Josua 23 - Buka Blahi Ka Cheke Holo

Nogna cheke Josua ka naiknodi Israel

¹ Kmana finogha ke leghu, Lord ne tusu ranghidi naiknodi Israel pharikeli baludi nodi naoka fateote'o te au faligohodi teu. Ka narane tuare, Josua la thofno kuekuꞌe farahi.

² Aonu kaisei narane Josua ne kilo fodudi mae biꞌodi Israel, nei mae komanda te gnafa, nei mae mala baubatu te gnafa, nei mae funei te gnafa. Mana ne cheke eghu ka mare, “Gognarona, iara la kuekuꞌe farahi.

³ Ghotilo la filodihi gobigna lepo teke edi Lord noda God ka naikno teke kulu au ka tahati ka namono igne. Ghotilo laseni Lord noda God neke magra ranghi ghita tahati.

⁴ Eghuteuna iara la snakre arihi glose te funu ka Khoꞌu biꞌo Jordan ke maghati na tei gnafa ka Thongna Mediterenian ke mosu na. Uve, iara jaola snakre arihi nodi glose keha naiknoi teke uludi tahati ka magra ra nei baludi glose ka keha naiknoi te theome uludi nga teu tahati ra.

⁵ Lord noda God tahati na neke nhaꞌa chekehi ka tahati te mana ginauna edi noda naoka tahati re mala rikha ghita tahati. Uve, kate tei ruma tahati ka nodi glose mare na, Lord nate ngolhi fajifladi mare na, eghuteuna tahati ginauna hata nodi glose mare na leghui unha teke nhaꞌa cheke mana ka tahati na.

⁶ “Eghume, ghotilo mala famane leghudi gobigna lepo teke rioriso Moses ka Buka Vetula ra.

⁷ Ghotilo thosei fofodu baludi naikno bongihehe te au teu balumi ghotilo are. Eghuteuna ghotilo thosei tarai ka nanghadi nodi god mare tuare. Eghuteuna ghotilo thosei baubahu tadi ba loku ranghidi ba pogho soru ranghidi.

⁸ Ghotilo mala ghatho tahuni Lord jateula te sughu eni ghotilo te ghilei mei posa gognarogne.

⁹ “Naikno teke au ka namono igne tifa ra, mare kmana fara nei jaola nheta fara ka magra na. Nu leuleghu fata na, kate tei ghotilo te magra ka mare na, Lord thegna te ngolhidi ke uludi tathami ghotilo re. Eghuteuna leuleghu fata na, theo kaisei ka nomi naoka ghotilo igre te tangomana te ulu ghami ghotilo na.

¹⁰ Jame kaisei thogha mae magnahaghei aknu falehe ghami ghotilo, kaisei mae ka ghotilo kolho nate ngolhidi mare na, naugna Lord phile balumi ghotilo jateula teke nhaꞌa chekeni mana ka ghotilo ia eghu.

¹¹ Eghume leuleghu narane na ghotilo mala thofno namhani Lord noda God.

^12-13 “Ghotilo laseni igne, jame te figri tagruni nei theome leghuni teu ghotilo Lord te loku fodu baludi naikno bongihehe are ba tolaghi ka thudi gaꞌase mare re, ba snakredi mare mala tolaghi ka thumi gaꞌase ghotilo re, Lord ginauna tirogna togho ghami ghotilo. Eghuteuna jame te fofodu ghotilo ka naikno bongihehe are nei tei magra baludi mare teuna, Lord ginauna tirogna ngolhi fajifladi naikno bongihehe te au ka nomi namono ghotilo are. Jame te loku fodu ghotilo ka puhidi mare te thono diꞌa fara are na, mare ginauna na jateula kaisei phighoro eghu mala fakhale ghami ghotilo. Eghuteuna ghotilo ginauna na jateula te snoꞌo ke lamnagna kaisei khora ra eghu. Eghume puhidi mare te diꞌa tuare ginauna para ghami ghotilo jateula te puphuri naikno ka thagrumi ghotilo ra eghu, ba jateula nila te churu ka tathami ghotilo ra eghu. Eghuteuna ginauna na theo kaisei naikno ka ghotilo nate au ka namono teke tusu arihi mana ka ghotilo igne.

¹⁴ “Nogu narane te mala lehe iara na la namohi gognarona. Eghuteuna ghotilo te gnafa na thofno laseni fara Lord neke tufa glepo te keli ka tahati, jateula teke nhaꞌa chekeni mana tifa ia eghu. Mana neke tajini nogna nhaꞌa cheke na nei edi gobigna lepo teke nhaꞌa chekedi mana re.

¹⁵ Jateula tuana eghu Lord neke edi gobigna lepo te keli teke nhaꞌa chekedi mana re, puhi biꞌo te gnafa teke kulu cheke eidi ka ghotilo ra, mana ginauna tangomana te edi puhi biꞌo igre mala thoke ghami ghotilo nei goigonini nomi namono ghotilo igne jame te theome leghuni ghotilo mana na.

¹⁶ Lord na noda God tahati. Jame te huhughuni ghotilo nogna nhaꞌa cheke mana teke eni baluda tahati ia, eghuteuna jame te tei ghotilo te pogho soru ka keha god delei na, mana ginauna diꞌatagna fara ka ghotilo eghuteuna ginauna thofno para ghami ghotilo. Eghuteuna jame te eghu ghotilo na, theo kaisei ka ghotilo nate au ka famane glose teke tusu ari mana ka ghotilo ana.”