Josua 5 - Buka Blahi Ka Cheke Holo

¹ King te gnafadi Amo te au ke mosu Khoꞌu biꞌo Jordan igre, nei king te gnafadi Kenan te au rhegna Thongna Mediterenian igre eghu mare ne nomhini thoutonu eigna Lord te fakrangoni Khoꞌu biꞌo Jordan te kasa naiknodi Israel igne. Aonu mare ne thofno mhaghudi fara maedi Israel igre ne thofno glaꞌe soru gaoghathodire.

Josua ne chekedi mae nalhaꞌure mala vahe

² Ka narane igne, Lord ne cheke eghu ka mae Josua, “Iagho edi keha naflahi ka thina te fnonu mala vahe mae iheire teke theome vahe nga teu ka vikegna Israel.”

³ Mae Josua ne thofno leghuni unha teke chekeni Lord igne ne vahe mae nalhaꞌure. Mare ne kiloni vido igne, “Thogele Vahe Guli.”

^4-7 Thoutonu eigna te vahe igne neke eghu: Ka narane teke jifla mare Ijep igne, mae biꞌo nei mae majaghani teure neke kafe vahehi. Naugna te theome leghuni Lord maedi Israel igre na, mana ne lisei ranghidi kaisei papara biꞌo. Papara igne neku agne: Kate jifla mei mare Ijep na, mae te gnafa te nabadi te mala au ka armi na, mare na theome tangomana te tei thoke ka famane kantri aheva teke nhaꞌa chekeni Lord ka mae biꞌodi Israel tifa ra. Naugna mae te mala tei ka magra re, mare neke kafe lehe ka narane teke tei tafri mare ke lamna namono nagou nabagna phiatutu finogha. Aonu Lord ne vahidi thudi mae teke lehe igre mala ke tughudi mare. Aonu mae Josua ne vahe mae majaghani nei mae biꞌo teu igre, naugna kani teke tei tafri mae Israel igre ka namono nagou na, mare neke theome vahe.

⁸ Kate kafe vahe te gnafa na, mare au kmu ka nodi suga tapualere mala ghilei ke mafo fakeli vido teke vahe na.

⁹ Lord ne cheke eghu ka mae Josua, “Gognarona, iara na hata fadelei mamaja teke au ka ghotilo funu ka narane teke au sneka ghotilo Ijep tifa ia.” Naugna igne, mare kiloni namono igne Gilgal, gaoghathogna na, “Hata fajifla,” eghuteuna nangha igne au ngala ghilei mei posa ka narane gognarogne.

¹⁰ Kate au teu mare Gilgal ka sare rhegna Jeriko igne, mare ne eni kaisei Gaghamu Ghasa-Polho ka grafi nabotho fati gna nhigra igne.

¹¹ Eghuteuna ka keha narane na, mare ne ghamu bali balu bret te theo isi gna na. Igne ululahu te ghamu gano te joꞌu mare Kenan.

¹² Eghuteuna gano te kiloi “manna” te sughu ghamu koba mare igne neke theome soru mei. Funu ka narane igne, mare ne ghamu fabrahu gano te joꞌu mare ka kantri igne.

Mae Josua ne filoni kaisei mae te loku naflahi

¹³ Kaisei narane, kate tei te namo mae Josua Jeriko igne, mana ne filoni kaisei mae te kegra teu ke ulugna mana na. Mae igne loku kaisei naflahi mala magra. Mae Josua ne tei namo ka mae igne, ne cheke eghu ka mana, “Iagho kaisei mae balumi ghehati, ba iagho kaisei mae naoka?”

¹⁴ Nu mae igne ne cheke eghu, “Theo, iara mei agne naugna iara mae komanda gna nogna armi Lord.” Kate nomhini mae Josua igne, mana ne pogho soru pari ne cheke eghu ka mae igne, “Mae biꞌo, iara nou mae gloku iagho. Unha te magnahagheni iagho te mala eni iara na?”

¹⁵ Mae biꞌo igne ne cheke eghu ka mae Josua, “Hata koko nou sadol are, naugna vido te kegra teu iagho igne thono blahi fara.” Aonu mae Josua ne leghuni unha te chekeni mana na ne hata koko nogna sadol re.