Josua 18 - Buka Blahi Ka Cheke Holo

Josua ne tufa fahui glose na ka keha vikedi Israel

¹ Ke leghugna te magra te uludi nodi naokare, naiknodi Israel gre mei ne khapru ka namono Saelo ne lisei haghe nogna Suga Tapuale te Blahi Lord na ka vido igne.

² Ka narane tuare fitu vike ka mare theome khotogna kaisei glose.

³ Aonu mae Josua ne cheke eghu ka mare, “Niha fata ofou ame hata nomi glose nga eghu si ghotilo ia? Lord nodi God kuꞌemi ghotilo tifa ra teke tufahi glose igne ka tahati. Tei si ghotilo hata nomi glose.

⁴ Vavahi thilo mae ka vike te gnafa ghotilo are. Iara ginauna kurudi mare mala tei filoni glose igne mala nonohi glose na eghuteuna vike te gnafa re ginauna au nodi glose. Eghuteuna ke leghugna eni te gnafa igne, mare nake pulo mei ka iara.

^5-6 Mare ginauna tufa glose igne ka fitu nohi. Eghuteuna mare mala rioriso soru ripot eidi nohi ka vido igre, eghuteuna mala ke hata fapulo ripot igne ka iara. Iara ginauna lalahu khale mala laseni glose igne, aheva Lord noda God tahati igne te tusu mei ka vike tahati igre. Nu vikegna Juda igre ginauna auhi ka rijon ke mata. Eghuteuna vikegna Josep ginauna auhi ka phei rijon ke raru te theome au ke lamnagna nodi fitu rijon mare teke tufa ghotilo gognarogne.

⁷ Vikegna mae Livae igne ginauna theo kaisei glose jateula keha vike are eghu, naugna mare loku jateula nogna pris Lord eghu, eghuteuna nodi gloku mare igne tughugna glose te tusu lao God ka mare na. Vikegna Gad, nei vikegna Ruben, nei vido gaga ka vikegna Manase teu igre la auhi glose ke maghati Khoꞌu biꞌo Jordan. Igne glose Moses nogna mae gloku Lord teke tusu lao ka mare tifa.”

⁸ Mae igre tei ne eni unha teke chekeni mae Josua ka mare na.

⁹ Mare ne tei tongana ka vido te gnafa ka glose igne, eghuteuna mare ne rioriso soru gobigna lepo eigna te tufa mare glose igne ka fitu rijon baludi namono te au ke lamnagna rijon igne. Kate nonohi te gnafa vido igre, mare neke figri ka mae Josua Saelo.

¹⁰ Eghuteuna jare Saelo ke ulugna Lord, mae Josua ne lalahu khale mala laseni rijon aheva Lord nate tusu lao ka vike igre te mala khotogna na. Igne unha te eni Josua kate tufa mana rijon igre ka fitu vike te theome khotogna kaisei glose na.

¹¹ Kate tufa Josua glose igre, vido glose ulu lahu na tei ka vikegna Benjamin. Nodi rijon mare na au farihotei nodi rijon vikegna Juda nei nodi rijon vikegna Efrem.

¹² Fofotagna rijon igne funu ka Khoꞌu biꞌo Jordan, eghuteuna tei kasa ka keha phile na ke holo thogele ke raru Jeriko, eghuteuna ke figri tei ke holo ka thogele rijon ke mosu tei posani namono nagou Bet-Aven.

¹³ Fofota igne tei ke mata thogele rhegna namono Lus, keha nanghagna namono igne Betel. Eghuteuna fofota igne sukha Atarot tei salaꞌu ka keha phile ke paka thogele biꞌo Bet-Horon.

¹⁴ Fofotagna ke mosu na fufunu ka vido igne, eghuteuna lithui tei ke mata thogele biꞌo fei Bet-Horon tei posani namono Kiriat-Jaerim, ka nodi rijon vikegna Juda. Igne fofotagna rijon igne ke mosu na.

¹⁵ Eghuteuna fofotagna ke mata na funu ka namono Kiriat-Jaerim ke mosu na tei posani glokha khoꞌu Neftoa.

¹⁶ Eghuteuna ke soru paka ka pesigna thogele ke raru glogu Refaem aheva glogu Hinom eghuteuna tei salaꞌu ka keha phile namono Jebus eghuteuna tei posa ke mata glokha khoꞌu En-Rogel.

¹⁷ Fofota igne figri tei ke raru mala tei posani glokha khoꞌu En-Semes, eghuteuna doglo tei posa Gelilot ka keha phile te mala soru ka thabafe te kiloni Adumim aheva nabrou na te salaꞌu farihoteidi thogele ro. Fofota igne sukha tei posani nogna Thina Bohan. Bohan igne, nanghagna kaisei thugna Ruben.

¹⁸ Fofota igne sukha ka thogele biꞌo ke raru Bet-Araba aheva iagho tangomana te filo soru ka glogu Jordan,

¹⁹ eghuteuna lithui mei ka thogele Bet-Hogla. Fofota igne tei gnafa ka Thongna Lehe ka vido aheva te ari te gnafa Khoꞌu biꞌo Jordan. Igne fofotagna glose ke mata igne.

²⁰ Fofotagna ke maghati na ka Khoꞌu biꞌo Jordan. Igne fofotagna glose te khotogna vikegna Benjamin.

²¹ Nanghadi nodi namono tharakna ka vikegna Benjamin: Jeriko, nei Bet-Hogla, nei Emek-Kesis,

²² nei Bet-Araba, nei Semaraem, nei Betel,

²³ nei Avim, nei Para, nei Ofra,

²⁴ nei Kefaramoni, nei Ofni, nei Geba. Igre nabotho phei namono te au ka rijon igne baludi namono ikodi te au faligohodi mare.

²⁵ Eghuteuna mare au keha namono langau, nanghadi re igre, Gibeon, nei Rama, nei Berot,

²⁶ nei Mispa, nei Kefira, nei Mosa,

²⁷ nei Rekem, nei Irpel, nei Tarala,

²⁸ nei Sela, nei Haelef, nei Jebus, keha nanghagna na Jerusalem, nei Gibea, nei Kiriat-Jaerim. Igre nabotho fati namono te au ka rijon igne baludi namono ikodi te au faligohodi mare. Igre glose vikegna Benjamin te khotodi re.