Josua 8 - Buka Blahi Ka Cheke Holo

Mare ne roꞌeni namono Ai

¹ Aonu Lord ne cheke eghu ka mae Josua, “Thosei mhaghu, ba suaraghi. Hata soldia balumu tei magra Ai. Iara ginauna togho nigho, eghuteuna iagho ginauna uluni mae king gna Ai. Eghuteuna iara ginauna snakre ari naikno gna nei glose gna teu namono tuana ka khamemu iagho.

² Iagho ginauna roꞌeni Ai balugna king, jateula teke eni iagho ka namono Jeriko ia eghu. Nu gognarona ghotilo tangomana te hata nomi glepo te keli malami themi. Eghume gognarona ghotilo tarabana mala magra ka namono tuana. Iagho chekedi keha mae soldia mala tei poru ke leghu namono mala snura kate iho teu mare na.”

³ Aonu mae Josua balu nogna soldia tarabana ne tei Ai. Mana ne vavahi tolufulu thogha mae nheta ne jifla bongiro.

⁴ Mae Josua ne cheke eghu ka mare, “Ghotilo tei poru ke kosi namono nu thosei tei fakhaba eghu, tarabana mala magra.

⁵ Nu iara baludi mae te au teu balugu iara igre ginau doglo tei ka namono na. Eghuteuna kate jifla mei maedi Ai igre na, ghehati ginauna figri rikhadi mare.

⁶ Mare ginauna jifla mei ngolhi ghami ghehati na ghilei tei khaba ka namono na jateula teke tifa ia eghu. Aonu kate ngolho leghu ghami ghehati mare te tei khaba katha ka namono na igne,

⁷ ghotilo jifla mei tei snura ka namono na. Noda God tahati na ginau lisa mei namono tuana ka khameda tahati.

⁸ Ke leghugna te hatahi ghotilo namono na, ghotilo gnubra namono na leghuni unha teke chekeni Lord. Ghotilo mala leghu fakelini nogu cheke iara igne!”

⁹ Aonu mae Josua kurudi mare ne tei poru ke mosu farihotei Ai ghe Betel. Nu mae Josua au faleghu neu baludi naiknore bongi tuana.

¹⁰ Hamerane boibongi ka keha narane na, mae Josua ne kilo fodudi nogna mae soldiare. Mana baludi hatimare mae funei ka nogna armi na batudi mare ne haghe Ai.

¹¹ Hatimare mae soldia teke balugna mae Josua igre, mare doglo ne haghe ne snoto ke ulugna namono na ke raru Ai. Jare kaisei glogu au farihoteidi mare nei namono na.

¹² Eghuteuna mae Josua ne vavahi glima thogha soldia ne tei lilisei farihotei Ai ghe Betel.

¹³ Aonu mare ne fnota ka phei tothoghei, keha na ne tei au ke raru, eghuteuna keha na ne tei poru ke mosu namono. Ka bongi tuana mae Josua ne soru ka glogu na.

¹⁴ Kate filoni mae king gna Ai armi gna Israel igne, mana baludi nogna mae soldiare chari ne soru ka nabrou na ka glogu Jordan mala magra ka mare. Nu mae king gna Ai igne mana theome lasedi nogna soldia mae Josua te poru teu ke leghugna re.

¹⁵ Aonu mae Josua balu nogna tothoghei soldia na chaghini mana ne rikha ne tei ka namono nagou na.

¹⁶ King ne ehadi maegna namono na mala ngolhi leghuni mae Josua baludi nogna soldiare. Aonu mare jifla ka namono na ne tei ke leghudi.

¹⁷ Soldia di Ai ghe Betel igre ne ngolhini armi gna Israel igne. Eghuteuna namono na ne krogha, ne theo kaisei mae te mala reireghini na.

¹⁸ Aonu Lord ne cheke eghu ka mae Josua, “Iagho hata nou grojo na tusu tei Ai. Iara ginauna lisa ari namono tuana ka khamemu iagho.” Mae Josua ne leghuni unha te chekeni Lord igne,

¹⁹ ne tusu tei nogna grojo na fei Ai. Kate filoni igne, maedi Israel teke poru teku igre ghosei ne jifla mei chari ne tei lamna ne gnubra namono na.

