Josua 6 - Buka Blahi Ka Cheke Holo

Namono biꞌo Jeriko na ne groꞌe

¹ Ka narane tuana maedi Jeriko igre ne bobotho famaku grengathagna namono biꞌo na, naugna mare mhaghuni armi gna Israel. Theo kaisei mae te tangomana te jifla kosi na, ba te ruma mei lamna na.

² Nu Lord ne cheke eghu ka mae Josua, “Gognarona iara na snakre ari ka iagho namono Jeriko, balugna king, nei hatimare mae soldia fateote'o.

³ Iagho balugna nou armi na tei faligohoni namono igne kaisei fata kaisei narane ghilei thokeni namno narane.

⁴ Fitu mae pris te hata khufli igre ginauna tei ke uludi hatimare pris te pala nogu Bokis Blahi Nhaꞌa Cheke iara igne. Ka fafitu narane te tei faligohoni ghotilo namono igne fitu fata, mae pris te hata khufli igre ginauna kufli.

⁵ Kate nomhini ghotilo te kufli te raugha mare na, ghotilo kafe eha fabiꞌo. Ka vido narane igne, gringnigna namono te bara ka thina igne ginauna phaꞌe khoko soru pari. Eghuteuna nou mae soldia iagho igre ginauna doglo tei ruma lamna namono.”

⁶ Aonu mae Josua thugna mae Nun igne ne kilodi hatimare mae pris igre ne cheke eghu ka mare, “Ghotilo fitu mae pris te hata khufli teke horo ka hona sipu ra, ginauna tei ke uludi mae pris te pala nogna Bokis Blahi Nhaꞌa Cheke Lord igre.”

⁷ Eghuteuna mae Josua ne cheke eghu ka nogna soldiare, “Gognarona ghotilo tei faligohoni namono igne. Mae soldia te hata glepo mala magra ra ginauna tei ke uludi mae pris te pala nogna Bokis Blahi Nhaꞌa Cheke Lord igne.”

^8-9 Aonu mare ne leghuni unha te chekeni mae Josua igne. Hatimare mae soldia igre ne tei ke uludi mae pris te hata khufli igre. Eghuteuna mae pris te pala Bokis Blahi igre ne tei ke leghudi mare, eghuteuna keha tothoghei mae soldia ne tei ke leghudi mare. Eghuteuna mae pris te hata khufli igre ne ifu nodi khuflire.

¹⁰ Nu mae Josua ne cheke eghu ka mae soldia igre, “Ghotilo thosei eha ba ghagri kaisei cheke ghilei thokeni narane nate chekeni iara ka ghotilo na. Eghuteuna iara ginauna na cheke ranghi ghami ghotilo ame eha fabiꞌo nga ghotilo eghu!”

¹¹ Aonu mana ne cheke ka mae te mala pala Bokis Blahi igre mala tei faligohoni namono igne kaisei fata. Gnafa teuna, mare neke pulo ka nodi sugare neke thuru bongi tuana.

^12-13 Hamerane boibongi ka keha narane na, mae Josua kegra haghe ne batudi mare neke tei faligohoni namono igne. Mare ne eni igne jateula teke eni mare ka narane ululahu ia neu.

¹⁴ Ka fapea narane na, mare neke tei faligohoni namono na kaisei fata, jateula teke eni mare ka narane ululahu ia neu. Gnafa teuna, mare neke pulo thuru ka nodi namono na. Mare ne eni fabrahu igne nabagna namno narane.

¹⁵ Hamerane boibongi ka fafitu narane na, mare kegra haghe ne tei faligohoni namono igne jateula teke eni mare ka namno narane ululahu ra neu. Nu ka narane tuana mare ne tei faligohoni namono igne fitu fata.

¹⁶ Ka fafitu fata te tei faligohoni mare namono igne, mae pris igre ne tarabana mala kufli fabrahu. Aonu mae Josua ne cheke eghu ka mare, “Gognarona ghotilo eha fabiꞌo! Naugna Lord la snakrenihi namono igne ka tahati!

¹⁷ Tahati ginauna thofno goigoni ni fara namono igne baludi gobigna lepo fateote'o te au ke lamnagna, jateula noda fafara blahi eghu ka Lord. Rehab thau vine igne nei tharaknagna naꞌa te au ka nogna suga na igre ngala te mala thosei falehedi tahati na, naugna naꞌa neke pophoru phei noda mae tahati ra.

¹⁸ Nu fiofilo ghami eghu! Thosei hata kaisei glepo malami themi, naugna glepo igre mala gnubra fahui jateula kaisei fafara eghu ka Lord. Jame te eni ghotilo kaisei glepo te diꞌa na, Lord ginauna falehe ghami ghotilo.

¹⁹ Tahati ginauna theome gnubra fahui silva nei gol teu are baludi gobigna lepo teke horo mare ka bras, ba aean. Tahati ginauna tathaji baludi keha glepo teke lilisei teku tahati ra malagna Lord.”

²⁰ Kate cheke te gnafa mae Josua cheke igre, mae pris igre kufli ne raugha fara, eghuteuna mare te gnafa na ne kafe thagru ne eha fabiꞌo fara. Eghuteuna gringnigna namono te bara ka thina biꞌo igne ne phike ne grofo pari ka glose na. Eghuteuna mae soldia igre ne kafe chari doglo ne tei ruma lamna namono. Mare ne uluni namono Jeriko ka narane tuana.

²¹ Mare ne thofno aknu falehe ne hui ka naflahi gaꞌase ba nalhaꞌu, mae majaghani, ba mae biꞌo, baludi buluka, sipu, nei dongki.

Rehab nei tharakna gna ne karha ka narane igne

²² Mae Josua ne cheke eghu ka phei mae teke tei filoni namono igne, “Ghopa tei ruma ka sugagna Rehab mala hata fajiflani naꞌa baludi tharaknagna na, leghuni unha teke nhaꞌa chekeni ghopa ka naꞌa na.”

²³ Aonu phei mae igre tei ne ruma ka sugagna gaꞌase vine igne ne hata fajiflani naꞌa kosi baludi idogna, kmagna, thabusigna, gregagna nei kheragna te au ka suga igne. Mare ne hata naikno igre ne tei ka kaisei vido te keli rhegna vido te au naiknodi Israel.

²⁴ Mae Josua baludi nogna soldiare ne thofno gnubra namono igne baludi gobigna lepo fateote'o te au ke lamnagna. Nu gobigna lepo teke horo ka silva nei gol, baludi gobigna lepo teke horo ka bras nei aean teu igre kolho te theome gnubra mare na. Mare hata lepo igre ne lilisei baludi keha glepo te tathaji teku mare ka vido te mala tufru soruni Lord.

²⁵ Mae Josua ne theome faleheni Rehab balu tharaknagna, naugna naꞌa neke pophoru fakelidi nei fakarhidi neku phei mae teke kuru teidi mae Josua teke sighoni namono Jeriko. Vikegna naikno biꞌo igne au agne Israel ghilei mei posa ka narane gognarogne.

²⁶ Ka narane igne, mae Josua ne cheke faheta eghu fara ka nanghagna Lord, “Jame ihei te fariu riu babana fapulo namono Jeriko igne, Lord ginauna parani mae tuana. Kate fufunu mana gloku igne na, thugna nalhaꞌu ulu lahu mana na ginauna lehe. Eghuteuna kate loku fahui mana grengathagna bara thina igne na, thugna nalhaꞌu leghu lahu mana na ginauna lehe.”

²⁷ Mae Josua ne fnakno fara heva heva Kenan eidi glepo te edi mana igre. Eghuteuna Lord na ne au fabrahu balugna mana.