te falehedi mare na.

²⁰ Tahati lisa laodi mala karhau mare, naugna tahati neke enihi nhaꞌa cheke tuana ka mare. Eghuteuna God ginauna para ghita tahati jame te falehedi mare tahati na.

²¹ Tahati snakredi mare mala karhau. Nu mare mala uge gaju nei mala pulei khoꞌu eghu ka tahati.” Igne cheke te eni mae lidare.

²² Aonu mae Josua ne chekedi nogna mae glokure mala hata mei maedi Gibeon igre. Eghuteuna mana ne cheke eghu ka mare, “Naugna unha site chaghi ghotilo ka ghehati gnea? Te chekeni ghotilo ia, nomi namono ghotilo na khaba fara. Ghotilo thono chaghi fara. Nomi namono ghotilo igre theome khaba kolho.

²³ God fate ghamihi ghotilo, naugna ghotilo ne chaghi fara. Ghotilo ginauna mala nomi naikno gloku ghehati fabrahu gognarona, eghuteuna nomi gloku ghotilo na mala uge gaju nei pulei khoꞌu eghu ka nogna Sugablahi nomi God ghehati gne.”

²⁴ Mare ne cheke eghu ka mae Josua, “Mae biꞌo, ghehati ginauna eni tuana, naugna ghehati lasenihi eigna Lord nomi God ghotilo igne neke chekehi ka mae Moses, nogna mae gloku mana tifa ia, mana ginauna tusu ari namono igne ka ghotilo. Eghuteuna kate mei ghotilo ke lamnagna namono igne, ghotilo ginauna falehe ghami ghehati gnafa. Eghuteuna ghehati jaola laseni cheke igne thofno tutuani fara, naugna igne ghehati mhaghu ghami ghotilo fara. Eghume, ghehati mala eni igne gognarona, naugna ghehati theome magnahaghei te lehe na.

²⁵ Nu gognarona ghehati au ka khamemu iagho. Iagho eni ngala ka ghehati unha te ghathoni iagho te doglo na.”

²⁶ Aonu mae Josua ne theome snakredi naiknodi Israel te mala falehedi mare na.

²⁷ Nu mae Josua ne snakredi naiknodi Gibeon igre te mala nodi naikno gloku mare te mala uge gaju nei mala pulei khoꞌu, nei jaola khoꞌu malagna nogna olta Lord. Mare eni fabrahu gloku igne ghilei mei posa gognarogne ka namono teke vahini Lord te mala pogho soruni mana nogna naiknore.