Jenesis 8 - Buka Blahi Ka Cheke Holo

Nabritha na ne hui

¹ God ne theome ghatho ihoni mae Noa nei glepo tautagu te au teu balugna mana ka vaka na. Aonu God ne kuru meini kaisei nuri ne mei ka nauthoglu gne. Eghuteuna khoꞌu na neke funu thugha soru pari.

² Khoꞌu te au ke pari glose ra neke theome loloro haghe. Eghuteuna khoveo te au ka maloa na ra neke theome nakhete.

³ Ke leghudi kaisei gobi glimafulu narane igre u khoꞌu teke toku tafruni nauthoglu na neke funu thoghei neke thugha soru pari.

⁴ Eghuteuna kate ari te khaputu nabotho fitu narane re ka fafitu nhigra na vaka na neke soru togha ka kaisei vido ka thogele Ararat.

⁵ U khoꞌu na soru ne soru, eghuteuna phaꞌudi thogele teke thafru ra neke thakle haghe ka narane ulu lahu ka fabotho nhigra na.

^6-7 Phiatutu narane ke leghugna igne mae Noa ne tothora wida gna vaka na ne kuru teini kaisei nanghaji naꞌao. Nu nanghaji igne ne flalo tafri neu ne ghilei moja khoꞌu na.

⁸ Aonu mae Noa neke kuru teini kaisei balhu, glahula me kela mojahi khoꞌu na.

⁹ Nu nanghaji na ne theome filoni kaisei vido aheva na te mala togha te gnafa na, naugna glose na ne thafru ngau ka khoꞌu na. Nanghaji na flalo neke pulo mei ka vaka na, eghuteuna mae Noa ne ngafa fajifla khamegna na ka wida neke hata fapulo nanghaji na.

¹⁰ Aonu mae Noa ne ofo nabagna kaisei wik neke kuru fapuloni nga balhu na.

¹¹ Eghuteuna ka grafi tuana nanghaji na neke pulo mei ka mae Noa. Naꞌa kakathu ka foflogna na pala ne mei kaisei khakla gaju oliv majaghani! Aonu mae Noa ne lasenihi tela namo moja hi u glose na ne cheke eghu, “Uve, khoꞌu na kela krangohi!”

¹² Mana neke ofoi nabagna kaisei wik neke kuru fapuloni nga balhu na ka fatilo fata na. Nu gognaro nanghaji na neke theome pulo mei.

¹³ Mae Noa gognaro na namno gobi kaisei finogha. Narane ulu lahu ka nhigra ulu lahugna finogha tuana khoꞌu na ke la mojahi. Mae Noa ne hata fadelei thotoku gna vaka na ne filo tafri ne filoni glose na te la mojahi na.

¹⁴ Kate ari te khaputu varadaki fitu narane gna fapea nhigra na u glose na ne thofno moja fara.

¹⁵ Aonu God ne cheke eghu ka mae Noa,

¹⁶ “Iagho khetomu, thumu nalhaꞌu nei khetodi mae thumu gre teuna, ghotilo gognaro na tangomana te jifla ka vaka igne.

¹⁷ Hata jifla balumi glepo tautagu te gnafa nei nanghaji te gnafa teu te au ka vaka na igne. Thua nafnata glepo igre ginauna na kmana thudi nei ginauna na vuragha e thovu ka nauthoglu igne eghu.”

^18-19 Aonu mae Noa ne jifla ka vaka na balu khetogna, thugna nalhaꞌu nei khetodire nei thua nafnata glepo te tautagu te gnafa nei thua nanghaji te gnafa teure ne fagleghui ne jifla ka nodi soasopai nafnatadi.

Mae Noa ne fafara kaLord

²⁰ Aonu mae Noa ne hohoro kaisei olta mala tarai ka Lord. Eghuteuna mana ne atha keha nafnata glepo te tautagu nei keha nafnata nanghaji teu te naba mala ghamu re, aonu mana ne falelehe ne gahu ne fafara ke ulugna Lord.

²¹ Lord ne gnanghini u fafara te famane sisiri keligna igne ne keli tagna fara ne cheke eghu, “Iara ginauna nake theome goigoni u nauthoglu igne ke tughugna puhi diꞌa teke edi naikno igre neuba iara kulu lasedihi naikno igre neke diꞌa neke mei ngala funu suadi. Nu iara ginauna nake theome goigonidi gobigna lepo te karha ka nauthoglu na igre jateula te eni iara gognaro gne eghu.

²² Uve, ginauna na au nhigra mala joꞌu nei mala dokha, nei nhigra mala reka nei mala brana, nei nhigra mala nakhete nei mala naprai, nei vido narane mala phae nei mala romno. U nafnata vido igre ginauna na theome gnafa kate aunga teu nauthoglu igne.”