Josua 20 - Buka Blahi Ka Cheke Holo

Namono aheva naiknore tangomana te tei poru tagna

¹ Kaisei narane Lord ne cheke ka Josua

² mala cheke eghu mana ka naiknodi Israel, “Ghotilo vahidi namono te mala poru tagna na, leghuni unha Lord teke chekeni tifa ka Moses.

³ Jame kaisei mae theome ghathoni te mala faleheni keha mae na teuna, nu lehe mae igne teuna, mae igne tangomana te rikha te tei poru ka kaisei namono ka igre na. Eghuteuna jame kaisei kheragna fofodu mae te lehe igne mei mala faleheni mae igne ke tughuni nakarhagna kheragna fofodu na teuna, mana ginauna theome tangomana te faleheni mana na.

⁴ Jame kaisei mae eni igne, mana ginauna tangomana te tei poru ka kaisei namono ka igre, nu mana mala kulu tei filodi mae lida ka grengatha gna gringni thinagna namono igne mala chekeni eigna unha teke eni igne, mala tangomana mare te fateni mana na. Ke leghu, mare ginauna tangomana teke snakreni mana te mala au ka namono igne baludi mare, eghuteuna mare na tusu lao kaisei vido mala au mana tagna.

⁵ Jame kheragna mae igne au nogna nolaghi te mala aknu faleheni mae igne, eghuteuna mei mana me toredi maegna ka namono igne eigna mae igne, nu mare te gnafa na theome snakreni mae igne ka mana teuna, mare mala reireghi fakelini mana mala theome tangomana kheragna mae igne te mei aknu faleheni keha mae igne naugna glehe igne kaisei glehe kakarha kolho eghuteuna mae igne theome diꞌatagna ka mae ihei te lehe na.

⁶ Mae tuana tangomana te au ka namono igne ghilei fateni mare, eghuteuna jame nogna cheke mana re tutuani, mana ginauna au ka namono igne ghilei thokeni narane pris biꞌogna Israel te lehe na. Eghuteuna ke leghu na, puhi biꞌo teke eni mae igne ginauna gnafa eghuteuna mana tangomana teke figri ka nogna suga na.”

⁷ Aonu naiknodi Israel igre ne vahidi thilo namono mala poru ke mosu Khoꞌu biꞌo Jordan. Nanghadi re Kedes jare Galili te au ka thogele ka nogna rijon Naftali, nei Sekem te au ka thogele ka nogna rijon Efrem, eghuteuna Hebron te au ka thogele ka nohi Juda.

⁸ Eghuteuna mare vavahi keha thilo namono ke maghati Khoꞌu biꞌo Jordan, nanghadi re Bese rhegna Jeriko ka namono nagou holo ka thogele ka nogna rijon Ruben, eghuteuna Ramot jare Gilead ka nogna rijon Gad, nei Golan jare Basan te au ka nogna rijon Manase.

⁹ Igre namono teke vavahi mare, glahu kaisei naiknogna Israel ba kaisei naikno phosa au baludi mare tangomana te tei poru ka kaisei ka namono igre glahu teke faleheni keha mae na igne neke theome ghathoni kolho mala faleheni mana teku na. Eghuteuna neuba kaisei kheragna mana ne mei mala ke tughuni glehe igne neu, mana na theome eni igne ghilei tei mana ka fate mala laseni glahu glehe igne neke theome ghathoni kolho mala eghu teku na.