Josua 17 - Buka Blahi Ka Cheke Holo

Nodi glose vido gaga vikegna mae Manase

¹ Aonu mare ne snakre lao glose ke mosu Khoꞌu biꞌo Jordan igne ka vikegna mae Manase thugna ululahu mae Josep. Nanghagna thugna nalhaꞌu ululahu mae Manase na mae Makia, eghuteuna thugna mana na mae Gilead. Eghuteuna mae Moses neke tusu laohi phei glose igre Gilead ghe Basan te au ke maghati khoꞌu Jordan igre naugna mae igre mae soldia keli.

² Eghuteuna glose ke mosu Khoꞌu biꞌo Jordan igre, mae Josua neke snakre laohi ka keha vido gaga ka vikegna mae Manase nanghadi re, mae Abiesa, nei mae Helek, nei mae Asriel, nei mae Sekem, nei mae Hefa, nei mae Semida.

³ Hefa thugna Gilead, eghuteuna mae Gilead gne thugna mae Makia, thugna mae Manase. Mae Hefa gne neke au kaisei thugna nalhaꞌu nanghagna Selofehad. Mae igne au glima thugna gaꞌase eghuteuna theo kaisei thugna nalhaꞌu, nanghadi gaꞌase igre neke Mala, nei Noa, nei Hogla, nei Milka nei Tiasa.

⁴ Gaꞌase igre tei ne filodi pris biꞌo Eliesa ghe mae Josua nei keha nodi lida mae Israel. Reꞌe ne cheke eghu, “Tifa na, neke cheke ka mae Moses mala snakre mei keha glose ka ghehati, mala jateula keha mae thabusimi ghehati te au nodi glose igre eghu, mala jaola ngau ghehati mala au nomi glose themi.” Aonu mae lida igre ne eni unha teke chekeni Lord ka mae Moses tifa ia. Eghuteuna mare ne snakre lao ka rijon aheva hatimare thabusigna te khotogna, mala tangomana mare te au nodi tagna.

⁵ Vikegna mae Manase igre ne khotogna nabotho rijon ke mosu Khoꞌu biꞌo Jordan baludi phei rijon Gilead ghe Basan te au ke maghati Khoꞌu biꞌo Jordan.

⁶ Mare eni igne naugna goro gaꞌase igre jaola khotodi glose baludi keha mae ka vikedi mare igre, mala tangomana mare te khoto glose kate au mare tagna na. Nu glose Gilead igre, mare la snakre laohi ka keha vido gaga vikegna mae Manase mala khotogna.

⁷ Nodi rijon vikegna Manase igre funu ka nodi nohi vikegna Asa tei posani namono Mikmetat ke maghati namono Sekem. Nohi igne tei ke mata glokha khoꞌu rhegna namono Tapua, nei nodi glose mare te au ka rijon tuana.

⁸ Glose te au te lithui ka namono na igre nodi vikegna Manase, nu namono igne nodi vikegna Efrem.

⁹ Fofotagna nogna rijon Manase ke mosu te sukha ka glogu Kana igne leghuni glogu ke raru igne tei posani Thongna Mediterenian. Keha namono te au ke mata rhegna glogu igne nodi vikegna Efrem neubane au ke lamnagna nogna rijon Manase.

¹⁰ Vikegna Efrem igre au ke mata, eghuteuna vikegna Manase igre au ke raru, eghuteuna fofotadi phei rijon igre leghu glogu tei gnafa ke mosu Thongna Mediterenian. Nodi rijon vikegna Asa na au ke mosu fei ke raru, eghuteuna nodi rijon vikegna Isaka na au ke maghati fei ke raru.

¹¹ Vikegna Manase igne au keha namono ke lamnagna nogna rijon Asa nei nogna rijon Isaka, nanghadi re Bet-San ghe Ibleam, baludi namono ikodi te au falithui igre, baludi namono Endo, nei Tanak, nei Megido nei Doa te au ka geri thongna.

¹² Funu tifa te ghilei mei posa ka narane gognarogne naiknodi Kenan igre au ngala baludi naiknodi Israel igre, naugna mae Israel theome tangomana te ngolhi fajifladi ka namono igre.

¹³ Neuba vikegna Israel igne ne kegra heta ke leghu na, mare theome ngolhi fajifladi nu huhurudi naiknodi Kenan igre mala loku jateula naikno sneka eghu mare.

Vikegna Efrem nei vido gaga vikegna Manase igre magnahaghedi keha glose

¹⁴ Vikegna Josep igre mei ka Josua ne cheke eghu ka mana, “Gognarona, ghehati la kmana fara naugna Lord ne fablahi ghami. Eghume ghehati magnahaghei nigho iagho te snakre mei keha glosei ka ghehati.”

¹⁵ Nu Josua ne cheke eghu ka mare, “Uve, jame te kmana fara tutuani ghotilo na eghuteuna thogele re theome nabami ghotilo teuna, te keli na ghotilo tei ka nodi glose vikegna Peres, nei ka nodi glose vikegna Refaem, mala tei tobi ka vido igre mala au ghotilo tadi.”

¹⁶ Nu mare ne cheke eghu, “Neuba jame te eni ghehati tuana, theome naba glose malami ghehati ka thogele na are, eghuteuna ghehati jaola theome tangomana te au ka sare na. Naiknodi Kenan te au ka namono Bet-San baludi namono ikodi te au faligohodi mare are, eghuteuna naikno te au ka glogu Jesrel na are thono nheta fara naugna mare au chariot mala magra te horo mare ka aean.”

¹⁷ Josua ne cheke eghu ka mare, “Vike ghotilo igre kmana naikno fara, eghuteuna ghotilo jaola nheta fara ka magra na. Eghume, iara ginauna snakre ari keha glosei ka ghotilo.

¹⁸ Ghotilo ginauna tangomana te hata thogele are, funu ka phile igne tei posa ka keha phile gno. Tutuani namhata igre nathuꞌa fara, nu ghotilo tangomana te tobi fagae mala au ghotilo tagna. Eghuteuna jaola tutuani naiknodi Kenan igre au nodi chariot teke horo ka aean, eghuteuna mare nheta ka magra na, nu ghotilo tangomanau ngala te ngolhi fajifladi re naikno tuare.”