Josua 14 - Buka Blahi Ka Cheke Holo

Mae Israel ne lalahu khale eigna Kenan

¹ Aonu pris biꞌo Eliesa balugna mae Josua nei mae lida ka tharakna te gnafa ka vikegna Israel, mare ne fofota glose Kenan ke mosu Khoꞌu biꞌo Jordan mala tei ka iheire te theo kaisei nodi vido glose.

² Mare ne fofota glose igne leghui unha teke chekeni Lord ka mae Moses tifa na. Mare ne lalahu khale mala laseni vido glose aheva Lord nate snakre lao ka nheva vike mare igre, baludi keha vido vikegna mae Manase, te theo kaisei nodi vido glose.

^3-4 Glose ka keha phile ke maghati Khoꞌu biꞌo Jordan igne, mae Moses neke tufahi ka phei vikedi mare balugna keha vido vikegna mae Manase. Tifa na mae Josep neke au phei thugna nalhaꞌu, nanghadire mae Manase ghe mae Efrem. Eghuteuna vikegna mae Josep gne ne tufa ka phei vike, leghudi phei thugna mana re. Nu vikegna mae Livae igre theo thufadi fei glose na. Mare au nodi namono kolho te mala au na. Eghuteuna namono igre au vido lithui mala au buluka nei sipu nei nanigot eghu tadi.

⁵ Tuana puhi te eni mae lida di Israel kate tufa mare glose na thofno leghuni unha teke chekeni Lord ka mae Moses tifa.

Mae Josua ne snakre lao namono Hebron ka mae Kaleb

⁶ Keha maedi Juda ne tei Gilgal ka mae Josua. Eghuteuna mae Kaleb thugna mae Jefune igne, mana kaisei mae ka vikegna mae Kenas. Mana ne cheke eghu ka mae Josua, “Kani au teku tahati ka namono Kades Banea, Lord neke cheke ka mae Moses nogna mae gloku na eidi unha teke magnahaghedi mana ka tapa ra. Iagho jame ghathoniu igne.

⁷ Ka narane tura, iara neke phiatutu finogha gnahi, eghuteuna mae Moses nogna mae gloku Lord ia neke cheke ka iara mala tei fasigho ka namono Kades Banea. Aonu iara neke tei neke filodi unha te au teu jare na. Aonu iara neke pulo mei neke toutonu ka mana eidi unha teke filodi iara ka phei tathagu re. Iara neke theome chaichaghini mana.

⁸ Nu keha mae teke tei balugu iara ra teke edi keha nafnata thoutonu te mhaghu nodi naiknore. Tutuani fara, iara neke thofno leghu fakelini nogna cheke Lord, noda God tahati maeda Israel.

⁹ Aonu ka narane tuana, mae Moses neke eni kaisei nhaꞌa cheke ka iara neke cheke eghu, ‘Iagho ne thofno leghu fakelini Lord, noda God, eghume vido glose te tapla teu iagho phei ghahemure ke klignagna igne mala nou iagho fabrahu nei thumu iaghore eghu.’ ”

¹⁰ Eghuteuna mae Kaleb tudu ne cheke eghu, “Lord neke chekehi ka mae Moses glepo igne kani au teku mae kuꞌedara ka namono nagou ia. Eghume, filo sagho. Gognarona salaꞌuhi phiatutu glima finogha. Nu Lord na togho ghau iara tela karha teu iara tela ghilei mei posa gognarogne jateula teke la nhaꞌa chekenihi mana na eghu. Iara nhana salei glima finogha gnahi gognarona.

¹¹ Nu nanhetagu iara na theome gnafau gognarona. Theo. Iara jateula kani teke kuru tei ghau iara mae Moses tifa ia eghu ngala nanhetagu na, theome ke tughu. Iara nabagu ngala te tei ka magra jateula teke tifa ia teu gognarona.

¹² Eghume, iagho snakre mei ka iara thogele teke chekeni Lord ka narane teke toutonudi iara unha teke filodi ka phei tathagure. Iagho nomhinihi unha teke chekeni iara ia, jame maedi Anak te nheta fara nei mae brahu eghu te au ka namono biꞌo te bara te maku na. Nu jame te au teu Lord balugu iara na, iara tangomana te tei brue fajifladi mae igre jateula teke chekeni Lord igne eghu.”

¹³ Mae Josua nomhini nogna cheke mana igne ne fablahini mae Kaleb, aonu mae Josua ne snakre lao ka mana namono Hebron.

¹⁴ Mae Kaleb ne thofno leghu fakelini chekegna Lord, nodi God mae Israel ka nagnafagna fateote'o. Eghume, namono Hebron igne nodi tharaknagna mae Kaleb, thugna mae Jefune, nei vikegna mae Kenas eghu fabrahu.

¹⁵ Tifa na, namono Hebron igne mare neke kiloni Kiriat-Aba. Eghuteuna mae Aba gne neke kaisei mae biꞌo ka hatimare mae Anak. Ke leghugna te atha mae Kaleb namono igne, naiknore ne au ka pharikeli.