Josua 16 - Buka Blahi Ka Cheke Holo

Nodi glose vikegna mae Efrem nei vido vikegna mae Manase

¹ Igre glose te khotodi vikegna mae Josep. Nohi ke mata na funu ka Khoꞌu biꞌo Jordan rhegna Jeriko eghuteuna tei me posani glokha khoꞌu ke maghati Jeriko, eghuteuna ke tei ke lamna namono nagou. Tei salaꞌu Jeriko eghuteuna tei me posani thogele Betel,

² aonu tei me posani namono Lus, eghuteuna ke tei me salaꞌu Atarot fofotagna nodi rijon naiknodi Aki.

³ Aonu, figri tei ke mosu aheva te tei te posani fofotagna nodi nohi vikegna mae Jaflet tifa ia, eghuteuna ke tei me posani namono te kiloi Bet-Horon Pari, eghuteuna ke tei me posani namono Gesa, eghuteuna tei me gnafa ka Thongna Mediterenian.

⁴ Igne glose aheva te khotodi phei vikegna mae Josep, mae Manase ghe mae Efrem.

Nodi glose vikegna Efrem

⁵ Ke mata na nodi nohi glose vikegna mae Efrem mare te khotogna funu ka namono Atarot-Ada ke maghati na, eghuteuna haghe ka namono te kiloi mare Bet-Horon Holo,

^6-9 eghuteuna ke tei famosu tei posani Thongna Mediterenian. Fofotagna mare ke raru na, funu ke maghati namono Janoa, eghuteuna figri fararu kakatha, eghuteuna ke figri mei kakatha ke mata tei posa ka phei namono Mikmetat ghe Tapua, eghuteuna tei leghuni glogu Kana tei ke mosu tei posani Thongna Mediterenian. Fofotagna ke maghati na, funu ke raru rhegna namono Janoa eghuteuna tei salaꞌu Tanat-Saelo, eghuteuna tei posa ka namono Atarot, eghuteuna tei posa ka namono Nara, eghuteuna tei posa ka Khoꞌu biꞌo Jordan ka kaisei vido rhegna namono Jeriko. Namono biꞌo te gnafa nei namono ikodi te gnafa teu ka fofotagna ke mosu na teu igne, au ke lamnagna nodi rijon vikegna mae Manase, nu mae Josua neke snakre laohi ka vikegna mae Efrem.

¹⁰ Vikegna mae Efrem igre theome ngolhi teidi kolho naiknodi Kenan te au ka namono Gesa. Mare au fodu kolho baludi mare mei posa gognarogne, nu vikegna mae Efrem igne huhurudi naiknodi Gesa mala loku jateula naikno sneka eghu.