Josua 3 - Buka Blahi Ka Cheke Holo

Mae Israel ne kasa ka Khoꞌu biꞌo Jordan

¹ Hamerane boibongi ka keha narane na, mae Josua baludi naikno te gnafadi Israel igre kegra haghe ne jifla Akesia, aonu mare ne tei au rhegna Khoꞌu biꞌo Jordan. Mare ofo neu ka vido igne mala tei kasa ka keha phile khoꞌu na.

² Ke leghu thilo narane, hatimare mae lida ne cheke eghu ka naiknore,

³ “Kate filodi ghotilo hatimare mae pris, vikegna mae Livae, te tei pala nogna Bokis Nhaꞌa Cheke Lord noda God igre, ghotilo leghudi mare.

⁴ Tahati neke theome mei thoke ka vido igne tifa na, eghume mae pris gre ginauna falalase nabrou na mala leghuni tahati. Nu ghotilo thosei tei namo ka Bokis Blahi igne. Ghotilo au fakhaba nabagna kaisei kilo mita.”

⁵ Mae Josua ne cheke eghu ka naiknore, “Ghotilo mala kulu fagae ghami themi ka tathagna Lord, naugna nathuꞌu na, mana ginauna eni kaisei kofubobhoi farihoteida tahati.”

⁶ Ka fapea narane na, mae Josua ne cheke eghu ka hatimare mae pris, “Ghotilo pala Bokis Blahi igne mala tei ului. Eghuteuna naikno te gnafare ginauna ari ke leghumi ghotilo.” Eghuteuna mae pris re ne leghuni unha te chekeni mana na.

⁷ Lord ne cheke eghu ka mae Josua, “Gognarogne, iara ginauna fafnaknoni nanghamu iagho na ka tathadi naiknodi Israel, mala laseni naiknore te au fabrahu iara balumu iagho na, jateula teke au fabrahu iara balugna mae Moses tifa ia eghu.

⁸ Kate thoke ka khoꞌu biꞌo na, iagho chekedi mae pris ra mala soru kegra ke lamna khoꞌu.”

^9-11 Ke leghu, mae Josua ne cheke eghu ka naiknore, “Ghotilo kafe khapru mei agne mala nomhini unha Lord noda God te magnahaghei chekeni ka tahati na. Lord noda God mae ihei te karha nei funei frunidi namono te gnafa ka nauthoglu igne. Gognarogne, hatimare mae pris ginauna pala nogna Bokis Nhaꞌa Cheke mana na mala kulu kasa ke uluda tahati ka khoꞌu biꞌo na. Gognarogne, ghotilo ginauna laseni Lord te au baluda tahati na. Ghotilo ginauna filoni kate tei ruma tahati ka kantri igne, Lord ginauna ngolhi fajifladi naikno te au ka namono Kenan, vikegna mae Hit, vikegna mae Hivi, vikegna mae Peres, vikegna mae Gagas, vikegna mae Amo nei vikegna mae Jebus.

¹² Eghuteuna ghotilo nabotho phei vikegna Israel ra, ghotilo vavahi nabotho phei mae, kaisei mae ka kaisei vike.

¹³ Mae pris igre mare na pala nogna Bokis Blahi Lord mae funeigna nauthoglu igne. Kate soru te kegra mare lamna khoꞌu na, khoꞌu biꞌo te britha igne ginauna na krango, eghuteuna khoꞌu na ginauna na tei au ka kaisei vido kolho te kegra delei jare jateula kaisei gringni biꞌo eghu.”

^14-15 Ka narane tuare Khoꞌu biꞌo Jordan igne nabritha biꞌo koba ka vido te mala dokha gano ka nagare na. Kate jifla naiknore te tei kasa ka khoꞌu na, mae pris te pala Bokis Blahi na igre ne kulu tei, eghuteuna naiknore ne tei ke leghudi mare. Ka vido te kegra mae pris gre lamna khoꞌu biꞌo na,

¹⁶ khoꞌu na ne kegra snoto ne tei au delei fara rhegna namono Adam te namo ka namono Saretan. Eghuteuna keha philegna khoꞌu biꞌo te soru Thongna Lehe igne ne jaola ne thono krango fara. Naiknore ne kafe kasa ka keha phile na rhegna namono Jeriko.

¹⁷ Eghuteuna kate kasa mare na, hatimare mae pris kegra fabrahu neu fari hotei khoꞌu tela krango hi na ne ghilei kasa ne hui naiknore ka keha phile khoꞌu na.