Josua 4 - Buka Blahi Ka Cheke Holo

Thina tuthuana

¹ Kate kasa te gnafa naiknodi Israel igre ka Khoꞌu biꞌo Jordan igne, Lord ne cheke eghu ka mae Josua,

² “Iagho vavahi nabotho phei mae lida ka nabotho phei vikemi ghotilo are.

³ Eghuteuna iagho cheke faheta ka mare mala pala nabotho phei thina eghu ka vido te krango teke kegra mae pris ra. Mare mala pala thina igre mala tei lilisei ka vido aheva nate thuru ghotilo bongi na.”

⁴ Aonu mae Josua ne kilodi nabotho phei mae teke vavahi manare,

^5-6 ne cheke eghu ka mare, “Ghotilo tei ka khoꞌu gno mala pala nabotho phei thina biꞌo ka vido teke kegra mae pris teke pala nogna Bokis Blahi Lord noda God ra. Nabotho phei thina biꞌo igre eidi nabotho phei vikeda tahati igre, mala jateula tuthuanagna eghu unha teke eni Lord ranghi ghita na. Eghuteuna thogheiro ke leghure, thuda tahatire ginauna ghusnadi gaoghathodi thina igre.

⁷ Tahati ginauna cheke eghu ranghidi, ‘Igne tuthuana eigna narane teke pala mae pris nogna Bokis Blahi Nhaꞌa Cheke Lord na teke kasa ka Khoꞌu biꞌo Jordan igne, eghuteuna khoꞌu biꞌo igne neke krango. Thina igre ginauna au fabrahu ka vido igne, eghuteuna iheire nate karha mei ke leghuda tahati re ginauna ghathoni fabrahu unha teke eni ka tahati ka vido igne.’ ”

⁸ Nabotho phei mae igre ne leghuni unha te chekeni mae Josua ka mare na. Aonu mare pala nabotho phei thina igre fari hotei khoꞌu biꞌo ne tei ka vido aheva nate fakegra haghe mare nodi suga tapuale na. Thina igre eidi nabotho phei vikegna Israel.

⁹ Eghuteuna mae Josua jaola ne titili nabotho phei thina fari hotei khoꞌu biꞌo ka vido teke kegra hatimare mae pris teke pala Bokis Blahi igne. Bukrei thina igne au ngala ka vido igne ghilei mei posa ka narane igne.

¹⁰ Mae pris igre kegra fabrahu farihotei khoꞌu biꞌo ne ghilei gnafa unha teke chekeni Lord ka mae Josua, jateula unha teke chekeni Moses ka Josua tifa. Naiknore ghosei ne kasa ka keha phile khoꞌu na.

¹¹ Ke leghugna te kasa te gnafa naiknore ka keha phile khoꞌu biꞌo na, mae pris te pala nogna Bokis Blahi Nhaꞌa Cheke Lord igne ne kasa ka keha phile khoꞌu na kate filo teu naiknore.

¹² Vikegna mae Ruben, vikegna mae Gad, nei gaga ka mae Manase teu igre mare ne pala glepo mala magra re ne kulu tei ka keha naiknodi Israel, leghuni unha teke chekeni mae Moses tifa na.

¹³ Jame phiatutu thogha soldia tarabana mala magra ne salaꞌu ke ulugna Lord ne tei ne kegra ka sare rhegna Jeriko.

¹⁴ Ka narane igne, Lord ne fafnaknoni mae Josua ka gaoghathodi naikno te gnafa Israel. Mare ne ghatho tahuni fabrahu mae Josua ka nakarhagna mana na, jateula mare teke ghatho tahuni mae Moses tifa ia neu.

^15-16 Lord ne cheke ka mae Josua mala cheke ka mae pris te pala Bokis Blahi igne mala daka mata ka khoꞌu na.

^17-18 Aonu mae Josua ne leghuni unha te chekeni Lord ka mana igne ne chekedi mae pris igre ne daka mata ka gerigna khoꞌu na. Ka vido narane te daka mata mare ka khoꞌu na igne, khoꞌu na neke britha fapulo jateula teke ulu lahu ia neu.

¹⁹ Naiknore ne kasa ka Khoꞌu biꞌo Jordan ka fabothogna narane nhigra Abib ne tei au Gilgal ke maghati Jeriko.

²⁰ Mae Josua ne titili nabotho phei thina teke pala mare ka Khoꞌu biꞌo Jordan igre jare.

²¹ Aonu mana ne cheke eghu ka naiknodi Israel igre, “Sua nate karha mei ke leghuda tahatire ginauna ghusna eghu ka kmadire, ‘Unha eghu si gaoghathodire thina igrea?’

²² Cheke eghu ranghidi, ‘Tuthuanadi kuꞌeda tifa ra neke kasa ka vido te krango fari hotei Khoꞌu biꞌo Jordan.’

²³ Naugna Lord noda God neke cheke ranghini khoꞌu na neke krango neke ghilei kasa neke gnafa naiknore. Khoꞌu na moja neu ne ghilei kasa ne gnafa naiknore ka keha phile na jateula teke eni Lord ka Thongna Ukru na ranghidi kuꞌeda tifa ra neu.

²⁴ Kate filodi glepo igre, naikno te gnafa ka nauthoglu igne ginauna laseni Lord te au nolaghi biꞌo na, eghuteuna tahati ginauna ghatho tahuni fabrahu mana.”