^20-21 Mae Josua baludi nogna mae soldiare ne filoni gagahu te haghe ka namono na. Kate filoni igne, mare laseni keha mae soldia ka mare ra la hatahi namono igne. Aonu hatimare maedi Ai igre jaola ne filoni gagahu igne te haghe ka nodi namono na, eghuteuna mare laseni te theo kaisei vido aheva nga nate rikha mare te tei poru na.

²² Maedi Israel teke ruma ka namono na jifla mei kosi ne bara fanogradi maedi Ai. Mare aknu falelehe ne gnafa naiknogna namono Ai. Theo kaisei naikno te rikha na, ba te karha na.

²³ Mare hata mae king gna namono Ai igne ne tei ka mae Josua.

²⁴ Ka magra igne, armi gna Israel igne ne ngolhidi mae Ai igre ne tei ka namono nagou na ne aknu falehedi jare. Eghuteuna mare neke pulo mei namono Ai neke falelehedi ne gnafa naiknore jare.

²⁵ Nabagna nabotho phei thogha naikno, gaꞌase nalhaꞌu ka namono Ai ne kafe lehe ka narane igne.

²⁶ Mae Josua loku famaku ne tusu lao fabrahu neu nogna grojo na ka namono Ai ne ghilei lehe fahui naiknogna namono igne.

²⁷ Maedi Israel igre ne hata buluka, sipu, nanigot nei keha famane glepo langau maladi thedi, leghuni unha teke chekeni Lord ka mae Josua.

²⁸ Mae Josua ne gnubra namono Ai, eghuteuna namono igne diꞌa fabrahu ghilei mei posa ka narane gognarogne.

²⁹ Hatimare ne faleheni mae king gna Ai, eghuteuna mae Josua ne fagefe haghe thinigna mana ka gaju na, thinigna mana igne gefe neu jare ne ghilei rafi. Aonu ka grafi tuana mae Josua ne chekedi mare mala koko soru thinigna mae king igne pari ka grengatha gna namono na. Aonu mare pulei kmana thina ne koko lao ke kligna gna mana. Bukrei thina igne au ngala gognarona.

Mae Josua ne iuꞌiju nogna vetula mae Moses na ka thogele Ebol

³⁰ Ke leghugna igne, mae Josua ne chekedi nogna mae glokure mala babana kaisei olta nogna God ka thogele Ebol.

³¹ Mana ne thofno leghuni unha teke chekeni mae Moses nogna mae gloku God igne. Nogna vetula mae Moses igne cheke eghu, “Ghotilo mala babana kaisei olta ka thina, nu ghotilo thosei kato thinare ka aean.” Ka olta igne, mae Israel igre mala fafara gano teke gahu ka khaꞌaghi, nei jaola fafara gano te mala kaisei nagnafa balugna God.

³² Mae Josua ne rioriso soru nogna vetula mae Moses igre ke kligna thina kate kafe filo teu naikno te gnafa Israel.

³³ Hatimare mae mala baubatu, mae funei, mae ofisa ka armi, mae biꞌo, mae phosa te gnafa nei maedi Israel te gnafa au neu jare. Mare ne fnota ka phei tothoghei, keha tothoghei na ne kegra ke ulugna thogele Gerisim, eghuteuna keha tothoghei na ne kegra ke ulugna thogele Ebol. Eghuteuna nogna Bokis Nhaꞌa Cheke Lord na au farihotei. Naiknore filo neu ka mae pris te pala Bokis igne ne eni unha teke chekeni mae Moses nogna mae gloku Lord na kate thoke mare ka namono Kenan. Eghuteuna mae pris ne toreni Lord mala fablahidi naiknore.

³⁴ Aonu mae Josua kegra haghe ne iuꞌiju fabiꞌo nogna vetula mae Moses igne ke uludi naiknore. Chekegna God te iuꞌiju mana igne ginauna toghodi mare, eghu jame te leghu fakelini mare na. Eghuteuna chekegna God igne ginauna jaola paradi mare, eghu jame te theome leghuni mare na.

³⁵ Mae Josua ne iuꞌiju fahui cheke te gnafa teke rioriso mae Moses igre, eghuteuna maedi Israel te gnafa igre ne kafe nomhini nogna vetula mae Moses igne. Eghuteuna goro gaꞌase, goro sua, nei mae phosadi ka keha namono igre eghu jaola au neu baludi mare ne nomhini cheke igne.