Jenesis 7 - Buka Blahi Ka Cheke Holo

Nabritha biꞌo

¹ Aonu Lord ne cheke eghu ka mae Noa, “Ghema Noa, te laseni iara na, kaisei iagho gne ngala te doglo fara puhimu na ka gaꞌase nei nalhaꞌu eghu te au iagho baludi ka nauthoglu na igre. Eghume iagho tei saghe ka vaka na balugna tharaknamu na.

² Kate tei saghe ka vaka na, iagho na atha fitu nalhaꞌudi nei fitu gaꞌasedi eghu ka soasopaigna nafnata glepo te tautagu te naba mala ghamu nei fafara teu are. Eghuteuna glepo te tautagu te theome naba te mala ghamu nei fafara teu are, iagho na atha kaisei nalhaꞌu gna nei kaisei gaꞌase gna eghu kolho.

³ Eghuteuna ka soasopaigna nafnata nanghaji te flalo ka maloa na are iagho na atha fitu nalhaꞌudi nei fitu gaꞌasedi eghu mala karhau reꞌe ka u nauthoglu igne.

⁴ Fitu narane funu gognaro gne iara ginauna na kuru meini nakhete na mala soru ka nauthoglu igne. Nakhete igne ginauna na soru nabagna phiatutu narane nei phiatutu bongi eghu. Ka nakhete igne ngala nate roꞌe fahuidi iara gobigna lepo te karha teke vuavuha iara ka nauthoglu igne na.”

⁵ Mae Noa ne thofno edi unha teke chekedi Lord ka mana re.

⁶ Mae Noa gne neke namno gobi finogha gnahi kani teke mei nabritha na teke toku thafruni nauthoglu igne na.

⁷ Mae Noa baludi khetogna, thugna nalhaꞌu nei khetodi mae thugnare eghu ne rikha ne tei saghe ka vaka na mala theome knoho ka meigna nabritha biꞌo na.

^8-9 Mae Noa ne thofno leghuni unha te chekeni God na nei hata balugna thua nafnata glepo te tautagu igre nei nanghaji re eghu ka vaka na.

¹⁰ Kaisei wik ke leghugna tela saghehi ka vaka na, u nabritha biꞌo na ne mei ne toku thafruni u nauthoglu thongana na.

¹¹ Kate namno gobi finogha gnahi mae Noa igne nabritha biꞌo na ne funu mei kate ari te khaputu nabotho fitu narane re ka fapea nhigra ka finogha tuana. Ka narane tuana glose na ne bagra pea eghuteuna khoꞌu biꞌo teke au ke pari glose na ne fura haghe kligna. Eghuteuna nakhete biꞌo fara na ne funu thofa soru ka khoveo te au ka maloa na.

¹² Nakhete na ne soru ka nauthoglu igne nabagna phiatutu narane nei phiatutu bongi neu.

¹³ Mae Noa ghe khetogna na nei thilo mae thugna nalhaꞌu re, mae Sem, mae Ham, mae Jafet nei khetodire eghu ne saghe ka vaka na.

^14-15 Thua nafnata glepo te tautagu te namha ba te mhaumhaghu, te biꞌo ba te ikodi nei thua nafnata nanghaji teu igre ne mei ne saghe baludi ka vaka na.

¹⁶ Thua nafnata glepo te tautagu igre mei peapea ka vaka na, kaisei nalhaꞌu gna nei kaisei gaꞌase gna neu leghuni unha teke chekeni God ka mae Noa na. Aonu ke leghugna te saghe te gnafa mare ka vaka na, Lord ne bobotho grengathagna vaka na.

^17-18 Khoꞌu na ne britha nabagna phiatutu narane, nei haghe ne haghe kligna ne tei salaꞌuni glose na aonu vaka na ne phogla.

¹⁹ Eghuteuna khoꞌu na haghe ne haghe ne tei salaꞌudi thogele te biꞌo te gnafa re.

²⁰ Ke leghugna igne khoꞌu na haghe ne haghe nabagna fitu mita ne tei salaꞌudi thogelero.

^21-23 Nanghaji te gnafa, nei glepo te tautagu te gnafa eghu te namha ba te mhaumhaghu, te biꞌo ba te ikodi, nei naikno te gnafa teure ne kafe lehe. Uve, glepo karha te gnafa re ka nauthoglu gne ne kafe lehe. Mae Noa nei tharakna na nei unha teke balugna ka vaka na re eghu ngala te karha na.

²⁴ Khoꞌure ne britha ne thafru fabrahu nauthoglu na nabagna kaisei gobi glima fulu narane.