Josua 7 - Buka Blahi Ka Cheke Holo

Nakhibogna mae Ekan

¹ Lord neke cheke faheta fara ka naiknodi Israel igre mala thosei hata kaisei glepo ka namono Jeriko. Nu kaisei mae ka mare nanghagna na mae Ekan, thugna mae Kami, gragna mae Sabdi, vikegna mae Sera thugna mae Juda tifa igne ne theome leghuni chekegna Lord igne ne blau keha glepo. Lord ne thono diꞌatagna fara ka nafnata puhi te eni mana igne.

² Kate au teu mare Jeriko igne, mae Josua ne kurudi keha mae mala tei poru mala filoni namono Ai. Namono igne au ka kaisei thogele ke maghati Betel rhegna namono Bet-aven. Kate filoni namono igne,

³ mare neke pulo mei ka mae Josua, ne cheke eghu ka mana, “Theome nabada tahati te kafe tei magra ka namono Ai. Mare theome kmana kolho. Te keli na iagho kurudi kolho phei ba thilo thogha soldia mala tei magra.”

⁴ Aonu kate tei thilo thogha mae soldia igre te magra ka namono igne na, maegna ka namono igne ne uludi mare ne ngolhi fapulodi.

⁵ Maedi Ai igre ne ngolhidi maedi Israel funu ka grengathagna namono na ne ghilei tei posa ka kaisei thogele te mala dokha thina na. Eghuteuna kate ngolhodi te sukha maedi Ai ka thogele igne na, mare ne aknu falehe tolufulu namno mae ka nogna soldia mae Josua igre. Mae Israel igre ne mhaghudi mae igre ne glaꞌe soru fara gaoghathodire.

⁶ Kate nomhini mae Josua baludi mae mala baubatudi Israel igre nonomho igne, mare ne diꞌanagnafadi fara. Aonu mare ne rerheku nodi pohere balu ghiha nakrofu ka phaꞌudire, fagaglanagna nodi diꞌanagnafa na. Ke leghu, mare tei ne pogho soru pari ka glose na tathadi nei foflodi teure ke ulugna nogna Bokis Nhaꞌa Cheke Lord na ne ghilei rafi.

⁷ Ka vido igne, mae Josua ne tarai, “Lord iagho nomi mae funei ghehati! Naugna unha sagho te hata fakasa mei ghami ghehati agne ka Khoꞌu biꞌo Jordan igne te lisa lao ghami ka vikegna mae Amo igre te mala falehe ghami gnea? Jame te keli na ghehati au neku kolho ka keha phile Khoꞌu biꞌo Jordan.

⁸ Lord, iara theome laseni unha nate chekeni gognarona. Naugna nomi naoka ghehati gre la ulu ghami, nei ngolhi fapulo ghami eghu ghehati.

⁹ Jame nomhini naiknogna kantri igne eigna igne meuna, mare ginauna mei falehe ghami ghehati. Nafnata puhi igne naiknore ginauna cheke faparini nanghamu iagho na, eghume iagho togho ghami ghehati!”

¹⁰ Lord ne cheke eghu ka mae Josua, “Kegra haghe! Naugna unha sagho te thuru fabrahu pari gnea?

¹¹ Ghotilo tapla jafrahi ka nakhibo. Ghotilo huhughunihi nhaꞌa cheke teke eni iara balumi ghotilo ia. Ghotilo blauhi keha glepo mala thosei hata ghotilo teku iara ra.

¹² Naugna igne, ghotilo theome tangomana te tapla faparidi nomi naokare. Ghotilo rikhadi mare, naugna ghotilo themi teke eni papara te thoke ghami ghotilo igne. Eghume, ghotilo te gnafa na mala lehe. Jame theome kafe gnubra ghotilo glepo teke blau ghotilo ra meuna, iara ginauna theome tangomana te togho ghami ghotilo na.

¹³ “Eghume iagho kegra haghe! Tei fagaedi naiknora, eghuteuna tarabana mala mei ke ulugu iara nathuꞌu. Naugna iara nomi Lord God ghotilo maemi Israel. Ghotilo neke hatahi glepo mala thosei hata ghotilo teku iara ra. Jame te theome koko ghotilo glepo igre na, ghotilo ginauna theome tangomana nate tapla faparidi mae naoka gre.

