Josua 2 - Buka Blahi Ka Cheke Holo

Mae Josua ne kuru tei phei mae mala tei fasigho ka namono biꞌo Jeriko

¹ Kate au teu mae Josua baludi keha vikedi Israel ka vido te au gaju akesia igne, mana kurudi phei mae mala tei Kenan mala filo poru ka namono Jeriko nei ka namono te au faligohoni. Eghuteuna kate tei poru phei mae igre ke lamnagna namono igne, phei mae igre tei ne au ka sugagna kaisei gaꞌase vine, nanghagna na, Rehab.

² Kate nomhi mae funeigna Jeriko igne te mei au phei mae igre ke lamnagna namono na te mala filo glani vido igne,

³ mana kurudi keha mae ne tei ka gaꞌase igne, ne cheke eghu ka naꞌa, “Iagho falalase phei mae te mei filo poru ka noda namono tahati gne, te mei au teu ka sugamu iagho na are!”

⁴ Nu naꞌa porudihi phei mae igre ne cheke eghu ka mare, “Tutuani, phei mae igre neke mei ka sugagu iara na gne, nu iara theome lasedi neke mei funudi aheva.

⁵ Phei mae igre kela jiflahi neke bobotho nga grengathagna namono biꞌo igne kani theome plulu nga neku naprai na. Iara theome laseni aheva te tei repa na. Nu jame te ghosei te tei ghotilo ke leghudire, ghotilo ginauna tangomana te tei thafodire.”

⁶ Nu Rehab ne pophoru phei mae igre ke tagru suga ke pari khifra teke lilisei naꞌa te mala ghoꞌe ka naprai re.

⁷ Eghume, nogna mae gloku mae king igre jifla ne tei hirodi phei mae igre, eghuteuna ke leghugna te jifla te tei mae igre, mae greireghire ne bobotho grengathagna namono na. Mare hirodi phei mae igre ne ghilei tei posa ka vido aheva te tei kasa ka Khoꞌu biꞌo Jordan.

⁸ Kate theome thuru nga teu phei mae igre, Rehab tei ne filodi phei mae igre

⁹ ne cheke eghu, “Iara laseni Lord na la tusu arihi kantri igne ka ghotilo! Eghuteuna naikno te gnafa ka kantri igne mhaghu nodi fara ka ghotilo gognarona.

¹⁰ Ghehati nomhinihi thoutonu eimi ghotilo kate jiflami Ijep ia! Lord neke famojani Thongna Ukru na neke kasa ghotilo ka glose te moja. Eghuteuna ghehati jaola nomhinihi thoutonu eimi ghotilo te falehedi king Sihon ghe king Og, phei mae ka vikegna Amo te au ke maghati Khoꞌu biꞌo Jordan. Ghotilo neke falehedi phei mae igre baludi nodi naikno te gnafara.

¹¹ Kate nomhidi ghehati thoutonu eidi glepo igre, ghehati mhaghu nomi fara. Eghuteuna gognarona gaoghathomi ghehatire thofno glaꞌe farahi. Lord nomi God ghotilo igne mana thofno God gna kligna nei nauthoglu igne.

¹² “Gognarona iara magnahaghei ghami ghopa te eni kaisei nhaꞌa cheke ka nanghagna nomi God na mala theome eni kaisei glepo te diꞌa ka iara baludi tharaknagu iara igre, jateula te eni iara ka ghopa gognarogne eghu. Ghopa na eni kaisei fagaglana ranghi ghau iara mala tutuani nomi nhaꞌa cheke na.

¹³ Ghopa eni kaisei nhaꞌa cheke ka iara mala fakarhidi idogu, kmagu, greghagu, thabusigu nei tharaknagu fateote'o. Ghotilo ginauna mala thosei falehe ghami ghehati hui.”

¹⁴ Aonu phei mae igre ne cheke eghu ka naꞌa, “Snakreni Lord mala falehe ghami ghepa jame te theome leghuni ghepa nhaꞌa cheke igne. Eghuteuna jame te theome chekeni iagho ka ihei nga eigna glepo te eni ghepa igne na, ghepa ginauna na theome eni kaisei glepo te diꞌa ka ghotilo. Eghuteuna kate snakreni Lord kantri igne ka ghehati na, ghehati ginauna keli ranghi nigho iagho baludi iheire fateo ka tharaknamu iagho igne.”

¹⁵ Sugagna thau igne au kligna, ke lamnagna gringnigna namono igne. Aonu naꞌa ne farurhu sorudi phei mae igre ka phukri ne jifla ka widogna namono na.

¹⁶ Naꞌa ne cheke eghu ka phia mare, “Ghopa faghose tei poru ka thogele ro nabagna thilo narane. Eghuteuna ghopa tangomana teke pulo ka namonomi na ke leghugna teke pulo nogna soldia mae king gre.”

¹⁷ Tifeiro na, phia mare neke cheke eghu ka naꞌa, “Ghepa ginauna tajini nhaꞌa cheke teke edi ghepa ka iagho ra.

¹⁸ Nu igne unha te mala eni iagho na. Kate mei ghehati na, iagho hata gnarho ukru igne mala fagefe soru ka wida teke farurhu soru ghami ghepa iagho ka phukri igne mala laseni ghehati nou suga iagho na. Eghuteuna iagho idomu, kmamu, greghamu, thabusimu teu igre balu tharaknadi mala mei au fodu ka suga igne.

¹⁹ Jame ihei te jifla ka suga igne, eghuteuna lehe ka ghehati teuna, tuana nakhibogna thegna, ghehati ginauna theome au papara tagna. Nu jame kaisei ka ghehati te aknu falehe kaisei te au ke lamnagna suga igne na, ghehati ginauna au papara tagna.

²⁰ Nu neuba, jame te toutonudi iagho unha te edi ghepa agne igre na, ghehati ginauna na theome tajini nhaꞌa cheke igne.”

²¹ Naꞌa kelitagna fara ka nodi cheke phei mae igre ne farurhu sorudi ka phukri ne jifla ne tei. Eghuteuna ke leghugna tela teihi phia mare na, naꞌa ne haru gnarho ukru igne ne fagefe soru ka wida na.

²² Phei mae igre tei ne poru ke leghu thogele nabagna thilo narane. Aonu nogna soldia king gna Jeriko igre tei ne hirodi phia mare ka vido te gnafa ke kosigna namono biꞌo na nabagna thilo narane. Nu mare theome tangomana te thafodi phei mae igre, aonu mare neke pulo ka namono na.

²³ Ke leghu, phei mae igre neke soru funudi ka thogelero neke tei kasa ka Khoꞌu biꞌo Jordan neke pulo ka mae Josua. Eghuteuna phia mare ne toutonu ka mae Josua eidi gobigna lepo te edi phei mae igre.

²⁴ Phia mare ne cheke eghu ka mae Josua, “Tahati thofno laseni Lord na snakre meihi ka tahati namono biꞌo igne. Naikno te gnafa ka namono igre thono mhaghu nodi fara ka tahati.”