Josua 1 - Buka Blahi Ka Cheke Holo

Mae Israel mala tei hata namono Kenan

¹ Ke leghugna te lehe mae Moses nogna mae gloku Lord igne, Lord ne cheke ka Josua thugna mae Nun, mae ihei teke toghoni mae Moses.

² Lord ne cheke eghu ka mae Josua, “Nogu mae gloku iara Moses ia la lehehi, nu gognarona, ghotilo tarabana mala tei kasa ka Khoꞌu biꞌo Jordan, mala tei ka namono teke magnahagheni iara mala au ghotilo teku ia.

³ Iara neke nhaꞌa chekehi kantri igne ka mae Moses. Eghume, vido nate tapla ghotilo tagna igne mala nomi ghotilo gognaro na.

⁴ Namono igne, funu ke mata namono nagou tei posa ke raru Thogele Lebanon. Aonu ke maghati na funu ka Khoꞌu biꞌo Iufretis tei posa ka nodi vido mae Hit. Eghuteuna funu jare tei posa ke mosu Thongna Mediterenian.

⁵ Te chekeni iara ka iagho na, theo kaisei naikno nate ulu nigho iagho ka magra na. Iara ginauna au balumu iagho jateula teke au iara balugna mae Moses tifa ia eghu. Iara ginauna au balumu iagho, iara ginauna na theome tei koko nigho ba ghatho iho nigho.

⁶ Josua, kegra heta! Thosei mhaghu, ba suaraghi. Iagho mala batudi naiknore mala tei ruma haghe ka namono teke nhaꞌa chekehi iara ka kuꞌemi ghotilo tifa ra.

⁷ “Kegra heta, thosei mhaghu, ba suaraghi. Leghu fakelidi vetula teke tusu ranghi nigho nogu mae gloku iara mae Moses. Iagho thosei koko kaisei phugra cheke ka vetula teke lilisei ranghi nigho mae Moses igre. Eghume, jame te leghu fakelidi iagho nogna cheke mana igre na, aheva te tei iagho na, iagho ginauna thofno doglo fara unha te magnahaghei edi iaghore.

⁸ Leuleghu fata na iagho iuꞌiju koba buka vetula igne, eghuteuna iagho farirhiudi naiknore eidi cheke te au ka buka na igre. Eghuteuna bongi narane na iagho ghaoghatho fakeli leghudi cheke igre mala tangomana iagho te edi unha te chekedi ka vetula na igre. Jame te eghu iagho na, nou gloku iaghore ginauna na thofno keli fara.

⁹ Iara la chekehi ka iagho. Eghume iagho kegra heta, thosei mhaghu, ba suaraghi. Naugna aheva te tei iagho na, iara Lord nou God ginauna au balumu iagho fabrahu.”

¹⁰ Josua ne cheke faheta eghu ka mae mala baubatu ka naiknodi Israel,

¹¹ “Ghotilo tei ka naikno ra mala cheke eghu, ‘Ghotilo tarabana keha gano, naugna ka fatilo narane na tahati ginauna kasa ka Khoꞌu biꞌo Jordan mala tei hata namono teke nhaꞌa cheke ranghi ghita noda Lord God.’ ”

¹² Aonu, Josua ne kilodi vikegna mae Ruben, vikegna mae Gad, nei vikegna mae Manase, ne cheke eghu ka mare,

¹³ “Ghotilo ghatho fakelidi cheke teke edi mae Moses nogna mae gloku Lord ka ghotilo ra. Mana neke cheke eghu ka ghotilo, ‘Lord noda God ginauna tusu mei ka ghotilo namono ke maghati Khoꞌu biꞌo Jordan. Eghuteuna namono au teu tahati tagna igne ginauna mala nomi ghotilo mala au kmu tagna.’

¹⁴ Khetomi, thumi, nomi buluka, nomi sipu nei nomi dongki teu ghotilo are ginauna mala au agne, ka namono mala nomi ghotilo teku mae Moses ka keha phile khoꞌu Jordan igne. Nu mae te gnafa ka ghotilo te lase magra ra mala hata nodi glepo mala magra ra mala kulu tei kasa ka keha phile gno mala togho ghami ghehati ka magra.

¹⁵ Ghehati na magra heta mala ghilei uludi namono te gnafa ka keha phile ke mosu Khoꞌu biꞌo Jordan. Lord noda God neke nhaꞌa chekehi te mala tusu mei ka ghehati na. Eghuteuna kate hata kasa ghehati namono teke tusu mei Lord ka ghehati igne na, ghotilo ginauna nake pulo mei ka namono te au ke maghati Khoꞌu biꞌo Jordan.”

¹⁶ Vikegna mae Ruben, vikegna mae Gad, nei vikegna mae Manase ne cheke eghu ka mae Josua, “Gobigna lepo te chekedi iagho ka ghehati igre, ghehati na ediu, eghuteuna ka vido aheva iagho te magnahaghei kuru tei ghami na, ghehati ginauna tei tagna.

¹⁷ Ghehati ginauna leghu nigho, jateula teke leghuni ghehati mae Moses tifa ia eghu. Eghuteuna nou Lord nei nou God teu iagho igne ginau au balumu iagho jateula teke au mana balugna mae Moses ia eghu.

¹⁸ Eghuteuna ihei te huhughu nigho ba te theome leghuni nou cheke iagho na, naikno tuana ginauna lehe. Nu iagho kegra heta fabrahu, thosei mhaghu ba suaraghi.”