¹⁴ “Eghume, hamerane nathuꞌu ghotilo vike te gnafara mala kafe mei kegra agne ke ulugu iara. Jame vike te vahini iara na, vike tuana nate mei kegra na. Eghuteuna kokholo te vahini iara na, kokholo tuana nate mei kegra na. Eghuteuna tharakna te vahini iara na, eghuteuna naikno te gnafa ke lamna gna tharakna tuana nate mei kegra na eghu ia.

¹⁵ Eghuteuna mae ihei teke hata glepo mala nako ka khaꞌaghi teku ra tuana nate gnubra falehe ghotilo ka khaꞌaghi balu tharaknagna nei nogna gobigna lepo fateote'o. Naugna mae tuana ne eni kaisei najafra biꞌo te thono diꞌa fara ne ranghini Israel. Eghuteuna mae tuana jaola ne huhughuni nogu cheke iara na.”

¹⁶ Hamerane boibongi ka keha narane na, mae Josua ne batudi vike te gnafa Israel igre ne kafe mei ka vikedi thedire, eghuteuna mana ne vahini vikegna mae Juda.

¹⁷ Aonu mana ne vahini vikegna mae Juda, nei vikegna mae Sera. Kate kafe mei te gnafa vikegna mae Sera igre na, mana ne vahini tharaknagna mae Sabdi.

¹⁸ Aonu mae Josua ne vahini mae Ekan thugna mae Kami, gragna mae Sabdi kaisei mae ka vikegna mae Juda.

¹⁹ Eghuteuna mae Josua ne cheke eghu ka mae Ekan, “Ghema, iagho gognarona kegra ke ulugna God, noda Lord tahati maeda Israel! Iara magnahaghei nigho iagho te cheke thakledi unha teke edi iaghore. Iagho thosei pophoru kaisei glepo ka iara.”

²⁰ Aonu mae Ekan ne cheke eghu ka mae Josua, “Tutuani fara, iara la jafrahi ke ulugna God, noda Lord. Uve, igne unha teke eni iara na:

²¹ Ka teke magra tahati teke hata glepodi Jeriko ra, iara neke filoni kaisei famane pohe gna Babilonia, nei kaisei vido silva eghu, tahugna na jame phei kilo gram, nei kaisei vido gol, tahugna na jame kaisei vido kilo gram. Iara thono magnahaghedi fara glepo igre neke hata malagu thegu. Iara hata glepo igre neke titifuni lamna glose ka nogu suga tapuale na, baludi silva re pari lahu.”

²² Aonu mae Josua ne kurudi keha mae ne tei ka suga tapuale gna mae Ekan igne ne filodi glepo teke pophoru mana igre thofno leghuni unha teke chekeni mae Ekan. Eghuteuna silva igne ne au pari lahu tutuani fara.

²³ Mare hata ne mei glepo igre ka mae Josua nei ka hatimare mae biꞌodi Israel, mare lisei soru glepo igre ka glose na ke ulugna Lord.

²⁴ Aonu mae Josua baludi naikno te gnafa Israel igre ne batuni mae Ekan ne soru ka glogu Ako. Mare jaola hata nogna silva, nogna pohe, nogna gol, thugna nalhaꞌu, thugna gaꞌase, nogna buluka, nogna dongki, nogna sipu, nogna suga tapuale, nei nogna gobigna lepo fateote'o teke khotodi manare.

²⁵ Mae Josua ne cheke eghu ka mana, “Naugna unha sagho te eni ka ghehati puhi biꞌo ignea? Nu Lord ginauna na jaola tusu ari puhi biꞌo ka iagho.” Aonu naiknore ne kafe hata thina ne fada falehedi mae Ekan nei tharaknagna. Eghuteuna mare ne gnubra ka khaꞌaghi thinidire balu nodi gobigna lepo fateote'o.

²⁶ Eghuteuna mare ne bukru thina ke kligna thinigna mae Ekan. Tothoghei thina igne au ngala gognaro na. Naugna igne, mare kiloni vido igne, “Glogu Ako,” gaoghathogna na, Puhi Biꞌo. Ke leghugna igne, Lord ne theome diꞌatagna ka naiknodi Israel.